မေ ၊ ၂၀၁၃
ဒုၚ်သ္ပဒၞန်မာန်ဏောၚ်၊ ဒုၚ်ဂိမာန်ဏောၚ်၊ ထိၚ်ဝိုၚ်မာန်ဏောၚ်၊ သှ်ပဠိုဟ်ပြသၞာမာန်ဏောၚ်၊ အာက္ဍိုပ် ပၠတရဴမာန်ဏောၚ်၊ ဒုၚ်ဂိုၚ်ကေတ်ပၠန်ဂတးဇြိုဟ်နက်ဏောၚ်၊ အေၚ်ဒုၚ်မာန်ဏောၚ်၊ ထေဲပၞတ်ဒေါသအောန် ဏောၚ်၊ အတ္တအောန်ဏောၚ်၊ စိုန်သကီုပ္ဍဲပညာဏောၚ်၊ လ္ဂူတပ်တးဏောၚ်၊ စိုတ်သဝ်ဏောၚ်၊ တီကၠိုဟ်အ ကာဲအရာဏောၚ်၊ တီဇၟောဝ်ဍာ်ဂၠးတိဏောၚ်၊ ဗက်စအဂတိအောန်ဏောၚ်၊ ဂှ်မပ္တံအစောန်စရာဲတံဂှ် ညးဂမၠိုၚ်ကေၚ် ဟီုကၠုၚ်လဝ်စပ်ကဵု အစာရဿဂှ် ဂွံမိၚ်ကၠုၚ်ကီု သီုဂွံကေၚ်ဆဵုကၠုၚ်လဝ်နမတ်ကီုဂှ်တုဲ နကဵုကောန်ဂကူမန်မွဲ ဟွံသ္ပ ရှ်ေသှ်ေရဴဂဴမံၚ်ဟွံမာန်ရ။
ကြဴနူဂွံမိၚ်ကေတ် ဒုဥက္ကဌဗော်ဍုၚ်မန်တၟိနာဲရဿ သ္ဒးပလံၚ်ဗစိုပ်ရုၚ်ဂဥုဲဍုၚ်သေံ နကဵုယဲကေန်သာဂှ်တုဲ ကောန်ဂကူမန်မစိုပ် ကၟိန်ဍုၚ်တတိယတံဂမၠိုၚ်ကီု မစိုပ်ဍုၚ်မ္ၚးတံဂမၠိုၚ်ကီု ကတဵုဒှ်ဓဝိၚ်သောကဇၞော်ကဵုဇြဟတ်ဂှ် ပရံၚ်စိုတ်မ္ဂး ဂွံတီကေတ်ကၠးကၠးရ။ ပဟိုတ်နူရှ်ေသှ်ေရဴဂဴလစွံစိုတ်ညးကီု ပရေၚ်အာက္ဍိုပ်ညးကီု ညာန်ဘာန်ပညာ မဍိုက်ပေၚ်ပ္ဍဲအရာဂၠာဲသွဟ်ပသောၚ် ပြသၞာဂမၠိုၚ်ကီုဂှ်တုဲ ကတဵုဒှ်ဓဝိၚ်အိုတ်ဂှ်တုဲ ပ္ဍဲကၟိန်ဍုၚ်အမေရိကာန်သၟးဂှ် ဂကောံဒေသနာနာတံပံၚ်ကောံဗက်ဒုၚ်ဒါန်ဂှ် ဂွံၜိုတ်မွဲကိုတ်ၜါတ်ပြၚ်ဂှ်ဂွံတီကေတ်ရ။ လၟိဟ်ဝွံဒှ်လၟိဟ်ဟွံဂၠိုၚ်ကီု လေဝ် ဆဂးစရၚ်ညးမကဵုဒါန်ထံက်ပၚ်တံဂှ်ကီု စိုတ်ဓါတ်ညး မကဵုဒါန်တံဂှ်ကီုဂှ် ဂၠိုၚ်တဴကွေံဟီုမာန်ရ။ ဆဒှ်ကဵုဒှ်ပ ကောံပကေဝ်တုဲ ကဵုဏာဒါန်ဟွံသေၚ် သီုရန်တၟံနွံနွံ စန်ဒက်ဟီုတွံတုဲ ဗက်ဒုၚ်ဒါန်အိုတ်ဂှ်ဂွံလ္ၚတ်ကေတ်ရ။
