“ညးစၞးတံသဳကၠဳ ပ္ဍဲကောံဓရီုဏံ ပွိုၚ် ၃ တ္ၚဲဏောၚ်၊ ဒုၚ်သ္ဇိုၚ်ကဵုတၚ်သဳကၠဳဂမၠိုၚ်တုဲ
သွဟ်မလိဂွံနၚ်လက္ကရဴအိုတ်ဂှ် ကောံဓရီုတုဲ ပိုဲတံကလိဂွံတၚ်တုပ်စိုတ် ၅ တၚ် သာ်ဝွံ ဒံက်တာမေန်ကျဳဝေန်ဟီုရ”
ဗော်ဍုၚ်မန်တၟိ၊ ဗော်ဒဳမဝ်ကရေသဳမန်၊ ဗော်ဒဳမဵုကရေဇြဳအလုံရးမန်တံ ပၠတရဴတုဲ ကၠောန်သ္ပကောံဓရီုဇၞော် အပ္ဍဲဍုၚ်အလန်ကၠာ အိုတ်ပွိုၚ်ပိတ္ၚဲဏံဂှ် ရန်တၟံ သွက်သ္ဂောံကၠောန်အာ သ္ဘၚ်သဳကၠဳကောန်ဂကူမန်၊ အလုံဂကူမန် ညံၚ်ဂွံညဳသာသၟဟ်န်၊ သွက်သ္ဂောံ ဒက်ပ္တန်အာပရေၚ်ၜိုဟ်လလံ ပ္ဍဲဒေသမန် (ဍုၚ်မန်) ဍာ်ဇမၠိၚ် ကေုာံ သ္ဂောံသၠုၚ်အသိၚ် ပရေၚ်ဖောအ်ဗြေဝ်ဂကူမန် ပ္ဍဲကဏ္ဍနာ နာတံမဒှ်ရ၊
ပ္ဍဲကောံဓရီုဝွံ “ညံၚ်သ္ဂောံကၠောန်သ္ပကဵု သ္ဘၚ်သဳကၠဳတုပ်သၟဟ်ကဵုပေန်လုၚ် မပါလုပ်ညးစၞးကောန်ဍုၚ်အရၚ်စုၚ်ကီု၊ သၞာံ ၂၀၁၄ ကၞောတ်သၞာံဏံ ညံၚ်ဂွံကၠောန်သ္ပအာ သ္ဘၚ်သဳကၠဳဂကူမန်ကီု၊ ဒုၚ်သ္ဇိုၚ်ကဵုသၞောတ်ဖေက်ဒရေဝ်တုဲ သၞောဝ်ဥပဒေသ္ဇိုၚ်မၞုံကဵု ဗီုပြၚ်ဒဳမိုဝ်ကရေဇြဳစှ်ေစှ်ေ ညံၚ်ဂွံပဠေဝ်အာ (ဟွံသေၚ်) ချူဓဇက်အာဂှ် သဳကၠဳဏာရ၊
နာယကကၠောန်ဗဒှ် ကောံဓရီုဇၞော်ပရေၚ်ဂကူမန် နာဲတေန်အံၚ်ဟီုဂှ် “သၞောဝ်ဥပဒေသ္ဇိုၚ် ၂၀၀၈ လၟုဟ်ဂှ် သွက်ကောန်ဍုၚ်အ ရၚ်တံ အခေါၚ်တုပ်သၟဟ်မုကဵုလဝ်ဟွံမွဲပုဟ်၊ သၞောဝ်ဥပဒေသ္ဇိုၚ် ၂၀၀၈ ဝွံ ဗီုကွာ်တရဴသၞောဝ်ဒဳမိုဝ်ကရေဇြဳဟွံဍိုက်ပေၚ်ကီု၊ သောၚ်ပြသၞာကောန်အရၚ်တံလေဝ် ဟွံရုမ်ဂပ်ပုဟ်၊ ဟွံပေၚ်ဏံဂှ် ဗၠအ်ကေတ်ဟွံဂွံပုဟ်၊ ဇက်တၟိမှလေဝ် ကိတ်ညဳကဵုအလုံဍုၚ် မွဲရောၚ်၊
သၟာၚ်နူဂှ်ပၠန် ပ္ဍဲကောံဓရီုဇၞော်ဏံဂှ် သဳကၠဳဏာ စပ်ကဵုကိစ္စဗော်မန်ဒဳမိုဝ်ၜါ သ္ဂောံပံၚ်ညးသ္ကအ်ကီု၊ ပရေၚ်ဗ္တောန်လိက်မန်ကီု၊ ပရေၚ်ဖောအ်ဗြေဝ်ဒေသမန် (ဍုၚ်မန်)ကီုရ၊
ကောန်ဓရီုဇၞော်ပရေၚ်ဂကူမန်ဝွံ မန်ဍုၚ်မန်၊ မန်ဍုၚ်သေံကေုာံပယျဵု၊ မန်ဍုၚ်သၟာၚ် သီုကဵုညးစၞးအလဵုသဳ ဒုဥက္ကဌ ထ္မံက်ရုပ်ရဴ ပရေၚ်ၜိုဟ်လလံကၟိန်ဍုၚ် အံၚ်မေန်၊ ဝန်ဇၞော်တွဵုရးဍုၚ်မန် အုၚ်မျေတ်၊ ကွးဘာ ၈၈ မေန်ကိုဝ်နာၚ်၊ မေန်ဇြေယျတံ ဖအိုတ်ပံၚ် လၟိဟ်မၞိဟ် အကြာ ၄၀၀ တၠနွံရောၚ် သ္ဂောံတီကေတ်ရ၊
ကောံဓရီုဇၞော်ပရေၚ်ဂကူမန်ဝွံ ကၠောန်သ္ပကၠုၚ်ပ္ဍဲတိဍာ် ဗော်ဍုၚ်မန်တၟိအုပ်ဓုပ် တုဲဒှ်အာ ၆ ဝါတုဲ မရနုက်ကဵု ရ ဝါဏံဂှ် ကၠောန် သ္ပအပ္ဍဲဍုၚ်အလန်ကၠာအိုတ်ရောၚ် သ္ဂောံတီကေတ်ရ၊
0 comments :
Post a Comment