ကောံဓရီုဝွံ အခိၚ် ၁နာဍဳသဝ်တ္ၚဲ စပံက်ဏာအသေဟာန်တုဲ ကျာ်ဇၞော်သြဘာသ ကွာန်ခေါန်၊ ဥက္ကဌဂကောံသၟတ်မန်-တိဍာ်ဗၠးၜး-
သ္ကုတ်မလေဝ်သျှာ နာဲဥက္ကာ၊ ဥက္ကဌ
ဂကောံလျးစရာဲအနာဂတ ပွိုၚ်တိုက်နာၚ်သၠုၚ် နာဲရာမညဒဳပတံ ဟီုမြော်ဂလာန်တုဲ ညးစၞးဂကောံသၟတ် နာဲဆာန်ဠာန်၊ သွာၚ်ညးဗြဴမိမၠဵုမောဝ် ကေုာံ ကောန်ဂကောံပွိုၚ်တိုက်နာၚ်သၠုၚ်တံလေဝ် ကဵုဏာလညာတ်နာနာသာ်တုဲ ပ္ဍဲအခိၚ် ၂ နာဍဳ ၃၀ မိနေတ်ဂှ် အုပ်ကၠေံနိဂီုအသေဟာန် နကဵုဒွက်ကောန်ဂကူကီုရ။
ကောံဓရီုဝွံ ကောန်ဂကောံနူဒေသနာနာ လၟိဟ်ၜိုတ် ၅၀ တၠတံတိုန်စိုပ်တုဲ နာဲစေတနာ၊ နာဲဇနဲ ဇာတိကွာန်ကံဗိုတ်၊ နာဲမန်ဇၞူမာန် ဇာတိကွာန်ဇိုၚ်ကျာ်တံလေဝ် ပါအာကရောံဂကောံသၟတ် တိုန်စိုပ်ကဵုဇြဟတ်အိုတ်ရ။
ကွာန်နာၚ်သၠုၚ်၊ ကွာန်လတက်၊ ကွာန်အခေါန်တံ ပံၚ်တုဲ ဒက်ပ္တန်လဝ်ဂကောံလျးစရာဲအနာဂတ သ္ပစၞးကဵုပွိုၚ်တိုက်နာၚ်သၠုၚ် ပ္ဍဲကဵုဂိတု ဖေဖဝ်ဝါရဳ သၞာံ သၞာံ ၂၀၁၀ တေံရ။
အတိုၚ်ကျာ်ဇၞော် သြဘာသဟီုမ္ဂး သၞာံဏံ (၂၀၁၃)တှ်ေ ကွာန်တၟိ၊ ကွာန်ဝၚ်တၟံတံလေဝ် ပါလုပ်ပွိုၚ်တိုက်နာၚ်သၠုၚ်ကီုရောၚ် ညးသ္ဂးရ။
ရံၚ်ကဵုဇြဟတ်ဂကောံတုဲ ပြဟ်ဟ်ဏံ ပိုဲထံက်ပၚ်အာ အယုဝဎိုသဳလဝဎိုကၠာဏောၚ် ဂတနူဏံဂကောံပိုဲ ဇြဟတ်ဇၞော်ကၠုၚ်တှ်ေ ကမၠောန်စပ်ကဵုပွိုၚ်တိုက်နာၚ်သၠုၚ်ဂှ် ပိုဲဆက်ချပ်အာပၠန်ဏောၚ် ဟိုတ်ဂှ်ရ ဂကောံပိုဲဂွံဇၞော်မောဝ်တဴတက်တိုန်အာဂှ် ကောန်ဂကောံတံ ကဵုဇြဟတ်အိုတ်တုဲ ဂ္စာန်ကၠောန်အာ ညဳညဳသာသာအိုတ်ညိစိုအ် သာ်ဝွံ ဥက္ကဌ ဂကောံလျးစရာဲအနာဂတ ပွိုၚ်တိုက်နာၚ်သၠုၚ် နာဲရာမညဒဳပ ကသေအ်ကၟဝ်ဏာ ကောန်ဂကောံဂမၠိုၚ်ရ။
ဂကောံလျးစရာဲအနာဂတဝွံ ထံက်ပၚ်ဥတုကညၚ်၊ ကလအ်စအာယုဝဎိုသဳလဝဎို နကဵုကမၠောန် ကေုာံတၚ်ရန်တၟံသာ်ဝွံ က္တဵုကၠောန်ချဳဒရာၚ်မံၚ်ရ။
0 comments :
Post a Comment