ဂကောံကမ္မယှေန်ဒက်ပ္တန်ဂကောံမန်မလေဝ်ယှာ သ္ပသ္ကိုပ်သ္ကတုဲ ပ္ဍဲကဵုစၟတ်တ္ၚဲ
၂၈ ဂိတုဂျူလာၚ် သၞာံ ၂၀၁၃တ္ၚဲအဒိုက်ဂှ် ကၠောန်သ္ပဏါပေါဲရုဲမာဲ
ဂကောံပံၚ်ကောံမန်မလေဝ်ယှာ ပ္ဍဲဒၞာဲ Chinese Assembly Hall
မၞုံလ္တူဍုၚ်ဇၞော်ကွာလာလာမ်ပူမဒှ်ရ။ ပေါဲရုဲမာဲဝွံစနူအခိၚ်နူဂယး
၁၀း၂၅မိဏေတ်တုဲ ပံက်ဏါအသေဟာန်တုဲ နာဲဂံၚ်သ္ကာ ရေၚ်တၠုၚ်ဏါ
နဒဒှ်လျိုၚ်သ္ကိုပ်အသေဟာန်မဒှ်ရ။
"ဂကောံပံၚ်ကောံမန်မလေဝ်ယှာဝွံ ရန်တၟံကဵုသ္ဂောံထံက်ပၚ် ဂကူ၊ ယေန်သၞာၚ်၊ဘာသာ သာသနာကီု သ္ဂောံဒှ်အထံက်ဆက်စၠောံကဵု ဂကောံမန်အပ္ဍဲဍုၚ်မ္ၚးဍုၚ် မပ္တံကဵု ဂကောံ( MAU) ဂကောံ(OMCC) ကေုာံဗော်ပရေၚ်ဍုၚ်ကွာန်၊ ဗော်ဍုၚ်မန်တၟိတအ်ကီုတုဲ ထမံက်ပ္တိုန်လဝ်ရ။ စပ်ကဵုပရေၚ်ဂကူဟီုမ္ဂးတှ်ေ ကုညးမကၠောန်မံၚ်ပရေၚ်ကေါန်ဂကူ တြေံတြေံဟီုလဝ်ဂလာန်နွံ ပၞောဝ်ကဵုကူသာန်သွံရာန်ဗၞိက်ဟီုတှ်ေ ကူသာန်သွံရာန်ကေါန်ဂကူဂှ်ပြဲအိုတ်ရ။ ရံၚ်ကဵုဂလာန်ဏံတုဲ ညံၚ်ရဴဂကောံမန်မလေဝ်ယှာဏံ ဂွံဇၞော်မောဝ် ဖေါအ်ဗြေဝ်မာန်ဂှ် အလုံကောန်မန်ပိုဲသီုဖအိုတ် တဲညဳကသုညဳ ပံၚ်တောဲတုဲထမံက်အာရုပ်ရဴအိုတ်ညိဂှ် တၠဂုဏ်ထာဝရ နွံပိုန်ဘာသၞေဟ်ဂၠုၚ် (ဟူတာန်မဳလေန်တာန်) မွဲတၠဟီုရ။
ဂွံဆဵုကေတ်မန်လ္တူဍုၚ်မလေဝ်ယှာတအ် ညဳသာမံၚ်ဗီုဏံဂှ် ဂွံပံက်ပ္တန်ဂကောံပံၚ်ကောံမန်မလေဝ်ယှာမာန်ဂှ် မိ်ပ်စိုတ်တၚ်ဂုဏ်ကဵု ကေါန်ဂကူမန်စိုပ်ဍုၚ်မလေဝ်ယှာတအ် ဗွဲမလောန်ရ။ ဗီုအတိုၚ်ရန်တၟံလဝ်ညံၚ်ဂွံဒှ်မာန်ဂှ် ပိုဲသ္ပအစာံကဵုဂလာန်တၠညး ရာဇာဓိရာဇ်ဟီုလဝ်ဂှ်မ္ဂး အာမ္ဂးဒစိုပ်၊ကေတ်မ္ဂးဒးဂွံ၊ ကၠောန်မ္ဂးဒးဒှ် ရံၚ်ကဵုပိုတ်ဏံတုဲ ဗီုဂကောံမန်မလေဝ်ယှာပိုဲဏံချဳဒရာၚ် ထမံက်မံၚ်ရုပ်ရဴဂှ် ယဝ်ရကောန်ဂကူပိုဲတအ် ပတှ်ေစှ်ေစိုတ်မ္ဂး ကမၠောန်ပိုဲအံၚ်ဇၞးဍာံဍာံရ။ ဟိုတ်ဒှ်သာ်ဂှ်ရ အလုံကေါန်ဂကူမန်ပိုဲသီုဖအိုတ် စနူအခိၚ်ဏံတုဲ ညံၚ်ရဴဗ္တဳမွဲဍောၚ် ဍတ်မွဲမဂွံပါလုပ်မာန်ဂှ် ကေါန်ဂကူပိုဲတအ်ဂိုတ်ဂ္စါန်အိုတ်ညိဂှ် "ညးက္ဍိုက်ပ် ဒေသပတ္တဝတ်မွဲတၠ နာဲကြက်သန်ဟီုရ။
ပ္ဍဲပေါဲရုဲမာဲဂှ် နာဲအကးပေၚ် ဒးဒုၚ်ရုဲနဒဒှ် ဥက္ကဌတုဲ နာဲဥက္ကာဂှ် နဒဒှ်ဒု-ဥက္ကဌ၊ နာဲဂံသ္ကာဂှ် ညးအုပ်ကါ၊ ဖက်ဆောညးအုပ်ကါဂှ်မိသိုက်ရတ် တအ်ပၠတရဴတုဲ ကမ္မတဳကေၚ်ကါ(၄)တၠတအ်ပါလုပ်ရ။
ပ္ဍဲအသေဟာန်ဝွံ ညးဆာန်ဂကူဗၞတ်(၉၀)တၠပြၚ်ၚ်တိုန်စိုပ်တုဲ သဝ်တ္ၚဲ၃း၃၅ဗဳဇနာဂှ် အုပ်ကၠေံနိဂီုနကဵုဒွက်ကေါန်ဂကူရောၚ် ဂွံတီကေတ်ရ။
0 comments :
Post a Comment