ပ္ဍဲအခိၚ်ကာလမချဳဒရာၚ်ဟီုတွံ တၞဟ်နဂွံရီုဗၚ်က္ဍိုပ်သကိုပ်ဗော်ဍုၚ်တၟိဝွံဂှ် “သွက်ညးဂှ်ဟွံဒးကဵုဒါန်၊ မိက်ဂွံ ကဵုထံက်ပၚ်မ္ဂး ကဵုသွက်တန်ဗ္တောန်ဘာပၞာန်ညိ ကဵုကယျိုၚ်ကယျဝ်ကောန်ပၞာန် (မွဲကယျိုၚ်၄၅၀ၜါတ်)ညိ”သာ်ဝွံ နူကဵုအစာရဿမွဲအဆံၚ် ရမျာၚ်က္ဍိုပ်သကိုပ်ဗော်ဂှ်မဟီုနၚ်ဂှ် ညးမချဳဒရာၚ်ပ္ဍဲဂကောံတံဟီုဂးလဴပူတဴအိုတ်ပၠန်ဂှ်တုဲ သာတုဲလောန်တုဲ သ္ပတဴရှ်ေသှ်ေရဴဂဴစိုတ်ဓါတ်ညးအိုတ်ပၠန်ရ။
နာဲရဿဟၟဲတှ်ေ ဇြဟတ်အာက္ဍိုပ်ပရေၚ်ဍုၚ်ကွာန်ပ္ဍဲဗော်ဂှ် ဍိုန်လျစှ်ေအာဂၠိုၚ်ရောၚ် ဂလာန်မြဴသာ်ဝွံ နာဲ ဍာံရောၚ် ကော်နာဲၜၚ်ကဍဳ ညးမဒှ်ဥက္ကဌဂကောံညဳသၟဟ်ဂကူမန် အာမ်ယူအေဝ်တြေံ ဟီုဂးနၚ်ကဵုမန်မစိုပ်ကၟိန်ဍုၚ် အမေရိကာန်တံဂှ်တုဲ သွက်ညးမတန်တဴပ္ဍဲဍုၚ်ပလိုတ်တံ သာတုဲဒှ်ဓဝိၚ်သောကကဵုပရေၚ်ဍုၚ်ကွာန်ဗော်ဍုၚ်မန်တၟိ အနာဂတ်ရ။
အစာရဿဝွံ ဒှ်က္ဍိုပ်သကိုပ် တၞဟ်နဂွံသ္ပအစာံသွက်တၞောဝ်ဒတောဝ်တၟိမလေပ်ပညာတံ ပ္ဍဲအရာပၠန်ဂတး ရပ်လွဟ်မန်မွဲရ။ ညးမလေပ်ပညာဂတာပ်ခေတ်တံ တၞဟ်နဂွံလုပ်ဗော်ပၠန်ဂတးရပ်လွဟ်ဂှ် က္ဍိုပ်သကိုပ်မစိုန်သ ကီုပ္ဍဲပရေၚ်ပညာမွဲမွဲသာ်ဝွံဂှ် ဒှ်အရာပၟိက်ဇၞော်မွဲရ။ လေပ်ပညာသၟးဟွံက သီုသၠးအတ္တပရေၚ်ပိုန်ဂြပ်သ္ၚိဌာန်မာန် ဂှ်တုဲ ခေတ်ကာလညးဏံဝွံ သီဗၜေါဝ်တၞောဝ်ဒတောဝ်တၟိတံ တၞဟ်နဂွံလုပ်စိုပ်ဗော်ဍုၚ်မန်တၟိမာန်ဂၠိုၚ်ကီုရ။
