အသေဟာန်ဝွံ နူဂယး (၁၀း၁၅) နာဍဳ စပ္တံပံက်ဏါအသေဟာန်တုဲ နာဲကဏ္ဍ(ဖက်ဆောညးအုပ်ကာ MMA လၟိဟ် ၂) ရေၚ်တၠုၚ်ဏါ နဒဒှ်လျိုၚ်အသေဟာန်ရ။
ကျာ်ဇၞော်ကေသရ(နွံပိုန်ဘာမန် ဗါတ်တဝတ်) နာယက MMA နာဲနန်ဆီနာဲ၊ ဥက္ကဌ MMA နာဲအကးပေၚ်၊ ဥက္ကဌဂကောံဟံၚ်ဟ်မြန် နာဲသာၚ်ဝဏ္ဏတအ် ရေၚ်တၠုၚ်ဏါ နဒဒှ် ဂကောံသဘာပတိရ။
ပထမကိုပ်ကၠာ ကျာ်ဇၞော်အ္စာဘာမန် ဗါတ်တဝတ် ဘဒ္ဒန္တကေသရ ဟီုမြော်ဂလာန်ကဵုသြဝါဒဂှ် “တ္ၚဲဏံလှုဲဂၠိုၚ်လေဝ် ရာန်ကေတ်ဟွံဂွံဂှ် ဒှ်တ္ၚဲဏံရ။ ဘာသၠုၚ်လညာတ်ပရေၚ်ကွာန်ဟီုဂှ် ဒှ်လမျီုဂကူ၊ ဒှ်လမျီုလတေၚ်ဆီဂကူရောၚ်။
ဂကူပိုဲဍာ်ဒကေဝ်ဟၟဲမ္ဂး ဒးဒုၚ်ၚိတ်ကမၠက်ကဵုဂကူညးရောၚ်။ ဘာသၠုၚ်လညာတ်ဗီုဗီုဏံ ညံၚ်ဂွံပံက်ကဵုဂၠိုၚ်ၚ်။ သွက်ဂကူပိုဲ ပိုဲဒးဒက်ပ္တန်ဝါဒဂကူရောၚ်။ ရဴဝွံဂွံမိၚ်ကေတ်ရ။
နာယက ဂကောံပံၚ်ကောံမန်မလေဝ်ယှာ (လ္ပာ်ခရှ်) နာဲနန်ဆီနာဲ လေဝ် “ဘာသၠုၚ်လညာတ်ဗီုဗီုဏံဂှ် ပ္တန်ၚုဟ်မးဟွံမာန်ပုဟ်။ ဘာဏံသွက်ဂွံစလွဳၜံၚ်ပ္တိုန် က္ဍိုပ်သ္ကိုပ်ကောန်ဂကူ အနာဂတ်ရောၚ်။ ပိုဲတအ်ၜိုတ်ဆဗှ်လ္ၚတ်ကေတ် လိက်ပတ်ဂှ် ကၠးညိဟွံကၠးညိ။ လၟုဟ်မ္ဂး ကၠးအာတၟာဂလိုၚ်ဒှ်တုဲ တၚ်ဂုဏ်အ္စာဘာသၠုၚ်လညာတ်တၟာဂလိုၚ်ရ။” ရဴဝွံဟီုဏါရ။ တုဲမ္ဂး ဥက္ကဌ MMA နာဲအကးပေၚ် ဟီုဂလာန်မိပ်စိုတ်၊ ဥက္ကဌ MRO နာဲသာၚ်ဝဏ္ဏ ဟီုဂလာန်ကဵုဇြဟတ်ရ။
ဘာသၠုၚ်လညာတ်ဏံ ဂွံကတဵုဒှ်ကၠုၚ်မာန် ဂကောံဒုၚ်တိုၚ်တုဲ ဂိုတ်ဂစာန်ဗွဲတၟေၚ် ဥက္ကဌ ဂကောံညဳသၟဟ်ဒတုဲဖဵုသၟတ်မန် ကွာန်ကအ်ဍောတ် နာဲစဳကၠးမန် ဟီုဂလာန်မိပ်စိုတ်ရ။
