ကောံဓရီုဏံ ဗော်ပရေၚ်ဍုၚ်ကွာန်မန်ဂမၠိုၚ်၊ ဂကောံမဟာဇန်ဂမၠိုၚ်၊ မန်ဍုၚ်သၟာၚ်ဂမၠိုၚ်ပံၚ်ကောံတုဲ ကၠောန်ဂှ် အလဵုသဳဍုၚ်တံ ကဵုအခေါၚ်တုဲ ကၠောန်သ္ပအာဗဗွဲဓဝ်ရောၚ် သာ်ဝွံ ဒုဥက္ကဌ ဗော်ဒဳမဝ်ကရေသဳမန် နာဲတေန်အံၚ်ဟီုရ၊
“ညးတံဒုၚ်တဲ၊ ဘိက်ပၟိၚ်အာ ဝန်ဇၞော်မလုပ်အဝေါၚ် အလဵုသဳကၟိန်ဍုန်တံရောၚ်၊ ဝန်ဇၞော်တွဵုရးတံလေဝ်ဘိက်အာဏေါၚ်၊ ဝန်ဇၞော်ဂမၠိုၚ်လေဝ်ဘိက်အာဏောၚ်၊ အလဵုသဳကၟိန်ဍုၚ်ဒုၚ်တဲတှ်ေ ဒှ်ဗဗွဲဓဝ်ဏောၚ် ပိုဲတံစၟတ်သ္တီလဝ်ရ၊
ကၠောန်သ္ပအာ ပ္ဍဲၝောံခန်တွဵုရး မၞုံလ္တူဍုၚ်မတ်မလီု ပ္ဍဲကဵုစၟတ်တ္ၚဲ ၂၈ စဵုစိုပ် စၟတ်တ္ၚဲ ၃၀ ပ္ဍဲဂိတု သာပ်တေမ်ဗာ သၞာံ ၂၀၁၃ ဏံရ၊ နူကဵုပရေၚ်ကောံဓရီုဇၞော်ဏံ ဗော်မန်တံဂွံပံၚ်မာန်လေဝ် ပိုဲဂ္စာန်အာရောၚ်၊ သာ်ဝွံ နာဲတေန်အံၚ်ဟီုရ၊
ဆေၚ်စပ်ကဵုကောံဓရီုဇၞော်ပရေၚ်ဂကူမန်ဏံတုဲ ဥက္ကဌကမ္မတဳကၠောန်ဗဒှ် ကောံဓရီုဇၞော်ပရေၚ်ဂကူမန် နာဲကျဳဝေန် (ဟံၚ်ဍုၚ်) ဟီုသာ်ဏံရ၊
“ပ္ဍဲဍုၚ်တှ်ေ ဣဏံအလန်ကၠာအိုတ်ဟီုဂွံ၊ အလန်ဒုတိယတေံတှ်ေ ကၠောန်သ္ပအာ ပ္ဍဲဂိတု ဒဳဇြေန်ဗာတေံဏောၚ်၊ “ကၠောန်အာ Mon National Covention (သ္ဘၚ်သဳကၠဳကောန်ဂကူမန်) မွဲဏောၚ်၊ သွက်ဂှ်လေဝ်ပါ၊ မွဲပၠန်ဂှ်တှ်ေ အလုံဂကူမန် ညဳသၟဟ်တုဲ ညံၚ်ဂွံဒှ်ဇြဟတ်မွဲကီု၊ မွဲပၠန်ဂှ် တ္ၚဲဏံ ပ္ဍဲကဵုဍုၚ်ပိုဲ ထ္မံက်မံၚ်ရုပ်ရဴ ပရေၚ်ၜိုဟ်လလံဂှ် ဂကူမန်ပိုဲလေဝ် တုပ်သၟဟ်ကဵုကောန်ဍုၚ် အရၚ်တၞဟ်ဟ်ကီု အခန်ကဏ္ဍပိုဲပါလုပ်မာန်ကီု ပ္ဍဲကဏ္ဍတၞဟ်ဟ်ကီု၊ ပ္ဍဲကဵုပရေၚ်ဖောအ်ဗြေဝ်ကီု သွက်ဂွံဒက်ပ္တန်အာကီုရ”
ကၠောန်ကောံဓရီုတံဏံဂှ် စၟဳစလဝ် သွက်အရာဒက်ပ္တန်ပရေၚ်ၜိုဟ်လလံကဵု အခေါၚ်တုပ်သၟဟ်ကောန်ဍုၚ်အရၚ်တံလေဝ် ပါမံၚ်ကီု သာ်ဝွံ ဒံက်တာမေန်ကျဳဝေန်ဟီုရ၊