ယဝ်ရက္ဍိုပ်သကိုပ်မလေပ်ပညာတံအောန်မ္ဂး ဂွံဒှ်အစာံကဵုတၞောဝ်ဒတောဝ်တၟိတံ ပ္ဍဲအရာပၠန်ဂတးရပ်လွဟ် ဂှ် ဍိုန်လျစှ်ေအာမာန်ဂှ်တုဲ အဆက်ဖဵုဂှ်တုန် ဇြဟတ်ပၠန်ဂတးရပ်လွဟ်ကေတ်ကဵုဍုၚ်မန်ဂှ်လေဝ် ယုတ်ဒေက် စှ်ေအာမာန်ကီုရောၚ်။ လေပ်ပညာဏောၚ်၊ သၠးဖဵုဇကုမာန်ဏောၚ်၊ စိုတ်စေတနာသၠဲလးဏောၚ်၊ အာက္ဍိုပ်မာန် ဏောၚ်၊ စန်ဒေက်ညးမလေပ်ပညာတံမာန်ဏောၚ်၊ စိန်ဝုန်ပ္ဍဲအရာပၠန်ဂတးရပ်လွဟ်ကေတ်ကဵုဍုၚ်မန်ဏောၚ်၊ ပၠတရဴမာန်ဏောၚ်၊ ဂှ်မပ္တံအစောန်စရာဲတံဂှ် ဂပ်ဝ်ဒးနွံပၟိက်ပ္ဍဲက္ဍိုပ်သကိုပ်ဗော်ဍုၚ်မန်တၟိဂမၠိုၚ်ရ။
ချပ်စိုပ်အာမွဲဂှ်တုန် ပ္ဍဲကဵုလိက်အုပ်မာတေန်သမေတ်ချူလဝ်ပရောကွးဘာဍုၚ်ဗၟာကလိုက်ကမဵုဂှ်တုန်၊ ဒၟာ နူဒစာံပန်မတုဲ ကွးဘာကေုာံလကျာ်မလေပ်ပညာတံ လုပ်စိုပ်အာဗော်ဍုၚ်မန်တၟိကဵုလ္ၚီဂှ်တုဲ ယၚ်ဝွံဂှ် ဒှ်ဟိုတ် ဗော်ဍုၚ်မန်တၟိ ဍိုက်ပေၚ်ကဵုအစောန်စရာဲပ္ဍဲပရေၚ်ဍုၚ်ကွာန်ရောၚ်ဂှ် ညးဟီုပါ်ပဲါလဝ်သာ်ဝွံရ။ ညးမလေပ်ပညာ တံကၠောန်ပၠန်ဂတးမန်ဂၠိုၚ်ခ္ဍၚ် ပၠန်ဂတးမန်ဂှ် အဆံၚ်သၠုၚ်ဂၠိုၚ်ခ္ဍၚ်ရောၚ်ဂှ် ပြာကတ်ရ။
ညးမလေပ်ပညာသၟတ်ဂတာပ်ခေတ်တံသၟး သ္ဍိုက်မၠိုက်ကဵုက္ဍိုပ်ကဵုအစာရဿဝွံဟွံသေၚ် သၟာပရေၚ်ဍုၚ် ကွာန်အပ္ဍဲဍုၚ်မလေပ်ပညာတံလေဝ် ကဵုက္ဍိုပ်သ္ပရှ်ေသှ်ေရဴဂဴကဵုညးမာန်အိုတ်ကီုရ၊ အရာဝွံဒှ်အရာပၟိက်ဇၞော်မွဲ ပ္ဍဲအရာဟီုဂးကေတ်ဍုၚ်မန်နကဵုပၠန်ဂတးရ။ ယာံသာ်ဂှ်ဟွံသေၚ်ဂှ် လညာတ်ကေတ်ကဵုဍုၚ်မန်နကဵုပၠန်ဂတးဂှ် ဂလာန်စောဒနာတံတိုန်ကၠုၚ်မာန်ရောၚ်။ ပ္ဍဲညးမအာက္ဍိုပ်ဗော်ဍုၚ်မန်တၟိတံ ညးမလေပ်ပညာ ဂလီုလညာတ် ကောန်ဂကူမာန်ဂှ် အောန်စှ်ေကၠုၚ်ဗက်ဂတာပ် ဓဝ်ပတှ်ေပ္ဍဲပၠန်ဂတးရပ်လွဟ်ကေတ်ကဵုဍုၚ်မန်ဂှ်လေဝ် ဟုတ်ယုတ် စှ်ေကၠုၚ်မာန်ရောၚ်။ စိုပ်ကၠုၚ်ပ္ၚံက်ဂှ်မ္ဂး ညးမလေပ်ပညာတံ ဂွံလိုန်လုပ်ပ္ဍဲတိဍာ်ပၠန်ဂတးဂှ် ဝါတ်ကၠုၚ်မာန်ရောၚ်။
ဇြဟတ်ညးမလေပ်ပညာတုဲ ဒုၚ်ဂိုၚ်ကေတ်ပ္ဍဲအရာပၠန်ဂတးဇြိုဟ်နက်တံ ဂွံကတဵုဒှ်ကၠုၚ်မာန်ဂှ် တန်တဴ ကဵုညးမလေပ်ပညာအာက္ဍိုပ်ပ္ဍဲဗော်ဍုၚ်မန်တၟိ ဗွဲမဂၠိုၚ်ရောၚ်။ ခေတ်ကၠာတေံ အစာယှိုဲကျေန်တံ အစာနလ္လာတံ ဒှ်ညးလေပ်ပညာအိုတ်ဂှ်တုဲ အစာရဿတံ အစာဟံသာတံ ကေုာံက္ဍိုပ်သကိုပ်မလေပ်ပညာ ဗော်ဍုၚ်တၟိ လၟုဟ်ဟ် ဂမၠိုၚ် လိုန်လုပ်စိုပ်ဗော်အိုတ်ရ။ တၞောဝ်ဒတောဝ်ကြဴကြဴတံဂှ်တုန် ပမာညံၚ်ရဴနာဲတၠညးတံလၟုဟ် နဲဝေန်လှတံ လၟုဟ်ဂှ် မဒှ်အိုတ်ဂှ်တုဲ နူဂှ်မွဲအဆံၚ်ပၠန် တၞောဝ်ဒတောဝ်တၟိတၟိ အဆံၚ်ကမ္မတဳဗဟဵု ကမ္မတဳခရိုၚ်မလေပ်ပညာ တံလေဝ် လုပ်ကၠုၚ်စိုပ်ဗော်ဍုၚ်မန်တၟိအိုတ်ကီုရ။
ဂွံကတ်လ္ၚတ်ကေတ်မွဲသာ်ပၠန်ဂှ် ညးမကေတ်တာလျိုၚ်ကွးဘာတက္ကသဵုတံ ဗွဲမဂၠိုၚ် လိုန်လုပ်စိုပ်ဗော်ဍုၚ် မန်တၟိ ပ္ဍဲကြဴနူဘာတုဲဂှ် ဒှ်လက်သန်ပြဲလက်သန်တၟေၚ်မွဲ ပ္ဍဲဗော်ဍုၚ်မန်တၟိဂှ်တုဲ အာဲတၟာဲသာ်ဝွံဂှ် ဒှ်အာဲတၟာဲပၠန်ဂတး မန်မမၞုံကဵုဂုန်စရာဲတၟေၚ်တၟဟ်မွဲရ။ အာဲတၟာဲတၟေၚ်သာ်ဝွံဒှ် ဂပ်ဝ်ဒးကေတ်ဂုန်စရာဲကဵုဗော်ဍုၚ်မန်တၟိမွဲသၟးဟွံက သီုဒး ကေတ်ဂုန်စရာဲကဵုအိုတ်အလုံဂကူမန်မွဲရ။ ညးမလေပ်ပညာတံ အာက္ဍိုပ်ပ္ဍဲပရေၚ်ဍုၚ်ကွာန်ရပ်လွဟ်မန်ဂှ် ဒှ်လက် သန်ဂကူဗၠးၜးပြဟ်ရ။
