ကၠာဟွံဂွံစိုပ်အတးကြုက်ဏီ ဂကောံပံၚ်ကောံမန်မလေဝ်ယှာ ထပ်ပံက်ဏာဘာသၠုၚ်လညာတ်ပရေၚ်ဍုၚ်ကွာန် တ္ၚဲဇမၠေံပ္ဍဲဒေသ(ကဠၚ်)

ဂကောံပံၚ်ကောံ်မန်မလေဝ်ယှာကေုာံ ဂကောံဒေသဖါလိန်(ယာယဳ) သ္ပသ္ကိုပ်သ္ကတုဲ ကၠောန်ဗဒှ်ဏါ သ္ဘၚ်အသေဟာန် ဖျေံဘာသၠုၚ်လညာတ်ပရေၚ်ဍုၚ်ကွာန်တ္ၚဲဇမၠေံ ပ္ဍဲစၟတ်စၟတ် ၁၉ ဂိတုဂျာန်နာဝါရဳ သၞာံ ၂၀၁၄ ဒၞာဲ ဘာမန်ရမညိကါယ ကဠၚ်တွဵုရး Selangor ကၟိန်ဍုၚ်မလေဝ်ယှာရ။
နာဲဝိဉာဏ် (နူဂကောံကွာန်သၞေဟ်ဇၞူ) ဂှ်ရေၚ်တၠုၚ်ဏါ လျိုၚ်အသေဟာန်တုဲ
ကျာ်ဇၞော်ဘာမန်ကဠၚ် တၠဂုဏ် ဝိရိယ၊ ဥက္ကဌ ဂကောံပံၚ်ကောံမန်မလေဝ်ယှာ နာဲအကးပေၚ်၊ နာယက ဂကောံမန်မလေဝ်ယှာ နာဲသာၚ်ဝဏ္ဏ၊ ဒုဥက္ကဌ မန်မလေဝ်ယှာ နာဲဥက္ကာ အ္စာဘာပရေၚ်ဍုၚ်ကွာန်နာဲအီဆာဲတအ် ရေၚ်တၠုၚ်ဏါဂကောံသဘာပတိရ။
   သဝ်တ္ၚဲ ၄း ၁၅ နာဍဳဂှ် စပံက်ဏါအသေဟာန်တုဲ ကျာ်ဇၞော် ကဠၚ်ဟီုမြော်ဂလာန်ကဵုသြဝါဒရ။ တုဲမ္ဂးဥက္ကဌ (MMA) နာဲအကးပေၚ် ဟီုဂလာန်ကဵုဇြဟတ် ညးက္ဍိုပ်ဂကောံဒေသဖါလိန် (ယာယဳ) နာဲဓမ္မ ဟီုဂလာန်မိပ်စိုတ် တုဲမ္ဂး ဒုဥက္ကဌ (MMA) နာဲဥက္ကာ ဟီုဂလာန်ဂှ် ပိုဲမၞိဟ်တအ်သီုဖအိုတ်ဂှ် ဒဒှ်ရဇကုစာ်စ္ဍးအာ နူပရေၚ်ဍုၚ်ကွာန်ဟွံဂွံဂှ် လၟုဟ်မ္ဂးဂွံတီအာ ပရေၚ်ကေတ်ဗၠးၜးဂကူ ပရေၚ်ကေတ်ဍုၚ်မန် ဟီုဏါဗက်ဟွံဂတာပ်ဂှ် ဒဒှ်ရ ညးတအ်ကေတ်ဒၟံၚ် သွက်ပိုဲပါကီုဏေါၚ် က္ဍိုပ်သ္ကိုပ်တအ်ကၠောန်ရေၚ်တၠုၚ်ဒၟံၚ်ဂှ်သွက်အဲလေဝ် ပါလုပ်ကီုရောၚ်ဂှ် နူဘာသၠုၚ်လညာတ် ဏံမွဲက္ဆံၚ် တီကၠိုဟ်ရောၚ် ရဴဝွံဂပဝ်ထေက်ကဵုဒးသ္ပစၟတ်သမ္တီရ။
