သွက်ဘဝညးဗြဴမန်တအ် ဂွံသၠုၚ်မာန်ဂှ် ဆအယာံမာတ် ပညာဍုန်တိုပ်၊ ပညာကံက်ချေဝ်ဓဝ် ဟွံဂွံပုဟ် ဒးသၠုၚ်ပ္တိုန်စရာဲဍာ်ဒကေဝ် ညးဗြဴတအ် နကဵု ကွတ်ပညာ ဂတာပ်ခေတ်နာနာဂမၠိုၚ်ရောၚ်”

ရဴဝွံကျာ်ဇၞော်ဘာသၞေဟ်ဂၠုၚ်(ဟူတာန်မဳလေန်တာန်) တၠဂုဏ်ထာဝရ ဟီုဂးဏါ ပ္ဍဲတ္ၚဲညးဗြဴမန် မရနုက်ကဵု(၁၀)ဝါ မကၠောန်ဗဒှ်လဝ် လ္တူ ဍုၚ်ကွာလာလာမ်ပူ ကၟိန်ဍုၚ်မလေဝ်သျှာရ။
အသေဟာန်တ္ၚဲညးဗြဴမန်ဝွံ ဂကောံပံၚ်ကောံမန်မလေဝ်သျှာ(ယာယဳ)တအ် သ္ပက္ဍိုပ်သ္ကိုပ်သ္ကတုဲ ကၠောန်ဗဒှ်ဏါ ပ္ဍဲစၟတ်တ္ၚဲ(၂၃) ဂိတုမာတ် သၞာံ ၂၀၁၃ (ဂိတုဖဝ်ရဂိုန် (၁၂မံက် ၁၃၇၄သၞာံ) ဒၞာဲၝောံခန် (Chinese Assembly Hall) ရ။
အသေဟာန်ဝွံ နူဂယး (၁၁းဝဝ) စပံက်ဏါအသေဟာန်တုဲ နာဲဂံၚ်သ္ကာ(MYA)ကေုာံ မိခါဲထဝ် တအ်ရေၚ် တၠုၚ်ဏါ လျိုၚ်အသေဟာန်ရ။
ပထမကိုပ်ကၠာ ကျာ်ဇၞော်အ္စာ သူရိယ (နွံပိုန်ဘာမန် K.L) ပံက်ခေပ်ဏါ ဇုက်ဇၟန်ဗၠဲပံက်အသေဟာန်တုဲ ဥက္ကဌ ဂကောံဟံၚ်ပြာ်ညးဗြဴမန် ဍုၚ်မလေဝ်သျှာ မိမျေတ်တ်ၚိုဲ ဟီုဗ္ကန်ဂလာန်ရ။
တုဲမ္ဂးတၠဂုဏ် ထာဝရ(နွံပိုန်ဘာမန် ဟူတာန်မဳလေန်တာန်) ဟီုကဵုသြဝါဒ ကဵုဏါလညာတ်သွက်ဘဝညးဗြဴတအ် ဂွံသၠုၚ်တဴတက်ကီုတုဲ မာံဆာန်ဠာန် ကေုာံ မိသ္ဇၚ်မန် ဗှ်ထ္ၜးလဴသောၚ်ကလး ပရူဝၚ်ဗီုတ္ၚဲညးဗြဴမန် ဂွံကတဵုဒှ်ကၠုၚ် ကေုာံ ဝၚ်ဨကရာဇ်ဗြဴ မိစဴဗုရ။ ဆက်တုဲပၠန်ဂှ် နာဲဝၚ်မန်ကေုာံ မိသိုက်ရတ် ဗှ်လိက်လလောၚ်တြး ဂကောံဟံၚ်ပြာ်ညးဗြဴမန် ပ္တိတ်လဝ် (သီုဘာသာမန် သီုဘာသာအၚ်္ဂလိက်)ဂှ်ရ။
