ပံက်ရံၚ်အာ ဝၚ်ပၠန်ဂတးမန်တုဲကၠုၚ်တေံမ္ဂး က္ဍိုပ်သ္ကိုပ်ပိုဲတံဗွဲမဂၠိုၚ် ဘဝညး ဂၠံၚ်တရဴညး ပ္ဍဲခေတ်ညးတံ ညးတံချူထ္ၜးလဝ်တုဲရ။ ရံၚ်အာလိုက်တ္ၚဲဏံတုဲ ဒးသ္ပအစာံမ္ဂး ဂကူဇၞော်မောဝ် ဍုၚ်ဇၞော်မောဝ်ဗွဲမဂၠိုၚ် ၜတ်ကၞာတ်မံၚ်ကဵု ကွပ်မၞိဟ်သၟတ်ညးတံ မၞုံကဵု ကွတ်၊ ပညာ၊ နဲကဲဂတာပ်ခေတ်ဂၠိုၚ်ဟေၚ်တုဲ ပ္ဍဲအရာပရေၚ်ကောပ်ကာဲလေဝ် ပြုပြေၚ်ဖျေံကဵုဒၞာဲဒးဂှ်ရ ပရေၚ်ကမၠောန်ညးတံဇၞော်မောဝ်။ ဟိုတ်ဂှ်ရ က္ဍိုပ်သ္ကိုပ်တံဂမၠိုၚ် လ္တူကမၠောန်ချဳဓရာၚ်ဂကူဂှ် ညံၚ်ဟွံဂွံသ္ပလဝ်မဇ္ဇု် ကုသၟတ်တံ (ဝါ) သ္ၚဳဂၠိပ်အာခေတ်တ္ၚဲဏံမ္ဂး သၟတ်ပိုဲတအ်လေဝ် သာသ္ပအ်မံၚ်ဟွံထေက်ရပုဟ် ဒးဍံၚ်ဗက်ပရေၚ်လှာဲ (ဟွံသေၚ်)ပ္ကောံပ္ကေဝ်လဝ်ကွတ်ပညာ ဂတာပ်ခေတ်တံကီုရောၚ်။ ရဴဝွံ ဥက္ကဌကမ္မတဳကၠောန်ဗဒှ် တ္ၚဲသၟတ်မန်-အလန်တတိယ နာဲရတ်ပံၚ် ဟီုဂလာန်ပံက် ဏါနိဒါန် ပ္ဍဲအခန်ကၞာတ္ၚဲသၟတ်မန် အလန်တတိယရ။
အသေဟာန်တ္ၚဲသၟတ်မန် အလန်တတိယဝွံ ပ္ဍဲစၟတ်တ္ၚဲ ၂၈ ဂိတုဒဳဇြေမ်ဗါ သၞာံ ၂၀၁၄ဂှ် ကၠောန်သ္ပဏါ လ္တူဍုၚ်ဇၞော်ကွာလာလာမ်ပူ ဍုၚ်မလေဝ်ယှာ ဒၞာဲ ဘာမန် K.L(ဘာလကျာ်မန်)မၞုံအရာပ်ပူတူတုဲ သၟတ်မန် ကေုာံ ညးမဆာန်ဂကူမန် မၞုံလ္တူဍုၚ်မလေဝ်ယှာဂမၠိုၚ် လၟိဟ်(၈၀)တၠပြၚ်ၚ် တိုန်စိုပ်လဝ်ရောၚ် နူကမ္မတဳကၠောန်ဗဒှ် မွဲတၠ ဟီုလဴထ္ၜးရ။
“ပ္ဍဲကဵု တ္ၚဲသၟတ်အလုံဂၠးကဝ် သၞာံ ၂၀၁၄ မကၠောန်သ္ပ ဒၞာဲဌာန်ဂအုပ်ကုလသမဂ္ဂဂှ် သၟတ်တအ် လလောၚ်တြးပ္တိတ် လဝ် ပ္ဍဲကဏ္ဍရမျာၚ်ကရေဲညးတံ “အကြာသၟတ်ကဵုယဲစိုတ်ဓါတ်” မူဟိုတ်ရောဟီုတှ်ေ သၟတ်ဂမၠိုၚ် ဟိုတ်နူဒးကၠောန် ကမၠောန်ဂၠိုၚ်၊ ဆိုအ်ဗမံၚ်ကဵုပရေၚ်ကမၠောန်ဂၠိုၚ်တုဲ စိုတ်ဓါတ်စှ်ေဂၠိုၚ်ဂှ်ရ ထ္မံက်ထ္ၜးလဝ် ပ္ဍဲရမျာၚ် ကရေဲညးတံ” သာ်ဝွံ စၞးသဘာပတိ ဥက္ကဌ ဂကောံဟံၚ်ဟ်မြန် နာဲသာၚ်ဝဏ္ဏ ဟီုဂလာန်ကဵုဏါဓဝ်သတိ ကု က္ဍိုပ်သ္ကိုပ်ဂမၠိုၚ်ရ။
