မန်မလေဝ်ယှာတအ်ကၠောန်ဗဒှ်ဏါ တ္ၚဲသၟတ်မန် အလန်ဒုတိယ လ္တူဍုၚ်ဇၞော်ကွာလာလာမ်ပူ

  အသေဟာန် “တ္ၚဲသၟတ်မန်” အလန်ဒုတိယဂှ် ဂကောံသၟတ်မန် မလေဝ်ယှာကေုာံ ပံၚ်တောဲကဵု သၟတ်ညးဆာန်ဂကူ စိုပ်မလေဝ်ယှာတုဲ ကၠောန်ဗဒှ်ဏါ ပ္ဍဲစၟတ်တ္ၚဲ ၂၈ ဂိတုဒဳဇြေမ်ဗါ သၞာံ ၂၀၁၃ ဒၞာဲၝောံခန် Chinese Assembly Hall လ္တူဍုၚ်ဇၞော် ကွာလာလာမ်ပူ ကၟိန်ဍုၚ်မလေဝ်ယှာရ။
နာဲလွဳမာန်(ဂအုပ်ရုၚ် ဂကောံပံၚ်ကောံ မန်မလေဝ်ယှာ)ရေၚ်တၠုၚ်ဏါ နဒဒှ် လျိုၚ်အသေဟာန် တုဲ တၠဂုဏ်အ္စာ ကောဝိဒ(နွံပိုန်ဘာမန် KL)၊ နာဲသဵုညောအ်၊ နာဲသာၚ်ဝဏ္ဏ၊ နာဲရာမညအီဆာဲ၊ မိနန္ဒာတအ် ရေၚ်တၠုၚ်ဏါ ဂကောံသဘာပတိရ။

ပထမကိုပ်ကၠာ နူဂယး ၁၁းဝ၆ နာဍဳဂှ် စပ္တံဏါ အသေဟာန်တုဲ ဥက္ကဌကမ္မတဳကၠောန်ဗဒှ် တ္ၚဲသၟတ်မန် အလန်ဒုတိယ နာဲကောန်တၠမန် ဟီုဂလာန်ပံက်အသေဟာန်၊ တၠဂုဏ်အ္စာကောဝိဒ ဟီုမြော်ဂလာန်သြဝါဒ ကုသၟတ်မန်တအ် “သၟတ်မန်တ္ၚဲဏံ လ္ပကဵုဒှ်ဍိက်ဘဝဇကုညိ၊ သၟတ်တ္ၚဲဏံ ကဵုဒှ်က္ဍိ္ဍုပ်သ္ကိုပ်တ္ၚဲယးညိ” “သၟတ်မန်တအ် လ္ပအိုတ်မံၚ်အခိၚ် ပ္ဍဲဂဥုဲဝိဝိၚ်ညိ။ လ္ပဖအိုတ်ဝေၚ်အခိၚ် ပ္ဍဲပဠၚ်အရက်ညိ” ရဴဝွံ ကဵုဏါသြဝါဒရ။
အ္စာဘာပရေၚ်ဍုၚ်ကွာန် MYA နာဲရာမညအီဆာဲလေဝ် သောၚ်ကလးဝၚ် ဗီုတ္ၚဲသၟတ်မန် ဗီုကတဵုဒှ်ကၠုၚ် ကေုာံ ပရေၚ်ချဳဓရာၚ် သၟတ်ဂၠးကဝ်၊ သၟတ်မန်ပ္ဍဲဍုၚ်၊ သၚ်သၟတ်တအ် ဗွဲမသၠဲလးရ။ တုဲမ္ဂး နာဲသာၚ်ဝဏ္ဏ ဟီုဂလာန်၊ ညးစၞးသၟတ်ညးဗြဴမွဲတၠ၊ မိလွဳအိန်ရဳဟီုဂလာန်၊ နာဲထဝ်(ကွာန်တံၚ်ပိုအ်) ဗှ်လိက်လလောၚ်တြး MYF နာဲဒေသ (ညးအုပ်ကာ ကမ္မတဳကၠောန်ဗဒှ် တ္ၚဲသၟတ်မန် အလန်ဒုတိယ) ဗှ်လိက်လလောၚ်တြး MYA မလေဝ်ယှာရ။