စၞးဂကောံပံၚ်ကောံမန်မလေဝ်သျှာ(ယာယဳ) နာဲဥက္ကာ (ဥက္ကဌ M.Y.A.L.A) ဟီုဂလာန်အုပ်ကၠေံနိဂီုရ။
အစဳဇန်တၟေၚ် ဗွဲမဂၠိုၚ်ဂှ် ကလုတ်အမာတ်ညးဗြဴ(နူရုၚ်ကလုတ် ဂျာမနဳ) မွဲတၠဟီုဂလာန်ကဵုဇြဟတ် ညးစၞးနူရုၚ် (UNHCR) ညးဗြဴမၞုံယၟု “ဂျောန်အာန်” ဟီုဂလာန်သွက်ဂွံရီုဗၚ် ညးဗြဴမန် စိုပ်မလေဝ်သျှာ ဂကောံညးဗြဴ အၚ်္ဂလိက် (U.K)ၜါတၠလေဝ် ဟီုဂလာန်လဴထ္ၜးပရူ ရုန်ဂစာန်ညးဗြဴဂၠးကဝ်ရ။
အသေဟာန်တ္ၚဲညးဗြဴမန် ဍုၚ်မလေဝ်သျှာဝွံ သီုသၞာံဏံမ္ဂး ကၠောန်ဗဒှ်ဂွံဗၞတ်(၃)သၞာံဒှ်တုဲ အသေဟာန်တ္ၚဲဏံ ညးဆာန်ဂကူမန် ကေုာံ ညးဗြဴမန်တအ် ဗၞတ်(၅၀)တၠပြၚ်တိုန်စိုပ်လဝ်ရ။
မွဲဒမြိပ်အသေဟာန် အကြာညးတာလျိုၚ်မွဲကဵုမွဲတၠ ဟီုဂလာန်ဂှ် စုတ်ဏါ မပ္တံကဵု လှ်ေဒယှ်ေ “အာဲကၟာဲယေန်သၞာၚ် မန်” ဒိၚ်သၟိၚ်ၜိုပ်ထဝ် ဒွက်နာဍူအတး ဒွက်ကြက်စၠန် တုဲမ္ဂး ဂကောံသၟတ်မန်တအ် လဝေၚ်ထ္ၜးကဵုဏါပၠဇာတ် ဂှ်လေဝ် ဗွဲတၟေၚ်ဂွံဆဵုရ။
သ္ကိုပ်ဂဳတ နာဲအာဲမန် က္ဍိုက်က္ဍိုပ်တုဲ ဂကောံသရာဲဂဳတ တအ်လေဝ် တိၚ်တိုက်ဒယှ်ေထ္ၜးကဵု ပုရိသာတ်တအ် ဂွံလဟိၚ်စိုတ်မြဟ်စိုတ်ရ။
အသေဟာန်ဝွံ လဒေါဝ်တ္ၚဲ (၁း၅၁) ဂှ် ရုပ်ကၠေံဏါဗွဲမအံၚ်ဇၞးရ။ အသေဟာန် “တ္ၚဲညးဗြဴမန်”ဝွံ “သၟတ်ညးဗြဴမန်” ညးဗြဴသၟာကမၠောန်မန်တအ် တိုန်စိုပ်လၟိဟ် ဗွဲမအောန်တုဲ ဟွံကတိုၚ်ကၟဟ်စကွေံကွေံ ဂှ်လေဝ် ဂွံဆဵု” ရဴဝွံ သၟတ် (MYA) မွဲတၠဟီုကရဳကရောတ်ဏါရ။
ဗီုလဵုဒှ်ဒှ် ဗီုတၠဂုဏ်ထာဝရ ကဵုဏါဇြဟတ်ဂှ် နဇိုၚ်နတဲ ဒးဂိုတ်ဂ္စာန်ဂှ် ဒှ်တာလျိုၚ် ညးဗြဴမန်တအ် သီုဖအိုတ်ရ။