တုဲမ္ဂး ဂကောံသဘာပတိတအ် ဇိုန်ဏှၚ်ပၟပ်ဟြပ်ကဵု ကွးဘာတအ် လိက်စၟတ်သမ္တီဖျေံဘာသၠုၚ်လညာတ်ရ။ မွဲအဆကဓဝ် စၞးကွးဘာ နာဲယဳမန်၊ နာဲအနာဂတ်မန် ဟီုဂလာန်တၚ်ဂုဏ်ရ။ အ္စာဘာပရေၚ်ဍုၚ်ကွာန်လေဝ်ဒှ်၊ ဖက်ဆောညးအုပ်ကာလၟိဟ်(၁) MMA လေဝ်ဒှ် နာဲရာမညအီဆာဲ သောၚ်ကလးဗီုပြၚ် ဘာသၠုၚ်လညာတ် က္တဵုဒှ်ကၠုၚ်ကီု၊ သီုဟီုဂလာန်အုပ်ကၠေံနိဂီုရ။
စိုပ်အခိၚ် 10း 55 နာဍဳဂှ် ရုပ်ကၠေံဏါ အသေဟာန်နကဵုဒွက်ကောန်ဂကူတုဲ ပံၚ်ကောံ တက်ဗီုညးသ္ကအ်နဒဒှ်စၟတ်သမ္တီရ။
ဘာသၠုၚ်လညာတ်ပရေၚ်ဍုၚ်ကွာန်ဝွံ နူစၟတ်တ္ၚဲ 31/12014 စဵုကဵုစိုပ် 3/2/2014 ပံက်ပ္တိုန်ဏါတုဲ အ္စာဘာပရေၚ်ဍုၚ်ကွာန် နာဲရာမညအီဆာဲဂှ် ဝၚ်ပၠန်ဂတးမန်၊ ဝေါဟာရပရေၚ်ဍုၚ်ကွာန်၊ ဝၚ်ပရေၚ်ဍုၚ်ကွာန်မန်၊ ကၟိန်ဍုၚ်ပံၚ်ကောံဇေတ်တ်၊ ဂၠံၚ်တရဴပရေၚ်ဍုၚ်ကွာန်၊ သဳကၠဳကဵုဏါလညာတ်တုဲ နာဲဂံၚ်သ္ကာ ညးအုပ်ကာ MMA ဂှ် သ္ၚဳဂၠိပ်သဳကၠဳကဵု ဗီုပြၚ်သၞောဝ်သ္ဇိုၚ်ဥပဒေရာမည၊ သၞောဝ်သ္ဇိုၚ်ဥပဒေ သၞာံ ၂၀၀၈ တအ်တုဲ ကွးဘာဗၞတ်(၂၆)တၠ ပြၚ်ၚ် တိုန်စိုပ်လဝ်ရ။
အနှေန်ဇူကမၠောန် အခိၚ်အတးကြုက်(ကြုက်ကၠောံသၞာံ)ဂှ် သၟာကမၠောန်ကွာန်ကအ်ဍောတ်၊ ကွာန်အနေၚ်၊ ကွာန်သၞေဟ်ခရေၚ်၊ ကွာန်ဇိုၚ်ကျာ်၊ ကွာန်ပလိုၚ်ကဳ၊ ကွာန်ဝါဂျဳ၊ ကွာန်ကအ်ဗိုတ်တအ် ဗီုအခိၚ်ကိတ်ညဳကဵုညး တိုန်စိုပ်ကတ်လ္ၚတ်လဝ်ရောၚ် ဂွံတီကေတ်ရ။
တၚ်စၟတ်။ ။ MMA ချူဗွဲဇမၠေံတုဲ ဒှ်ဂကောံပံၚ်ကောံမန်မလေဝ်ယှာ။
0 comments :
Post a Comment