ကောံဓရီုဝွံ ပ္ဍဲကဵုစၟတ်တ္ၚဲ ၂၂ ဂိတု သာပ်တေမ်ဗာ သၞာံ ၂၀၁၃ ဂှ် ကၠောန်သ္ပဏာ ပ္ဍဲကဵုရုၚ်ဂကောံပံၚ် ကောံမန် မလေဝ်ယှာရောၚ် သ္ဂောံတီကေတ်ရ၊
နာဲလွဳမာန် ဂအုပ်ရုၚ် ဂကောံပံၚ်ကောံမန်မလေဝ်ယှာ ရေၚ်တၠုၚ်ဏာ နဒဒှ် လျိုၚ်အခန်ကၞာတုဲ စပံက်ဏာအသေ ဟာန် ပ္ဍဲကဵုအခိၚ် ၁ နာဍဳကဵု ၁၃ မိနေတ်ဂှ်ကီုရ၊
“သၟတ်ဟီုဂှ် ဒှ်မၞိဟ်မၚ်မွဲတၞောဝ်ဒတောဝ်၊ ဒှ်မၞိဟ်မၚ်မွဲဂကူဘာသာ သာသနာတုဲ ဒၞာဲၜတ်ကီုလဝ် ကြံၚ်ကီုလဝ်ဂှ် ဒးဗပေၚ်ဂှ်လေဝ် ဒှ်တာလျိုၚ်သၟတ်တံရ” “ပရေၚ်ဂကူဒၞာဲလဵုဟွံဍိုက်ပေၚ် ဒးဗပေၚ်ကဵုဂှ်လေဝ် ဒှ်တာလျိုၚ်သၟတ် တံရ” “သၟတ်မန်တံ ညံၚ်ဂွံဖဵုကဵုဂကူ ညံၚ်ဟွံဂွံဒှ် အန္တရာယ်ကဵုဂကူဂှ် ဒးဂစာန်အာရောၚ်” သာ်ဝွံကျာ်ဇၞော်ထာဝရ မၞုံပိုန်ဘာသၞေဟ်ဂၠုၚ် ဟီုမြော်ဏာဂလာန် ကဵုဏာသြဝါဒရ၊
စၞးဥက္ကဌ ဂကောံပံၚ်ကောံမန်မလေဝ်ယှာဂှ် ဒုဥက္ကဌ နာဲဥက္ကာဟီုဏာဂလာန် ကဵုဏာဇြဟတ် သွက်ဂွံကၠောန်ဗဒှ် တ္ၚဲသၟတ်မန်တုဲ စၞးဂကောံဟံၚ်ပြာ်မန်ဂှ် ဥက္ကဌ နာဲသာၚ်ဝဏ္ဏဟီုဏာဂလာန် “သၟတ်ဂှ် ဒှ်က္ဍိုပ်သ္ကိုပ်အနာဂတ် ရဟီုတှ်ေ ကာလရုဲစှ် တာလျိုၚ်မ္ဂး လုပ်ကေတ်ဂံၚ်ၚ်ညိ” “နူလၟုဟ်ပိုဲဟွံဂံၚ်ကေတ်တာလျိုၚ်မ္ဂး ဂတနူဏံ တာ လျိုၚ်တံဂှ် သ္ၚောဲအာနူကဵုဇကုမာန်ရောၚ်” သာ်ဝွံဟီုဏာရ၊
အသေဟာန်ဝွံ ရုပ်သီညးတာလျိုၚ် ကမ္မတဳကၠောန်ဗဒှ်တ္ၚဲသၟတ်မန် အလန်ပထမဂမၠိုၚ်တုဲ ကလေၚ်ရုဲစှ်ဏာ ညး တာလျိုၚ် သွက်ဂွံကၠောန်ဗဒှ် တ္ၚဲသၟတ်မန်အလန်ဒုတိယကီုရ၊
