ပေဲါသၠာဲဂတးလညာတ် သွက်သ္ဂောံဒက်ပ္တန်ဂကောံပံၚ်ကောံမန်မလေဝ်ယှာဝွံ လဒေါဝ်တ္ၚဲ ၁ နာဍဳ ၂၀ မိနေတ် စပံက်ဏာအသေဟာန်တုဲ နာဲဥက္ကာ (ဥက္ကဌ ဂကောံသၟတ်မန်) ရေၚ်တၠုၚ်ဏာ နဒဒှ်လျိုၚ်အသေဟာန်ရ။
ပထမကိုပ်ကၠာ နာဲကလေၚ်ဌာန် ဟီုပၟိၚ်ဂလာန်၊ နာဲသဵုညောအ် ဟီုဂလာန်မိပ်စိုတ်၊ ညးက္ဍိုက်က္ဍိုပ် ကမ္မတဳထ္မံက်ပ္တိုန် ဂကောံမန်မလေဝ်ယှာ နာဲအကးပေၚ် သောၚ်ကလး ဗီုကသပ်ဒှ်ပံက်ပ္တိုန် ဂကောံမန်မလေဝ်ယှာ (ယာယဳ)၊ ဒုညးက္ဍိုက်က္ဍိုပ် နာဲသာၚ်ဝဏ္ဏ ဒုၚ်စဳရေၚ်ဗီုစထ္မံက်မံၚ်ရုပ်ရဴ၊ ဂကောံကမ္မတဳ နာဲရာမညအီဆာဲ ဗှ်ထ္ၜးလဴကလး သ္ဇိုၚ်သၞောဝ်ဥပဒေအပြောံ မန်မလေဝ်ယှာရ။
တုဲမ္ဂး အစဳဇန်ဆက်မိတ်ကုဂကောံကွာန်နာနာ၊ အစဳဇန်သၟာန်သွဟ် လှာဲဂတးလညာတ် သွက်ဂွံဒက်ပ္တန် ဂကောံမန်မလေဝ်ယှာ ဗွဲတြးရ။
သွက်ဂွံထ္မံက်ပ္တိုန်ဂကောံမန်မလေဝ်ယှာ ဗီုပြၚ်ရုဲမာဲ သ္ဂောံစိုပ်တရဴပြဟ်ဟ်ဂှ် ဒက်ပ္တန်ကမ္မရှေန် ဇက်သၞောဝ်ပေဲါရုဲမာဲမွဲရ။ ပ္ဍဲကမ္မရှေန်ဇက်သၞောဝ်ပေဲါရုဲမာဲဂှ် ရုဲစှ်ဏာ တၠဂုဏ်အ္စာထာဝရ (နွံပိုန်ဘာသၞေဟ်ဂၠုၚ်)၊ နာဲကလေၚ်ဌာန်၊ နာဲကောနန် (MYPO)၊ နာဲဂံၚ်ဇာနဲ (ကံဗိုတ်)၊ ကေုာံ ကမ္မတဳထ္မံက်ပ္တိုန် ဂကောံမန်မလေဝ်ယှာတံ ပါလုပ်ရ။
ဆက်တုဲ ပံက်ဏာသီုကမ္မတဳ ကၠောန်ဗဒှ် တ္ၚဲဟံသာဝတဳလီုပေၚ် ၂၅၆ သၞာံ ဒုၚ်သ္ဇိုၚ်ကဵု ဂကောံကွာန်နာနာရ။ ဥက္ကဌ နာဲဒဳပ၊ ညးအုပ်ကာ နာဲတၠသိုက်၊ လျိုၚ်ဘဏ္ဍာ နာဲအံၚ်မန်၊ နာဲအာဲမန်ထဝ်၊ စၟဳစၟတ်စရၚ် နာဲပညာတံ ပါလုပ်က္ဍိုက်က္ဍို်ပ် ပ္ဍဲကမ္မတဳကၠောန်ဗဒှ် တ္ၚဲဟံသာဝတဳလီုရ။
မိသိုက်ရတ် ဂကောံကမ္မတဳထ္မံက်ပ္တိုန် ဂကောံမန်မလေဝ်ယှာဝွံ “သဳကၠဳကိစ္စမန်မလေဝ်ယှာ ကဵုဖျုန်သွက်ဂကူပိုဲမိပ်စိုတ် အဓိကမန်မလေဝ်ယှာဂှ် ကေတ်ဗၠးၜးဂကူရ” ဂလာန်ရဴဝွံ ဟီုဏာဂလာန် ပ္ဍဲကဵုအစဳဇန် အုပ်ကၠေံနိဂီုရ။
ညးမဆာန်ဂကူမန်၊ သၟတ်မန်၊ ညးစၞးဂကောံနာနာတံ ဗၞတ် ၄၀ တၠပြၚ်ၚ် တိုန်စိုပ်သဳကၠဳကတိုၚ်ကတိုၚ်ကၟဟ်ဟ် ပ္ဍဲပေဲါသၠာဲဂတးလညာတ်ဏံတုဲ စိုပ်အခိၚ်သဝ်တ္ၚဲ ၜိုတ် ၆ နာဍဳဂှ် ရုပ်ကၠေံအသေဟာန်ရောၚ် သ္ဂောံတီကေတ်ရ။
0 comments :
Post a Comment