တၞဟ်နဂွံဆက်မၚ်မွဲအာအာဲတၟာဲသာ်ဝွံမာန်ဂှ် က္ဍိုပ်သကိုပ်ဗော်ဍုၚ်တၟိ မလေပ်ပညာဂမၠိုၚ်ကီု ဟွံလေပ် ပညာဂမၠိုၚ်ကီု ဂပ်ဝ်ဒးသ္ပလွဳပရာရောၚ်၊ ခါဂှ်ဟေၚ် ပၠန်ဂတးမန်ဂှ် ညးဍုၚ်ကွာန်မန်တံဒုၚ်တဲ ၁၀၀% မာန်ရောၚ်။ ညးမဒှ်ကောန်သ္ဂံၚ်ဗော်ဍုၚ်မန်တၟိဓမ္မတာမွဲတၠ ကေၚ်ဟီုလဴထ္ၜးကဵုအဲ အခိၚ်ကာလနွံပ္ဍဲပယျဵုဂှ်တုန် အခိၚ်ညးတိုန် ဘာပၞာန်တေံ အစာယှိုဲကျေန်ကေၚ်ဟီုလဝ်ဂလာန်မွဲပါၚ်ဂှ်တုန်၊ ပ္ဍဲကောန်သ္ဂံၚ်ညးဂှ် ညးနွံပၟိက်ကဵုညးလေပ် ပညာဂၠိုၚ်ရ၊ ညးလေပ်ပညာတံ လုပ်စိုပ်ဗော်ဂှ် ညးကေတ်ဂုန်စရာဲလောန်သန်ဂး၊ ဗော်ရပ်လွဟ်ညးဂှ် ညးမိက်ဂွံကဵု ဒှ်ဗော် ညးလေပ်ပညာတံအာက္ဍိုပ်ရ။ ညးဟွံလေပ်ပညာတံ လုပ်စိုပ်ဗော်ဂှ် ဒဵုကဵုညးဒုၚ်တၠုၚ် အိုတ်အစောန်ဟွံဒှ် ရဂး။
အခိၚ်ကာလအစာရဿတံ တိတ်ဂြိုပ်ရပ်လွဟ်ပၠန်ဂတးဂှ် ညးမလေပ်ပညာနူအပ္ဍဲဍုၚ်သၟးရနွံဂှ်တုဲ အခိၚ် ကာလပစ္စုပ္ပန်ဝွံ ညးမလေပ်ပညာဍုၚ်ပလိုတ်တံလေဝ် နွံကၠုၚ်အိုတ်ကီုဂှ်တုဲ ညးတံ တၞဟ်နဂွံကလေၚ်လုပ်ဗော်ကီု ညံၚ်ရဴနာဲသဳရိမန်ဆာန်ဂှ် ဒှ်အရာပၟိက်ဇၞော်မွဲရ။ ကုညးမလေပ်ပညာဍုၚ်ပလိုတ်တုဲ ဒှ်မံၚ်ကောန်ဍုၚ်ပ္ဍဲဍုၚ်ပ လိုတ်တံဂှ်မွဲမွဲရဂှ် ဒှ်အထံက်အပၚ်ကဵုဇြဟတ်ပရေၚ်ဍုၚ်ကွာန်ဗော် ပ္ဍဲအရာသွာၚ်ကလုတ်တမာန်ဂၠးတိဗွဲမဂၠိုၚ်မာန် ရောၚ်။ အလဵုအသဳဍုၚ်ပလိုတ်တံ တၞဟ်နဂွံဒုၚ်တဲကဵုပၠန်ဂတးဗော်ဍုၚ်မန်တၟိမာန်ဂှ် နွံတာလျိုၚ်ညးတံအိုတ်ဂှ်တုဲ ဗွဲတၟေၚ်အလဵုအသဳဍုၚ်ညးတံတန်တဴဂှ် တၞဟ်နဂွံဒုၚ်တဲဗော်ဍုၚ်မန်တၟိဂှ် ဒှ်အရာပၟိက်ဇၞော်မွဲရ။