တုဲမ္ဂးဥက္ကဌဂကောံဟံၚ်ပြာ်မန် နာဲသာဝဏ္ဏ ဟီုဂလာန်ကဵုဇြဟတ်ဗွဲတၟေၚ်သီုသောၚ်ကလးဏါ ပရေၚ်စပ်ကဵုတ္ၚဲ ကောန်ဂကူမန်ကီု သၟတ်မန်ညံၚ်ဂွံတီကေတ်ဒၞာဲ ပ္ဍဲပရေၚ်ဂကူဂၠိုၚ်ၚ် ဒၞာဲညးဇၞော်ဇၞော်တအ်ပၠမံၚ်တရဴဂှ် သၟတ်တအ် ညံၚ်ဂွံထပ်စုတ်အဇာမာန် ရဴဝွံ ကဵုဇြဟတ်ဂှ်ဂွံဆဵုကေတ်ရ။
ဆက်တုဲ ဇိုန်ဏှၚ်ပအပ်ပြာပ်ကဵူ ကွးဘာမတိုန်စိုပ်လဝ်ဗွဲမအံၚ်ဇၞးတအ် နကဵူလိက်စၟတ်သမ္တီဖျေံဘာရ။ စၞးအ္စာဘာ အ္စာပရေၚ်ဍုၚ်ကွာန် နာဲရာမညအီဆာဲ ဟီုဂလာန် ကဵုဏါပရၚ်တဲ ပရေၚ်ဘဝဂွံဇၞော်မောဝ်တဴတက် သီုစပ်ကဵု သ္ဂောံဒက်ပတန်ကၟိန်ဍုၚ်ဗၠးၜးမန်မွဲရ။ စၞးကွးဘာမွဲတၠ နူဂကောံကွာန်သၞေဟ်ဇၞူ နာဲညာဏ်သၠဲ ဟီုဂလာန်မိပ်စိုတ် လ္ပာ်ကွာန်ဒူရာဂှ် နာဲဝၚ်ဆာန် ဟီုဂလာန်မိပ်စိုတ်တၚ်ဂုဏ်ကုအ္စာဘာတအ်ရ။ တုဲမ္ဂးညးအုပ်ကါဂကောံပံၚ်ကောံ မန်မလေဝ်ယှာ နာဲဂံၚ်သ္ကာ ဟီုဂလာန်အုပ်ကၠေံနိဂီုတုဲ စိုပ်သဝ်တ္ၚဲ ၅းဝ၇ နာဍဳဂှ် အုပ်ကၠေံအသေဟာန် နကဵုဒွက်ကောန်ဂကူရ။
ဘာသၠုၚ်လညာတ်ပရေၚ်ဍုၚ်ကွာန်တ္ၚဲဇမၠေံဝွံ ပံက်ကၠုၚ်နူစၟတ်တ္ၚဲ ၁၁/၁/၂၀၁၄ စဵုကဵုစိုပ် ၁၉/၁/၂၀၁၄ မွဲသတ္တဟ ပွိုၚ်(၂) တ္ၚဲတုဲ ဖအိုတ်ဂှ် ပွိုၚ်(၄) တ္ၚဲ(၄)ဗတမ်တုဲ နာဲရာမညအီဆာဲဂှ် သဳကၠဳကဵုလညာတ်စပ်ကဵု ဝၚ်ပၠန်ဂတမန် ဗွဲခၞန်၊ ဝေါဟာရပရၚ်ဍုၚ်ကွာန်မန် နာဲဂံၚ်သ္ကာဂှ် သဳကၠဳဏါ သၞောဝ်ဥပဒေသၞာံ ၂၀၀၈ တုဲ ကွးဘာတိုန်စိုပ်ကတ် လ္ၚတ် ဗၞတ် (၁၅) တၠပြၚ်ၚ်တိုန်စိုပ်လဝ်ရောၚ် ဂွံတီကေတ်ရ။