သ္ဘၚ်သ္ပထပိုဲသာမဏဳ ကွးဘာဟံၚ်ပြာ်မန် ဍုၚ်မလေဝ်သျှာ ကၠောန်ဗဒှ်ပ္ဍဲဘာပူဒူ လ္တူဍုၚ်ကွာလာလာမ်ပူ

     ပ္ဍဲစၟတ်တ္ၚဲ ၂၉ ဂိတုဒဳဇြေမ်ဗါ သၞာံ ၂၀၁၂ ဂှ် ဂကောံဟံၚ်ပြာ်မန်ဍုၚ်မလေဝ်သျှာ သ္ပသ္ကိုပ်သ္ကတုဲ ကၠောန်သ္ပမ္ၚဵုသ္ပထပိုဲ သာမဏဳ ပ္ဍဲဘာမန်ရာမည နိကာယ ပူဒူ မၞုံလ္တူဍုၚ်ကွာလာလာမ်ပူ ကၟိန်ဍုၚ်မလေဝ်သျှာရ။
အစဳဇန်မ္ၚဵုသ္ပထပိုဲသာမဏဳဝွံ နကဵုအခိုက်ယေန်သၞာၚ်ပြဝေဏဳမန် ကၠောန်ဗဒှ်ဏါတုဲ ကွးဘာမကတ်ဗ္တောန်ပညာ ပ္ဍဲသွာၚ်ပရေၚ်ပညာဂကောံဟံၚ်ပြာ်မန် ဗၞတ်(၁၅)တၠ သ္ပထပိုဲသာမဏဳရ။
“အစဳဇန်ဏံ ဂကောံဟံၚ်ပြာ်မန်ဂှ် သ္ပတိုၚ်ခဳတုဲသီုမိမကွးဘာတအ် သီုကမ္မတဳဘာပူဒူ ပံၚ်ကောံသ္ပလဝ်ဒါယကာ ဏေါၚ်” ရဴဝွံညးတာလျိုၚ်ဂကောံဟံၚ်ပြာ်မန် ဍုၚ်မလေဝ်သျှာနာဲဝၚ်တၟးဟီုရ။
ပ္ဍဲအစဳဇန်ကဝါ်ထပိုဲဂှ်လေဝ် ကၠောန်ဏါ အတိုၚ်အခိုက်ကၞာမန် ဗီုပ္ဍဲဍုၚ်ရာမညတေံကီု သီုသၟတ်ဝုတ်ဗၠာဲတအ် ယိုက် ပ္ကဴသဴမြမောဝ်တုဲ ဂေတ်ကွာ်အာနူပူဒူပလာဇြာ စဵုကဵုစိုပ်ဘာပူဒူတေံနကဵုကယျိုၚ်ယေန်သၞာၚ်မန်ဂှ် ဂွံဆဵုကေတ်ရ။
မန်မလေဝ်သျှာတအ် ရန်တၟံကဵု မဂ်ဖဵုနိဗ္ဗာန်ကၠောန်သ္ပကုသဵု သ္ပဒါယကာ ဗီုဏံဂွံဆဵုကေတ်လ္တူဍုၚ်မလေဝ်သျှာဂှ် ဒှ်တၟေၚ်မွဲကီုရောၚ်။
ပ္ဍဲအစဳဇန်ဏံ ပုရိဿတ်ဒါယကာ ပူဂဵု သပ္ပုရိုဟ် ဗၞတ်(၈၀)တၠပြၚ်ၚ် တိုန်စိုပ်လဝ်ရောၚ်။
ပ္ဍဲစၟတ်တ္ၚဲ ၂၈ ဂိတုဒဳဇြေမ်ဗါ ၂၀၁၂ ဂှ် ကၠောန်ၜိုတ်ကေၚ်ကာ သီုကဝါ်ထပိုဲတုဲ ပ္ဍဲစၟတ်တ္ၚဲ ၂၉ ဂိတုဒဳဇြေမ်ဗါ ၂၀၁၂ဂှ် ပါ်ပရအ်ကုသဵု ဇိုန်ပိုန်စရိုဟ်ဍာ်ညဳညဳသာသာ ဂြုဂြုဂြီုဂြီု ရောၚ် ဂွံတီကေတ်ရ။