ပ္ဍဲကဵုစၟတ်တ္ၚဲ ၁ ဂိတုသာပ်တေမ်ဗာ သၞာံ ၂၀၁၃ ဂှ် ကၠောန်သ္ပဏာ
သ္ပစၞးကဵုသ္ကုတ်ကေအေယ်ဏံတုဲ လၟိဟ်မၞိဟ် ၁၂ တၠ၊ စှ်ေအာကဵုဇြဟတ်ကု ပေဲါရုဲမာဲသ္ကုတ်တေံရ၊ စိုပ်အတေံဂှ် ပိုဲတံဖန်ဇန်ဖျေံကဵုဗီုပြၚ်ဖအိုတ်ရ၊ ပရေၚ်ကမၠောန်ဗီုကၠောန်လဝ် သ္ကုတ်ကေအေယ်ဏံကီု၊ ပရေၚ်သဳကၠဳအကြာဒေသၜါ သ္ဂောံပံၚ်ကၠောန်အာကီု သဳကၠဳဏာပ္ဍဲအစဳဇန်ဂမၠိုၚ်ရ၊
“သွက်ဂွံရီုဗၚ်အာဂကူမန် နကဵုဗီုပြၚ်စှ်ေစှ်ေဂှ် လၟုဟ်ကၠောန်ဗဒှ်ကၠုၚ် ဂကောံပံၚ်ကောံမန်မလေဝ်ယှာတုဲယျတှ်ေ နကဵုဂကူမန်တံလေဝ် ဂကောံပံၚ်ကောံမန်ဇကု သ္ဂောံအာဍာ်ဇမၠိၚ်မာန်ဂှ် တာလျိုၚ်နွံမံၚ်ကီုရောၚ် သာ်ဝွံဒုဥက္ကဌ နာဲဥက္ကာဟီုရ၊
“လၟုဟ်ရုၚ်ပိုဲဒှ်ယျတှ်ေ ပိုဲတံထ္ၜးဏာသက်သဳ ၜိုတ်လဵုဂကူမန်ပိုဲ ဆာန်ဂကူဟွံဆာန်ဂကူကီုရဂှ် ဥက္ကဌ ဂကောံပံၚ်ကောံမန်မလေဝ်ယှာ နာဲအကးပေၚ် ဟီုရ”
ပေဲါရုဲမာဲဝွံ ကျာ်ဇၞော်ထာဝရ ဘာသၞေဟ်ဂၠုၚ်ပံၚ်ဏာအသေဟာန် ဟီုဒၠောံဗ္တောန်ဏာ ပရေၚ်လောကဳလောကုတ္တဵုၜါပြကာ ဗွဲစုၚ်လေၚ်တုဲ သ္ၚဳဂၠိပ်ဖျေံဗီုပြၚ်ပရေၚ်သၞောဝ် ကေုာံ ကဵုတာလျိုၚ် သွက်ဂွံဓဇက်ဗပေၚ်သၞောဝ်ကီု၊ ဗ္တံဂှ်သီုကၠောန်သ္ပဏာ Workshop စပ်ကဵုပရေၚ်အာက္ဍိုပ်၊ ပရေၚ်ရပ်စပ်ဘဏ္ဍာ၊ ပရေၚ်ရုၚ်တံကီုရ၊
သွာၚ်ညးတာလျိုၚ်လ္ပာ်ဒေသပဳနာန်-BM တေံဂှ် ရုဲစှ်ဏာ ဒုဥက္ကဌ လၟိဟ် ၃ မွဲတၠ၊ ဖက်ဆောညးအုပ်ကာ လၟိဟ် (၃) ၁ တၠ၊ လျိုၚ်ဘဏ္ဍာ ၁ တၠ၊ လျိုၚ်စၟဳစၟတ်စရၚ် ၁ တၠ ကေုာံ ဂအုပ်ရုၚ် ၁ တၠ ပံၚ် ၅ တၠရ၊
နာဲတၠမန်အံၚ် ဒုဥက္ကဌ လၟိဟ် (၃)၊ နာဲကဏ္ဍ ဖက်ဆောညးအုပ်ကာ လၟိဟ် (၃)၊ နာဲတိုၚ်ပ္ကဴ လျိုၚ်ဘဏ္ဍာ၊ နာဲစန္ဒိမာ လျိုၚ်စၟဳတ်စရၚ်၊ နာဲသိုက်ဇန် ဂအုပ်ရုၚ်တံ ကလိဂွံဏာတာလျိုၚ်အိုတ်ရ၊
ဂကောံပံၚ်ကောံမန်မလေဝ်ယှာဝွံ နကဵုကမ္မတဳယာယဳ စချဳဒရာၚ်ကၠုၚ် နူဂိတုမာတ်(ချ်) သၞာံ ၂၀၁၃ တေံတုဲ ပ္ဍဲကဵုစၟတ်တ္ၚဲ ၂၈ ဂိတု ဂျူလာၚ်ဂှ် ရုဲစှ်ဏာ ညးတာလျိုၚ် သ္ကုတ်ကေအေယ်တေံတုဲ ပ္ဍဲစၟတ်တ္ၚဲ ၁ ဂိတုသာပ်တေမ်ဗာ သၞာံ ၂၀၁၃ ဂှ် ရုဲစှ်ဏာ သ္ကုတ်ကေအေယ်တေံရ။
0 comments :
Post a Comment