သၞောဝ်ဥပဒေ သၞာံ ၂၀၀၈ဂှ် ပၟပ်ဇိုန်ဏှၚ်လဝ် အဝဵုအဏာကု ညးက္ဍိုက်ပ်ပၞာန်ဗၟာဂၠိုၚ် ပ္ဍဲပရေၚ်ဍုၚ်ကွာန် ဒပ်ပၞာန်ဗၟာပါလုပ်အာမံၚ်ဂတမ္ဂး ဟွံဒှ်သၞောဝ်ဒဳမဵုကရေဇြဳဗော်ဇဳ

     သၞောဝ်သ္ဇိုၚ်ဥပဒေဒက်ပ္တန်ဍုၚ် ကၟိန်ဍုၚ်ဗၟာစကာမံၚ်လၟုဟ်ဂှ် ဟိုတ်နူဇိုန်ဏှၚ်ပၟပ်ကဵုအဝဵု ကု ညးက္ဍိုက်ပ်ပၞာန် ဂၠိုၚ်လောန်တုဲ ဟွံကိတ်ညဳကဵုသၞောတ် ဒဳမဵုကရေဇြဳဗော်ဇဳပုဟ်၊ ဥပဒေဝွံ ကဵုလဝ်ဖျုန်ကု ညးက္ဍိုက်ပ်ပၞာန် အခေါၚ်ကၠောန်ဂၠိုၚ်မံၚ်ဏေါၚ် ရဴဝွံ ဂွံတီကေတ်ပ္ဍဲပေါဲဟီုတွံ စပ်ကဵုသၞောဝ်ဥပဒေဒက်ပ္တန်ဍုၚ် ကၠောန်ဗဒှ် ဒၞာဲၝောံခန် ဒဝ်ဝေန်နှေန်ဇြဳ ဍုၚ်လ္ဂုၚ် ပ္ဍဲစၟတ်တ္ၚဲ ၁၃ ဂိတုအံက်တဝ်ဗါ သၞာံ ၂၀၁၃ ရ။
ပ္ဍဲသၞောဝ်ဥပဒေ သၞာံ ၂၀၀၈ဂှ် သမတဝွံ ဒှ်ညးသ္ကိုပ်သ္ကကၟိန်ဍုၚ်၊ ဒှ်ဃံၚ်ဂကောံအလဵုသဳကၟိန်ဍုၚ် ရဴသာ်ဏံ ၜိုန်ခၞံထ္ၜုတ်လဝ်ကီုလေဝ် ကြက်ရှ်သာဇေတ်တ်ဂှ် အခေါၚ်ကၠောန်သမတ နွံမံၚ်ကဵု ဗၞတ်ဗ္ၜတ် အပိုၚ်အခြာရောၚ်။ တၚ်သ္ဂုတ်သွာတ် ကာဇၞော်ဇၞော် တအ်ဂှ် စၞောန်ပၟိၚ် ညးက္ဍိုက်ပ်ပၞာန် တၚ်သ္ဂုတ်သွာတ် ညးက္ဍိုက်ပ်ပၞာန်တအ်ဟေၚ် စိုပ်တရဴဂၠိုၚ်တုဲ ကၠတ်ထဝ်ကၟိန်ဍုၚ်လေဝ် အခေါၚ်တးပါဲဟၟဲရောၚ်။
ရဴဝွံထၟံက်ထ္ၜးလဝ် ပ္ဍဲသၞောဝ်ဥပဒေ ၂၀၀၈ နွံဂှ် နာဲဗ္စာ ဥူကိုဝ်နဳ ဟီုရ။
“ကၠတ်ထဝ်ဟီုဂှ် ညးဍုၚ်ကွာန်ရ၊ သမတလေဝ် ကၠုၚ်နူညးဍုၚ်ကွာန်ရ။ ဟီုဟဂှ်တှ်ေ လ္တူညးဍုၚ်ကွာန်တအ် ရုဲပ္တိုန်လဝ် ကၠတ်ထဝ်ကေုာံ သမတဂှ် ဒပ်ပၞာန်ဗၟာနွံမံၚ်ရ။ သွဟ်ဍေံဍာံဍာံဂှ် အဝဵုနွံပ္ဍဲဒပ်ပၞာန်ဗၟာ ဖိုဟ်ဏီရ။”
ရဴဝွံ ညးဆက်သ္ၚဳဂၠိပ်ထ္ၜးကဵုရ။