ညးအုပ်ကာ ကမ္မတဳကၠောန်ဗဒှ်တ္ၚဲသၟတ်မန် အလန်တတိယ နာဲဆာန်ဠာန် ဒုၚ်စဳရေၚ် စပ်ကဵုဟိုတ်ဂွံကၠောန်ဗဒှ် တ္ၚဲသၟတ်မန် ကေုာံ လၟေၚ်ကမၠောန်တ္ၚဲသၟတ်မန် အလန်တတိယတုဲ စၞးသၚ်မွဲဇကု တၠဂုဏ်အ္စာ ဝိဓူရ (မၞုံပိုန်ဘာမန် KL)ဟီုမြော်ဂလာန် စၞးညးဗြဴမန် မၞုံဍုၚ်မလေဝ်ယှာ မိသဇၚ်မန် ဟီုဂလာန်တုဲ နဒဒှ်စၞးဂကောံကွာန်နာနာ ဥက္ကဌ ဂကောံမိၚ်ရမျာၚ်လရိုအ် ကွာန်ဇိုၚ်ကျာ် နာဲၜိုပ်မန်၊ ဥက္ကဌဂကောံကွာန်ဏံၚ်စံက် နာဲရမျာၚ်မန် ဟီုဂလာန်သြဝါဒတုဲ စၞးဂကောံသၟတ်မန် တိဍာ်ဗၠးၜး ဒုဥက္ကဌ နာဲရာမညအီဆာဲ လဴထ္ၜးဗီုပြၚ်မကၠောန်သ္ပကၠုၚ် တ္ၚဲသၟတ်မန် လ္တူဍုၚ်မလေဝ်ယှာ တုဲကၠုၚ်တေံတုဲ မိလျးမန် ဗှ်ထ္ၜးလိက်လလောၚ်တြး ဌာန်ကောံသၟတ်မန် နူဍုၚ်မန်ပ္တိတ်လဝ် သွက်တ္ၚဲသၟတ် အလန်တတိယ၊ မာံရာဇာမန် ဗှ်ထ္ၜးလိက်လလောၚ်တြး ဂကောံသၟတ်မန်-တိဍာ်ဗၠးၜးတုဲ မာံဂံၚ်ဇနဲ ရေၚ်တၠုၚ်ဏါ နဒဒှ်လျိုၚ်အသေဟာန်ရ။ ပ္ဍဲအခိၚ် ၁၂ နာဍဳဂှ် ပံက်အသေဟာန်တုဲ စိုပ်အခိၚ် ၂ နာဍဳ ၃၀ မိဏေတ်ဂှ် ရုပ်ကၠေံဏါအသေဟာန် နကဵုဒွက်ကောန်ဂကူရောၚ် ကမ္မတဳကၠောန်ဗဒှ်မွဲတၠ နာဲသူရ ဆက်လဴထ္ၜးရ။
တ္ၚဲသၟတ်မန်မကၠောန်သ္ပ လ္တူဍုၚ်မလေဝ်ယှာဝွံ အတိုၚ်သၞာံတုဲကၠုၚ်တေံ မရနုက်ကဵု(၂)ဝါဂှ် သၟတ်တံစိုတ်ထတ်မံၚ် လ္ပာ်ဂွံဇၞော်သၠဲပ္တိုန် တ္ၚဲသၟတ်မန် ညံၚ်ရဴက္ဆံၚ်တ္ၚဲကောန်ဂကူမန်မာန်၊ လၟိဟ်မၞိဟ်တိုန်စိုပ်ဂၠိုၚ်ၚ်မာန်ကီုလေဝ် သၞာံပထမ ဂှ် ဟိုတ်နူခက်ခုဲကဵုသြန်ဘဏ္ဍာမွဲသာ်၊ မွဲသာ်ပၠန်ဂှ် ဟိုတ်နူဒှ်သၞာံကိုပ်ကၠာအိုတ်တုဲ လၟိဟ်မၞိဟ်တီအောန်ဂှ်ရ ဒး ကၠောန်ဗဒှ်ဏါလ္တူရုၚ်ဟံၚ်ဟ်မြန်ရ။ သၞာံဒုတိယဂှ် တိတ်မ္ၚး ကၠောန်ဗဒှ်ဏါပ္ဍဲ Chinese Assembly Hall (ထပ်လ္တူ) မာန်ကီုလေဝ် ပ္ဍဲသၞာံတတိယဏံ ဟိုတ်နူအခက်ခုဲကမၠောန်နာနာတုဲ ဂွံအ္ခိၚ်ချဳဓရာၚ်အောန်ကီု ဂွံတိတ်မ္ၚးလိၚ်ၝောံ ခန် Chinese Assembly Hall ဂှ် ဟိုတ်နူဍေံပလေဝ်ပလေတ်မံၚ် ဟွံတုဲဒှ်ဏီဂှ်ရ ဖျေံထောံသ္ဂုတ်သွာတ် ကၠောန်ဗဒှ်ပ္ဍဲဘာမန် K.L ရောၚ် ဂွံတီကေတ်ရ။
မိအံၚ်လျးဆာဲ(ဌာန်ပရိုၚ်ဗညာဓရာံ)
0 comments :
Post a Comment