“ထ္မံက်အာရုပ်ရဴ ဓရ်ညဳသာသၟဟ်န်မာန်ဏောၚ် အဲစှ်ေစိုတ်၊ ပ္ဍဲကဵုအရာဒက်ပ္တန်ပရေၚ်ၜိုဟ်လလံ နကဵုဂကူမန်ပိုဲ ဂွံကဵုသ္ဂုတ် သွာတ် ဗီုဂကူတၞဟ်မာန်ကီု၊ ဂွံဒှ်မွဲရမျာၚ်ဗီုညးတၞဟ်ကီု ရန်တၟံလဝ်ရ၊ ကောန်ဍုၚ်အရၚ်တံဖအိုတ်ဂှ် အာတ်မံၚ်အခေါၚ်ကံကုသဵု ဇကုဇကုဂွံဖန်ဖက်ကေတ်မာန် နဒဒှ်တၚ်အဓိက အာတ်မိက်ကၠုၚ်မံၚ်ရသေၚ်ဟာ၊ ပရေၚ်ဏံဂှ် စဵုကဵုတ္ၚဲဏံ ထ္မံက်မံၚ်ရုပ်ရဴ ဟွံ မာန်ဏီဖိုဟ်၊ တော်ကဵုအကာဲရာ ပရေၚ်ဍုၚ်ကွာန်ပိုဲတ္ၚဲဏံတုဲ နကဵုဂကူပိုဲလေဝ် ဒးဂ္စာန်ပါလုပ်အာ ပ္ဍဲကရောံဏံကီုဏောၚ်”
ကောံဓရီုဏံဂှ် ဗော်ဍုၚ်မန်တၟိ၊ ဗော်ဒဳမဵုကရေဇြဳအလုံရးမန်၊ ဗော်ဒဳမဝ်ရေသဳမန်၊ ဂကောံသၟတ်၊ ဂကောံသၚ်၊ ဂကောံညးဗြဴ၊ ဂကောံပံၚ်ကောံမန်ဍုၚ်သၟာၚ်တံ ပၠတရဴတုဲကၠောန်ကၠုၚ်ဏောၚ်၊
စပ်ကဵုပရေၚ်ဗော် ပ္ဍဲဍုၚ်မန်ၜါဗော်ဂွံပံၚ်ဂှ် ဒုဥက္ကဌဗော်ဒဳမဝ်ကရေသဳမန် နာဲတေန်အံၚ် ဟီုတဴသာ်ဝွံရ၊ “ဂွံပံၚ်ဂှ် လညာတ်ဟွံ ကြပ်ဏီပုဟ် သ္ဇိုၚ်တုပ်သၟဟ်ဂှ်နွံ အတိုၚ်သၚ်တံပညဳလဝ်ဂှ် မွဲဂိတုမွဲဝါဆဵုမံၚ် သွက်ဂွံပံၚ်ကောံဂှ် ဒးဂၠာဲယၟုမွဲဏောၚ် ယၟုတၟိမွဲဟီု ဟဂှ် ၂၀၁၄ တေံအိုတ်ပံၚ်ဏောၚ်ဂှ် သီုၜါဗော် ဒုၚ်လဝ်တဲနွံ ဆဂးဂှ် သၚ်တံကဵုလညာတ်မွဲ ၂၀၁၄ တေံတှ်ေ လဇုဲအာဏောၚ် ဟိုတ်ဂှ်ရ ၂၀၁၃ ဂိတုဒဳဇြေန်ဗာဏံအိုတ် အစဳဇန်ပံၚ်ကောံဂှ် မိက်ဂွံကဵုကၠောန်ထောံ”
ကောံဓရီုဏံဂှ် အရာရာအလန် ကၠောန်သ္ပဒၟံၚ်ပ္ဍဲပယျဵုတုဲ လၟုဟ်မှဂွံကၠောန်ပ္ဍဲဍုၚ်အလန်ပထမရ၊ ပ္ဍဲကောံဓရီုဏံဂှ် နကဵုဗော် ဍုၚ်မန်တၟိ “ဒက်ပ္တန်အာပရေၚ်ၜိုဟ်ဟလံဍုၚ်ဍာ်ဇမၠိၚ်”၊ ဗော်ဒဳမဝ်ကရေသဳမန် “ဓဝ်ညဳသာပ္ဍဲဂကူမန်”၊ ဗော်ဒဳမဵုကရေဇြဳအလုံရး မန် “ပရေၚ်ၜိုဟ်လလုံကေုာံပရေၚ်ဖောအ်ဗြေဝ်ဍုၚ်”၊ ကမ္မတဳပံၚ်ကောံမန်ဍုၚ်သၟာၚ် “မဟာဗျူဟာဂကူမန်” သာ်ဝွံ ဗှ်အာလိက် စံၚ်ဂမၠိုၚ်ရောၚ်၊
ကောံဓရီုဝွံ ပၟိက်ဇၞော်သွက်ဂကူမန်ကီု၊ တုဲပၠန်အရာဂွံထ္မံက်အာရုပ်ရဴ ပရေၚ်ဆာန်ကၟိန် ကေုာံ ဓဝ်ညဳသာအကြာဂကူမန်ကီု၊ သ္ဂောံထ္မံက်အာရုပ်ရဴ ပရေၚ်ၜိုဟ်လလံကီု ရန်တၟံလဝ်ရောၚ် သာ်ဝွံ ဥက္ကဌကမ္မတဳကၠောန်ဗဒှ် ကောံဓရီုဇၞော်ပရေၚ်ဂကူမန် ဒံက်တာမေန်ကျဳဝေန်ဟီုရ၊
0 comments :
Post a Comment