လဂွံကဵုသၞောဝ်ဥပဒေ ၂၀၀၈တုဲ သမတဂှ် အခေါၚ်ခါန်ကၞက် ဝန်ဇၞော်ကၟိန်ဍုၚ်နွံရ။ ဆ္ဂး ဝန်ဇၞော်စဵုဒၞာကၟိန်ဍုၚ်၊ ဝန်ဇၞော်ကာအပ္ဍဲဍုၚ် ကၟိန်ဍုၚ်၊ ဝန်ဇၞော်စပ်ကဵုပယျဵုကၟိန်ဍုၚ်တအ်ဂှ် နူညးက္ဍိုက်ပ်ပၞာန် ခါန်ကၞက်ကဵုလဝ်ဂှ်ဟေၚ် သမတ သ္ပဒတန်ဂွံဒှ်ရ။
စပ်ကဵုကာနာနာ ဒပ်ပၞာန်ဂမၠိုၚ်ဂှ် အခေါၚ်ဖန်ဇန်နွံ ပ္ဍဲညးက္ဍိုက်ပ်ပၞာန်ဟေၚ်ဒှ်တုဲ သမတ ကေုာံ ကၠတ်ထဝ်ကၟိန်ဍုၚ် အခေါၚ်ထိၚ်ကြာပ်ဟၟဲရောၚ်။ ဥပဒေ ၂၀၀၈ ထၟံက်ထ္ၜးလဝ်နွံရ။ စပ်ကဵုသၞောဝ်ဓဝ် ပ္ဍဲဒပ်ပၞာန်လေဝ် ညးက္ဍိုက်ပ်ပၞာန်ဂှ် အခေါၚ်ဖန်နွံဂၠိုၚ်ကဵု လျိုၚ်သၞောဝ်ဓဝ်ကၟိန်ဍုၚ်ဏီရောၚ် ရဴဝွံ နာဲဗ္စာဂှ် ဆက်လဴထ္ၜးရ။
“ဒပ်ပၞာန်ဂှ် ဗော်ပရေၚ်ဍုၚ်ကွာန်မွဲဟွံသေၚ်ပုဟ်၊ ယဝ်ရစကာသၞောတ်ဒဳမဵုကရေဇြဳ ဗော်ဇဳဍာံမ္ဂး ညးဍုၚ်ကွာန်တအ် ဒးရုဲစှ်ပ္တိုန်အာ အမာတ်ကၠတ်ထဝ်ဂမၠိုၚ်ရောၚ်။ ဗော်ပရေၚ်ဍုၚ်ကွာန်ဟွံသေၚ်၊ ညးဍုၚ်ကွာန်တအ်လေဝ် ရုဲစှ်လဝ်ဟွံသေၚ်၊ ဒပ်ပၞာန်ဗၟာတအ် လုပ်ကေတ်လဝ်ဒၞာဲပ္ဍဲကၠတ်ထဝ် (၂၅%)ဂှ် ညိညဟွံစှ်ေသၞောတ် ဒဳမဵုကရေဇြဳ ဗော်ဇဳပုဟ်” ရဴဝွံ ညးဆက်သ္ၚဳဂၠိပ်ရ။
“သၞောဝ်သ္ဇိုၚ်ဥပဒေ သၞာံ ၂၀၀၈ဏံ ဟွံစှ်ေသဟဇာတကဵုဍုၚ်ပိုဲကွေံကွေံရ။ နကဵုပၞောန်ဒဳမဵုကရေဇြဳလေဝ် ဟွံညဳသၟဟ်ပုဟ်၊ ယဝ်ရဒက်ပ္တန်ကၟိန်ဍုၚ်ဒဳမဵုကရေဇြဳဍာံစၟတ်မ္ဂး “ဒပ်ပၞာန်ဒးအာဂတ ပ္ဍဲအရာပရေၚ်ဍုၚ်ကွာန် ကၟိန်ဍုၚ်” ရဴဝွံ ချူခၞံလဝ်ဂှ် ဒးပဠေဝ်အာကိုပ်ကၠာရောၚ်” ရဴဝွံ ဥက္ကဌ ဗော်ဒဳမဵုကရေဇြဳရခေၚ် ဥူအေတာအံၚ် သ္ၚဳဂၠိပ်လဝ်နွံရောၚ် ဂွံတီကေတ်ရ။
                                                                                   မိဇၟန်ပ္ကဴ
                                                                            ဌာန်ပရိုၚ်ဗညာဓရာံ