ညးယိုက်နၚ်ဂဥုဲချေံ ဗၞတ် (၁၂၀၀၄)မ ကေုာံ သီုဂဥုဲၜူမာဲတၞဟ်လေဝ်ပါဂှ် သွက်ဂွံလုပ်ဍုၚ်သေံ လ္ပာ်မဟာဇျှာဲ အဃောမၚ်ဒၟံၚ်ပ္ဍဲပယျဵုဂှ် ရပ်ထိၚ်ဂွံအာရ။
"ပရိုၚ်သ္ဇိုၚ်ဏံ ကလိဂွံကၠုၚ်နူဒပ်လ္ပာ် မၞုံကွာန်ဂူၜဴတုဲ ပိုဲစၞောန်လဝ် ညံၚ်ဂွံမၚ်ရံၚ်စေအ်အ်ရ။ တုဲမ္ဂး သ္ပဒတန်ဂွံယျ ၜိုတ်ဏံတှ်ေ အဃောပိုဲမၚ်ဒၟံၚ် ဂၠံၚ်ပယျဵုလုပ်ဍုၚ်သေံဂှ် ပိုဲရပ်ထိၚ်မာန်ကၠုၚ်ရ။
“အဃောရပ်ထိၚ်ကေတ် ညးယိုက်နၚ်ဂဥုဲချေံဂှ် လ္ပာ်ဍေံ ဗွဲမကြာန်ဓမာန် ဟွံက္လေၚ်ပလန်မွဲသာ် ကေဝ်ဝ်ဇြုၚ်ၚ် ဒုပ်ရပ်တဴရ။ ပ္ဍဲဍေံဂှ်လေဝ် လက်သန်စကာသုၚ်စောဲလဝ်ဂဥုဲၜူမာဲနွံရောၚ် ဂွံဆဵုကေတ်ရ။”
ရဴဝွံဗိုလ်ဇၞူရတ်မန် ဟီုရ။
“ဂဥုၜူမာဲတအ်ဏံ အဲကလိဂွံဒၞာဲအဆက်မွဲဒၞာဲ ပ္ဍဲဍုၚ်ကျာ်ပိတုဲ နူဏံမွဲက္ဆံၚ် အဲဒးပလံၚ်ဗ္စိုပ်မဟ္ၚဲာဲရ။ စိုပ်မဟ္ၚာဲမ္ဂး ပၟပ်ကဵုညးဒုၚ်တဲမွဲတၠတုဲတှ်ေ တာလျိုၚ်အဲတုဲဒှ်ရ။ ဂွံပလံၚ်ဗ္စိုပ်ဗီုဏံဂှ် သ္ကအ်ရဲမၞုံမွဲတၠ ဍုၚ်မလေဝ်ယှာ တေံ ဆက်နၚ်ဖုၚ်တုဲ တုပ်စိုတ်အဲပလံၚ်ကဵုဏါဏေါၚ်” ရဴဝွံ ညးယိုက်ပလံၚ် ဂဥုဲချေံဒးဒုၚ်ရပ်ဂှ် ပံက်ထ္ၜးရ။
နကဵုပရေၚ်ကဵုကေတ် စပ်ကဵု ပလံၚ်ဗ္စိုပ်ဂဥုဲချေံဏံဂှ် “အခါရစိုပ်မဟာဇျှာဲတုဲမ္ဂး နွံပၟိက်မိက်ဂွံကၠောံကၠုၚ် မလေဝ်ယှာမ္ဂး စရိတ်ဂၠံၚ်မွဲဒကေဝ်ဟွံအိုတ် ဍေံတအ်ဒုၚ်ကဵုဖအိုတ်ရောၚ်” ရဴဝွံညးဆက်ပံက်ထ္ၜးရ။
လ္တူဍုၚ်ကျာ်ပိ ဒၞာဲသွံရာန်ဒၟံၚ် ဂဥုဲၜူမာဲဂှ် နူကဵုဂကောံရပ်လွဟ်ဖျေံသ္ဇိုၚ် ပွိုၚ်ဍုၚ်ကျာ်ပိမွဲက္ဆံၚ် ၜိုတ်အလဵုသဳတီဒၟံၚ်ကီုလေဝ် စဵုကဵုလၟုဟ် ဗွဲမစိုပ်တရဴ ဟွံကေတ်အရေဝ်ဏီရ။
“ဂကောံရပ်လွဟ်ကဵုကၠောန်သ္ပသွံရာန်ဒၟံၚ်ဂှ် အဲဟွံမိက်ပံက်ဟီုပုဟ် ချိုတ်ပၠိုတ်မွဲဂှ် အခိၚ်ဟွံရုဲ ရာန်မ္ဂးကလိဂွံမာန်” ရဴဝွံ ကောန်ဍုၚ်ကျာ်ပိ ညးဟွံမိက်ထ္မံက်ယၟုမွဲတၠဂှ် ဟီုရ။
ပ္ဍဲတိဍာ်ဗော်ဍုၚ်မန်တၟိ (ဒေသပွဳပွူဗဟဵု)ဝွံ ရပ်ဂွံဂဥုဲၜူမာဲ အလန်ဏံဒှ်လၟိဟ်ဂၠိုၚ်အိုတ်တုဲ ဒုတိယဂၠိုၚ်အိုတ် အဃောရပ်ဂွံဗၞတ် (၈၀၀၀)မဂှ်မဒှ်ရ။
ကောန်ဒုဟ် (ညးယိုက်ပလံၚ်ဂဥုဲချေံ)ဏံ လၟုဟ် ဂကောံစဵုဒၞာဲဂဥုဲၜူမာဲ (ပွိုၚ်ဍုၚ်ကျာ်ပိ)တအ် ပလံၚ်ဏါ ဌါန်ဂအုပ်ဗဟဵုတေံတုဲ အတိုၚ်ရုၚ်သၞောဝ်ဓဝ်ဗဟဵု ဖျေံဂှ် မ္ဒးဒုၚ်အာရောၚ် ဂွံတီကေတ်ရ။
မိဇၟန်ပ္ကဴ
ဌာန်ပရိုၚ်ဗညာဓရာံ
နိဿဲ ဌာန်ပရိုၚ် “မဇ္ဇျိမ”
0 comments :
Post a Comment