ပ္ဍဲကဵုအစဳဇန်ရုဲစှ်ဏာ ညးတာလျိုၚ်ဂှ် နာဲကောန်တၠမန် (ဥက္ကဌ)၊ နာဲဒေသ (ညးအုပ်ကာ)၊ နာဲရတ်နန် (ဖက်ဆော ညးအုပ်ကာ)၊ နာဲဆာန်ဠာန် (လျိုၚ်ဘဏ္ဍာ)၊ နာဲဝိညာဏ် (လျိုၚ်စၟဳစၟတ်စရၚ်)၊ နာဲဇာတာ၊ နာဲလွဳမာန်၊ မိဝိသာခါ၊ နာဲထဝ်တံဂှ် ဒှ်ညးက္ဍိုက်ပ်ကမ္မတဳစန်ဒက်တုဲ မၞိဟ်သှ်ေသၟေဟ်နူကဵု ညးတာလျိုၚ် ညးတိုန်စိုပ်တံ သီုဖအိုတ်ဂှ် ပါလုပ်ကဵုအာဇြဟတ် ဘိုၚ်စန်ဒက်အာ သွက်ဂွံကၠောန်ဗဒှ် တ္ၚဲသၟတ်မန် အလန်ဒုတိယရောၚ် ကလိဂွံတၚ် တုပ်စိုတ်သာ်ဝွံရ၊
ပ္ဍဲကဏ္ဍကာနာနာဂှ် နာဲအကးပေၚ် (ဥက္ကဌ ဂကောံပံၚ်ကောံမန်မလေဝ်ယှာ) ဒုၚ်တိုၚ်သဳကၠဳ ကဵုကေတ်ကသပ် ဂမၠိုၚ်တုဲ ပရေၚ်ကမၠောန်လ္ၚဵုတအ်ဂှ် ကြပ်တေံမှ ဆက်ချပ်အာပၠန်ရောၚ် ဂွံလညာတ်သာ်ဝွံရ၊
သွက်ဂွံပတိတ်ပဠောံဂှ် ပအပ်ကဵုဂကောံသၟတ်တုဲ ပရေၚ်ကမၠောန်သွာၚ်တၞဟ်ဟ်တံဂှ် ကမ္မတဳကဵု ဂကောံပံၚ်ကောံ မန်မလေဝ်ယှာတံ က္ဍိုက်အာက္ဍိုပ်ရောၚ် သာ်ဝွံနူကဵုကောံဓရီုဖျေံဏာ သ္ဂုတ်သွာတ်ရ၊
နူကဵုစကောံဓရီုဂှ် ရှ်ေသှ်ေဏာ က္ဍိုပ်သ္ကိုပ်ကေုာံ သ္ဂံၚ်ဆာန်ဂကူ ပြဟ်လလုဲအာဂမၠိုၚ်တုဲ ပ္ဍဲကဵုအခိၚ်အကြာ ၃ နာဍဳဂှ် ရှ်ေကၠေံကောံဓရီု နကဵုဒွက်ကောန်ဂကူရ၊
တ္ၚဲသၟတ်မန်ဝွံ ဂိတုသာပ်တေမ်ဗာ သၞာံ ၂၀၁၂ ဂှ် ကၠောန်သ္ပကၠုၚ် အလန်ပထမတုဲ သၞာံဏံမ္ဂး ဒှ်အလန်ဒုတိယရ၊
တ္ၚဲသၟတ်မန်ဝွံ ဒှ်တ္ၚဲသၟတ်တံ စချဳဒရာၚ်ကၠုၚ် ပရေၚ်ဂကူ ပ္ဍဲကဵုစၟတ်တ္ၚဲ ၂၈ ဂိတု ဒဳဇြေမ်ဗာ သၞာံ ၁၉၄၆ တေံတုဲ သၟတ်ခေတ်လၟုဟ်တံ သ္ပစၟတ်သမ္တီဏာ တ္ၚဲသၟတ်မန် ပ္ဍဲကဵုပေဲါသၠာဲဂတးလညာတ် အလန်တတိယ မကၠောန်သ္ပ ပ္ဍဲကွာန်ဝါဗိုၚ် ပ္ဍဲသၞာံ ၂၀၁၂ တေံတုဲ စကၠောန်သ္ပကၠုၚ်တ္ၚဲသၟတ်မန်ရ၊
0 comments :
Post a Comment