သွက်ဂွံထ္မံက်အာရုပ်ရဴ က္ဆံၚ်က္ဆံၚ်ပၠန်ဂှ်တုဲ ထပ်ကောံဓရီုလဝ် ပ္ဍဲကဵုစၟတ်တ္ၚဲ ၆ ဂိတုအေပရေဝ် သၞာံ ၂၀၁၃ ဂှ်ရ၊ ဖျေံကၠုၚ်ပရေၚ်ကမၠောန် သွက်ဂွံကၠောန်ဗဒှ်အာ ပေဲါသၠာဲဂတးလညာတ် မွဲဂိတုမွဲဝါကီု၊ သွက်ဂွံလဴပူစအာကဵု ဘာမန် မတန်တဴ လ္တူဍုၚ်မလေဝ်သျှာ သီုဖအိုတ်ကီု၊ သွက်ဂွံစှ်ေအာပရေၚ်စန်ဒက်ကီုနွံရ၊
စပ်ကဵုပရေၚ်စန်ဒက်တုဲ ပ္ဍဲကဵုစၟတ်တ္ၚဲ ၁၀ ဂိတု အေပရေဝ် သၞာံ ၂၀၁၃ ဂှ် ညးက္ဍိုက်က္ဍိုပ် သ္ကုတ်ကေအယ်(လ်)တံ စှ်ေဆဵုဂဗသဳကၠဳကဵု ကုက္ဍိုပ်သ္ကိုပ်မၞုံ သ္ကုတ်ဒေသပဳနာန်၊ ဗတ္တဝတ်တေံရ၊ ညးက္ဍိုက်က္ဍိုပ် နူဒေသပဳနာန်၊ ဗတ္တဝတ်တံလေဝ် စပ်ကဵုပရေၚ်ဏံတုဲ မိပ်စိုတ်ဗွဲမလောန်ရ၊ ကောံဓရီုဝွံ အခိၚ်ဗ္တံ အကြာ ၉ နာဍဳဂှ် စဏာအစဳဇန်တုဲ ကြပ် ၁၂ နာဍဳလဒေါဝ်ဗ္တံ ကောံဓရီုတုဲရ၊ ညးတာလျိုၚ်သီုၜါလ္ပာ် သဳကၠဳသၠာဲဂတးလညာတ် ညးသ္ကအ်၊ ဖျေံဗီုပြၚ်ပရေၚ်ကမၠောန်ညးသ္ကအ်တုဲ ဥက္ကဌဂကောံဟံၚ်ပြာ်မန် နာဲသာၚ်ဝဏ္ဏ ဟီုဏာဂလာန်အုပ်ကၠေံနိဂီုရ၊
“ပိုဲမၚ်ဒၟံၚ်တၟာလအ်ရ၊ လၟုဟ်ဂွံဆဵုဂွံမိၚ်ဂှ်ဒှ်ပရိုၚ်မ္ၚဵုရ” သာ်ဏံနာဲကြက်ဆာန် နူသ္ကုတ်ဗတ္တဝတ်ဟီုရ။ ရန်တၟံရီုဗၚ်ထံက်ပၚ်ဂကူဇကုဂှ် ဒှ်ကမၠောန်ခိုဟ်ဟ်ရတှ်ေ ပိုဲလေဝ်ဘိုၚ်လုပ်ကၠောန်ကီုဏောၚ်ဂှ် နာဲအံၚ်ဇၞးဆာန် ညးမချဳဒရာၚ်ဒၟံၚ်ပရေၚ်ဂကူ နူဒေသပဳနာန်ဟီုတဴသာ်ဏံကီုရ၊
“ကမၠောန်အဲကၠောန်ဒၟံၚ်အရိုဟ်တ္ၚဲ ဟွံဂွံကၠောန် လီုအာမွဲၜါတ္ၚဲကီုလေဝ် အဲဟွံအောန်စိုတ် မုဟိုတ်ရောဟီုတှ်ေ မန်မလေဝ်သျှာဏံဂွံဒှ်၊ ဂကောံမန်ပိုဲမွဲကဵုမွဲဂွံညဳသာ၊ ဂွံရီုဗက်ထံက်ပၚ်အာဂကူပိုဲဂှ်တှ်ေ အဲမိပ်စိုတ် တုဲပၠန်စှ်ေအာ ပဳနာန်၊ ဗတ္တဝတ်တေံတုဲ ဂွံဆဵုကေတ်ဗီုဂှ်တှ်ေ ဂွံဇြဟတ်စိုတ် ဒးဟီုတှ်ေမိပ်စိုတ်သက်ဟီုဟွံမွဲရ” သာ်ဏံ ဥက္ကဌ ကမ္မတဳသြန်ဂအုံဂကူမန် နာဲအကးပေၚ်ဟီုရ၊
“တော်ကဵုပရေၚ်ဂကူတှ်ေ ပၟိက်ဇၞော်မံၚ် ဒးကၠောန်ထေက် ဂကူပိုဲဂှ်အရာဒးကၠောန်အာ ကမၠောန်သွက်ဂကူ နွံတၟာဂလိုၚ် ပ္ဍဲမလေဝ်သျှာမွဲဓဝ်ဟွံသေၚ် ဒးပံၚ်ကောံ အလုံမန်မွဲဂၠးတိဒှ်မာန်တှ်ေ ဒးပံၚ်ကောံ ဒးညဳသၟဟ်ညးသ္ကအ်ဏောၚ်” သာ်ဏံ ဥက္ကဌဂကောံသၟတ်မန်-တိဍာ်ဗၠးၜး-သ္ကုတ်မလေဝ်သျှာ ဟီုရ၊
သွက်သ္ဂောံဒက်ပ္တန် ဂကောံဏံမာန်ဂှ် ကၠောန်သ္ပအာပေဲါသၠာဲဂတးလညာတ် ပွိုၚ် ၃ ဂိတုကီု၊ နွံပၟိက်မ္ဂး ပ္ဍဲဒေသတံလေဝ် စှ်ေအာပရေၚ်စန်ဒက်ရောၚ်ဂှ် ညးမပါလုပ်မံၚ်ပ္ဍဲကမ္မတဳဂှ်မွဲတၠဟီုရ။
0 comments :
Post a Comment