“သၟတ်မန် ကေုာံ ညးဍုၚ်ကွာန်မန် ညးမဆာန်ဂကူမန်တအ် သၞောဝ်ဥပဒေသ္ဇိုၚ်ဒက်ပ္တန်ကၟိန်ဍုၚ် ၂၀၀၈ ဂှ် ကြက်ရှ်သာပိုဲလေဝ်ဟၟဲ ဒှ်မံၚ်သွက်ရဲဒပ်ပၞာန်ဗၟာတအ် အဝဵုဂွံတန်ကြန်အာ နကဵုဗဗွဲလုပ်သၞောဝ်ရောၚ်။ ဟိုတ်ဂှ်ရ အလုံကၟိန်ဍုၚ်ဗၟာမွဲ ရမျာၚ်ပဠေဝ်သၞောဝ် ၂၀၀၈ ဗြုတမ္ညဝ်ဒၟံၚ်ဒှ်တုဲ နကဵုသၟတ်မန်ပိုဲ သီုဟွံဒုၚ်တဲသၞောဝ်ဏံ ပရေၚ်ဂွံပဠေဝ်လေဝ် ဟွံမိက်ချပ် ဆန္ဒပိုဲ ဒးက္လေၚ်ချူတၟိရောၚ်” ရဴဝွံ ထၟံက်ထ္ၜးလဝ်ပ္ဍဲလိက်လလောၚ်တြး MYA မလေဝ်ယှာရ။
ဆက်တုဲ ပ္ဍဲအစဳဇန်ရမျာၚ်သၟတ်၊ ရမျာၚ်ညးတိုန်စိုပ်ဂမၠိုၚ်ဂှ် နာဲကဏ္ဍ၊ နာဲကမ်ဆာဲ၊ နာဲဉာဏ်သၠဲတအ် ဗွဲလၟေၚ်ဟီုပ္တိုန်ထ္ၜးလညာတ်ဇကု စပ်ကဵုတ္ၚဲသၟတ်မန်တုဲ နာဲဆာန်ဠာန် သောၚ်ကလးစရၚ်သြန်လုပ်/တိတ် ဗွဲသရောပ်ရ။ တုဲမ္ဂး နာဲဂံၚ်သ္ကာ(ညးအုပ်ကာ ဂကောံပံၚ်ကောံမန်မလေဝ်ယှာ) ဟီုဂလာန်အုပ်ကၠေံနိဂီု၊ သီုအုပ်ကၠေံအသေဟာန် နကဵုဒွက်ကောန်ဂကူရ။
အသေဟာန်ဝွံ ဗွဲတၟေၚ် ဂကောံကွးဘာ ရုၚ်ဟံၚ်ဟ်မြန်တအ် လှ်ေထ္ၜးစဳပျးဏါ အခိုက်ယေန်သၞာၚ်မန်ကီု ကၟုဲတၟေၚ် ဟံၚ်ဆာန်၊ အဂ္ဂ တအ်ပါလုပ်သီုတိၚ်တက် ဒယှ်ေလဟိၚ်ဏါဂှ်ကီု သၟာဒယှ်ေဒွက်မန်စိုပ်မလေဝ်ယှာ၊ သတာ၊ သဇ္ဇ၊ သဟ၊ ဆာန်ဠာန်၊ မိကှ်ေသြန်၊ မိသ္ဇၚ်မန် ကေုာံ အကးပေၚ်တအ်လေဝ် ပါလုပ်လဟိၚ်ကဵုပုရိသာတ်တအ်ရ။
အသေဟာန်ဝွံ သဝ်တ္ၚဲ ၄း၂၀ နာဍဳဂှ် တုဲဒှ်အာဗွဲမအံၚ်ဇၞးတုဲ သၟတ်မန်ကေုာံ ညးဆာန်ဂကူမန် ဗၞတ်(၁၂၀)တၠပြၚ်ၚ် တိုန်စိုပ်လဝ်ရောၚ် ဂွံတီကေတ်ရ။