ပ္ဍဲသ္ဘၚ်ရတ်သြန်ဂှ် ဥက္ကဌ ဗော်ဒဳမဝ်ကရေသဳမန် နာဲၚိုဲတိၚ်(နာဲသိုက်သြန်) ဒု-ဥက္ကဌ(၁) နာဲသက်လွေန်၊ ဒု-ဥက္ကဌ(၂) နာဲတၠနန်၊ ဥက္ကဌဗော်ဒဳမဵုကရေဇြဳအလုံရးမန် နာဲဇၞူမန် ကေၚ်ကာဗဟဵုဗော်ဍုၚ်မန်တၟိ နာဲတၠညးတအ် အဃောဟီုဂလာန်ဂှ် ပံက်ထ္ၜးဟီုဏါ ပရူဗွဲလ္တူဝွံရ။
ဥက္ကဌဗော်ဒဳမဵုကရေဇြဳအလုံရးမန် နာဲဇၞူမန်ဂှ် “ပ္ဍဲစၟတ်တ္ၚဲ ၂၂ ဂိတုနိဝ်ဝေန်ဗါဏံ ဗော်မန်(၂) ပံၚ်ကောံဏေါၚ် ဖျေံဏါသ္ဂုတ်သွာတ်တုဲယျ၊ ဟိုတ်ဂှ်ရ ကောန်ဂကူပိုဲ တၚ်ခုတ်ကဵုယၟုဗော်တၟိညိ၊ သွက်ဂွံပ္တိုန်အာတ်အခေါၚ် ပ္ဍဲအလဵုသဳဗၟာဂှ် ပိုဲပလေဝ်ပလေတ်စဒၟံၚ်ယျ” ရဴဝွံဟီုရ။
ပ္ဍဲကဵုစၟတ်တ္ၚဲ ၂၂ ဂိတုနိဝ်ဝေန်ဗါ သၞာံ ၂၀၁၃ဂှ် ကမ္မတဳပ္ညဳပ္ညပ်အလုံဂကူမန် အာက္ဍိုပ်တုဲ ပ္ညဳပ္ညပ်သဳကၠဳကၠုၚ် ပ္ဍဲဒၞါဲ ဘာလကျာ်မန်ဓာတုမာလာ အရာပ်ဇြေဂျိုဲတုဲ သီုက္ဍိုပ်သ္ကိုပ် ဗော်(၂)လ္ပာ် ကလိဂွံကၠုၚ်တၚ်တုပ်စိုတ် ပရေၚ် ပံၚ်ကောံညးသ္ကအ်ရ။
ဥက္ကဌ(၂) နာဲတၠနန်ဂှ် “ဗော်မန်ၜါပံၚ်ကောံညးသ္ကအ်ဟီုဂှ် ဒးမံၚ်ရ၊ ဆ္ဂးသွက်ဂွံကလိဂွံအခေါၚ် ပံက်ဗော်တၟိ ဇရေၚ်အလဵုသဳဗၟာဂှ် ဒးရေၚ်တၠုၚ်ကၠောန်အာမံၚ် တၟာဂလိုၚ်ဏီ၊ ကလိဂွံကၠုၚ်အခေါၚ် ပံက်ဗော်တၟိမ္ဂး ဂွံပလီုကၠေံ ယၟုဗော်တြေံတအ်ဂှ် ဒးပ္တိုန်ထ္ၜးဒၟံၚ် ဇရေၚ်ဒၞာဲမဆေၚ်စပ်ဏီ” ရဴဝွံဟီုရ။
သ္ဘၚ်ရတ်သြန် ဗော်ဒဳမဝ်ကရေသဳမန်ဝွံ ညးဆာန်ဂကူမန်ဂမၠိုၚ် တိုန်စိုပ်လဝ်တုဲ သၟာသုခုမမန်ဒယှ်တှ်ဂမၠိုၚ် လှ်ေဒယှ်ေတိၚ်တိုက်ကဵု ဗွဲမမိပ်မြဟ်ရောၚ် ညးဆာန်ဂကူမန်မွဲတၠ နာဲမေန်နဲနဲ ဟီုရ။
ပ္ဍဲစၟတ်တ္ၚဲ ၂၂ ဂိတုနိဝ်ဝေန်ဗါ ကၠောန်ဗဒှ်ပေါဲပ္ညဳပ္ညပ်တုဲ နာဲတၠနန် ဟီုကဵုဌာန်ပရိုၚ် RFA ဂှ် “သွက်ဂွံပံၚ်ကောံညးသ္ကအ်ဂှ် ဒးကေတ်အခိၚ် ပွိုၚ်(၂)သၞာံပြၚ်ၚ်တုဲ လၟုဟ်မ္ဂး အံၚ်ဇၞးအာယျ၊ ကမ္မတဳပံၚ်ကောံမွဲလေဝ် ပိုဲဒက်ပ္တန်ကၠုၚ်မာန်ယျ၊ သွက်ကောန်ဂကူမန်ပိုဲမ္ဂး ဒှ်ပေါဲအံၚ်ဇၞး ဇၞော်ကဵုဇြဟတ်မွဲဏေါၚ်၊ ယဝ်ရပံၚ်ကောံညးသ္ကအ်ဟွံမာန်မ္ဂး ဒက်ပ္တန်ဓဝ်ညဳသၟဟ်ဟွံမာန်ပုဟ်၊ လၟုဟ်ဓဝ်ညဳသၟဟ် ကောန်ဂကူမန်ပိုဲမွဲ ဒက်ပ္တန်မာန်ကၠုၚ်ရ။”
တုဲမ္ဂး သွက်ဂွံခုတ်ထ္ၜုတ်ယၟုဗော်တၟိမွဲဂှ် ပွိုၚ်(၁၀)တ္ၚဲ ကေတ်အာဆန္ဒညးဍုၚ်ကွာန်မန်ရောၚ် ဂွံတီကေတ်ရ။
မိဇၟန်အးဆာဲ
ဌာန်ပရိုၚ်ဗညာဓရာံ
နိဿဲနူ ဌာန်ပရိုၚ် IMNA ကေုာံ RFA
0 comments :
Post a Comment