ဗော်မန်ပ္ဍဲဍုၚ် (၂) မတွံဂး ဗော်ဒဳမဵုကရေဇြဳမန် ကေုာံ ဗော်ဒဳမဵုကရေဇြဳအလုံဒေသရးမန်တံ ပံၚ်ပကောံတုဲ ပ္ဍဲသၞာံ ၂၀၁၄ ဂိတုဂျောန်နဝါရဳမ္ဂး ပ္တိုန်လိက်အာတ်အခေါၚ်ဇရေၚ်အလဵုသဳ နကဵုယၟုတၟိမွဲရောၚ် ညးကေၚ်ကာဗဟဵု ဗော်ဒဳမဵုကရေဇြဳမန် နာဲတိဗန် (ကော်) နာဲသဵုမျေတ် ဟီုကဵုဌာန်ပရိုၚ် “မဇ္ဇျိမ” ပ္ဍဲစၟတ်တ္ၚဲ (၁၃) ဂိတုနဝ်ဝေန်ဗာ ၂၀၁၃ ရောၚ် ဂွံတီကေတ်ရ။
နကဵုယၟုဗော်တၟိမွဲ ရုဲစှ်တုဲ ပ္ဍဲဂိတုဂျောန်နဝါရဳတေံ ပတိုန်အာလိက်အခေါၚ် ဇရေၚ် ကဝ်မယှေန်ပေဲါရုဲမာဲ ရောၚ် ရဴဝွံညးဆက်ဟီုရ။
လတူနာဲသဵုမျေတ်ဟီုဂှ် ဥက္ကဌ ဗော်ဒဳမဵုကရေဇြဳအလုံဒေသရးမန် နာဲဇၞုမန် သ္ပဒတန်တုဲ ပ္ဍဲဂိတုဒဳဇြေန်ဗာမ္ဂး ရုဲစှ်အာညးကေၚ်ကာဗဟဵုဂမၠိုၚ်ရောၚ် နနဲသာ်ဏံပံၚ်ပကောံတုဲမ္ဂး အတိုၚ်ဆန္ဒညးဍုၚ်ကွာန်မန်တအ် တုပ်စိုတ်ဂှ် ဖျေံအာမူဝါဒကေုာံ ဂၠံၚ်တရဴဗော်ရောၚ် ရဴဝွံ နာဲဇၞုမန်ဟီုရ။
ပ္ဍဲစၟတ်တ္ၚဲ ၂၂ ဂိတုနဝ်ဗာမ္ဂး ထပ်ကောံဓရီုအာ စပ်ကဵုဂွံပ္တိုန်လိက်အခေါၚ်ဇရေၚ်အလဵုသဳဂှ်ပၠန် ဒၞာဲကောံဓရီုဂှ် ကၠောန်ဗဒှ်အာ ပ္ဍဲရာမညနိကာယဓာတုမာလာ အရာပ်ဇြေဂျိုဲရ လ္တုဍုၚ်မတ်မလီုရောၚ် နာဲသဵုမျေတ် ဆက်လဴထ္ၜးရ။
သွက်ဂွံပကောံဗော်မန် (၂)ဂှ် ဂကောံသၚ်မန်တအ် စပ္တံပ္ညဳပ္ညပ်ကၠုၚ် နူသၞာံ ၂၀၁၂ တုဲ ပ္ဍဲသၞာံဂှ်ရ စိုပ်ဂိတုအေပရေဝ်ဂှ် “ဂကောံပညဳပညပ်အလုံဂကူမန်”တအ် ပညဳပညပ်ကၠုၚ်ရ။
ပ္ဍဲဂှ်က္လိဂွံတၚ်တုပ်စိုတ် ၂၀၁၄ ဂိတုဒဳဇြေန်ဗာမ္ဂး ဗော် ၂ ဒးပံၚ်ပကောံရောၚ် ညးစၞးဗော်သီုၜါလ္ပာ် ညံၚ်ဂွံသဳကၠဳဆဵုဂဗသ္ကအ် ဇၟာပ်ဂိတု ပံၚ်ပကောံတုဲမ္ဂး ညံၚ်ဂွံစၟတ်ခုတ်ပ္တိုန် ယၟုဗော်တၟိမွဲ ရဴဝွံက္လိဂွံတၚ်တုပ်စိုတ်ရ။
ကၠာကောံဓရီုဇၞော် ပရေၚ်ဂကူမန် သၞာံ ၂၀၁၃ မကၠောန်ဗဒှ် ပ္ဍဲစၟတ်တ္ၚဲ ၂၈ ၂၉ ၃၀ ဂိတုဒဳဇြေန်ဗာ လ္တုဍုၚ်မတ်မလီုဂှ် အသိၚ်ဇြဟတ်ဓရိုဟ် ညးဍုၚ်ကွာန်မန်တအ်ဂၠိုၚ်ဂၠၚ်တိုန်တုဲ “ဂကောံပညဳပညပ်အလုံဂကူမန်” ဖျေံကၠုၚ်တၚ်သ္ဂုတ်သွာတ် ကၠာသၞာံ ၂၀၁၃ ဂွိုအ်အိုတ်ဏီ ညံၚ်ဂွံပံၚ်ကောံဂှ်ကီု ပ္ဍဲကောံဓရီုဇၞော်ပရေၚ်ဂကူမန် ဂှ်လေဝ် သဳကၠဳလဝ်နွံကီုတုဲ လၟုဟ်အတိုၚ်ဆန္ဒညးဍုၚ်ကွာန်မန် ဗော်မန် (၂) ပကောံမာန်ကၠုၚ်ရောၚ် ဂွံလ္ၚတ်ကေတ်ရ။
ဗော်ဒဳမဵုကရေဇြဳမန်ဂှ် စပ္တံဒက်ပ္တန်လဝ် ပ္ဍဲသၞာံ ၁၉၈၈ နကဵုယၟုဂကောံဒဳမဵုကရေဇြဳကောန်ဂကူမန်တုဲ လုပ်ပြိုၚ်ပ္ကာန်ပ္ဍဲပေါဲရုဲမာဲ ပ္ဍဲသၞာံ ၁၉၉၀ ဂှ်ကီုရ။ ဗွဲကြဴအလဵုသဳပၞာန်တအ် ပလီုကၠေံတုဲ စိုပ်ပ္ဍဲအလဵုသဳ ဥုတုၚ်ဇြုၚ် သၞာံ ၂၀၁၂ ဂိတုမေ (၃၀) ဂှ် နယၟု ဗော်ဒဳမဵုကရေဇြဳမန် ကလေၚ်ပ္တိုန်ဗော်ရ။
ဗော်ဒဳမဵုကရေဇြဳအလုံဒေသရးမန်ဂှ် ဂွံအခေါၚ်ဒက်ပ္တန်လဝ် ပ္ဍဲသၞာံ ၂၀၁၀ တုဲ လုပ်ပြိုၚ်ပ္ကာန်လဝ် ပ္ဍဲပေါဲရုဲမာဲ ၂၀၁၀ ရောၚ် ဂွံတီကေတ်ရ။
နိဿဲ ဌာန်ပရိုၚ် “မဇ္ဇျိမ”
မိဇၟန်ပ္ကဴ ဌာန်ပရိုၚ် ဗညာဓရာံ
0 comments :
Post a Comment