စပ်ကဵုပၠန်ဂတးဗော်ဍုၚ်မန်တၟိဂှ်တုဲ အလဵုအသဳအမေရိကာန်ကၠာတေံတံ စၟတ်သမ္တီလဝ်ဗော်ဍုၚ်မန်တၟိ နဒဒှ်ဗော်ပလီုပလာ်ပကီုပရာပ်မွဲနဲမွဲဗီုဂှ်တုန်၊ ညးမလေပ်ပညာမန် ပ္ဍဲကၟိန်ဍုၚ်အမေရိကာန်တံ ဗွဲပူဂဵုကီု ဗွဲဂကောံကီု ချူဟီုပတိုန်ထ္ၜးကဵုအလဵုအသဳအမေရိကာန် ဒဒှ်ရဗော်ဍုၚ်မန်တၟိဂှ် ဒှ်ဗော်သ္ပလဝ်စၞးကဵုအိုတ်အလုံဂကူမန်ဂှ်တုဲ လညာတ်အလဵုအသဳအမေရိကာန်ဂှ် ညးတံဒုၚ်တဲဟွံမာန်ဂးရ။ ပရေၚ်တရပ်လုပ်ချူဟီုဂးပတိုန်ထ္ၜးသာ်ဝွံဂှ် ဒှ်အရာ ပၟိက်ဇၞော်မွဲရ၊ အလဵုအသဳတံဂှ် သ္ပစၟတ်သမ္တီဗော်မ္ဂး ဒှ်အထံက်အပၚ်ဇၞော်လောန်ကီုရ။ အယာံမာတ်ညးတံစုတ်ကၠေံ ယၟုဗော်ဍုၚ်မန်တၟိ ပ္ဍဲစရၚ်ညးပကီုပရာပ်ဓဝ်ဂှ် ဗၞတ်ဂလိုၚ်လဵုဒှ်လလေၚ်ဂှ် တော်ဆကေတ်မာန်ကီုရ။ အလဵုအသဳ အမေရိကာန်စုတ်ကၠေံယၟုပ္ဍဲစရၚ်ဂှ်ဗက်ဂတာပ် အလဵုအသဳဍုၚ်တၞဟ်ဟ်တံလေဝ် ဒ္ဂေတ်ဗက်အိုတ်ကီုမာန်ရ။
အခိၚ်ကာလပေဲါပၞာန်အပ္ဍဲဍုၚ်သ္ၚိတ်ဇြမံၚ်သာ်ဝွံဂှ်ဂှ် နကဵုဗော်ဍုၚ်မန်တၟိ ဂပ်ဝ်ဒးဂါံဇိုၚ်သၠဲပတိတ်ပရေၚ်စန် ဒက်ကဵုအလဵုအသဳဍုၚ်မ္ၚးတံကီုရောၚ်၊ ညးမဒှ်က္ဍိုပ်သကိုပ်ဗော်ဍုၚ်မန်တၟိတံလေဝ် ဂပ်ဝ်ဒးဗစာရဏာပ္ဍဲအ ကာဲအ ရာဝွံ ဇြိုဟ်ဟ်နက်က်ကီုရ။ ဥက္ကဌဗော် နာဲထဝ်မန်ကီု ညးအုပ်ကာနာနာ နာဲဟံသာကီု ကေၚ်ဂေတ်ဂ္ၚေၚ်လဝ်တ ရဴဍုၚ်မ္ၚးနွံဂှ်တုဲ ယဝ်ရဟွံဍိုက်ပေၚ်ဏီမ္ဂး ညးမဒှ်ကေၚ်ကာတံဂှ် ဂပ်ဝ်ဒးကဵုဆဵုဂဗတရဴဍုၚ်မ္ၚးကီုရ။ အခိၚ်မဒေါံလဝ် ပန်ပှော်ဝွံဂှ်ရ အာဍုၚ်မ္ၚးလောဲသွာဂှ်တုဲ အခေါၚ်အရာဝွံ ဂပ်ဝ်ဒးကေမ်္ၚာပ်လဝ်ဗိုန်န်ထေက်ရောၚ်။
စိုပ်ကာလမွဲတ္ၚဲလလောၚ်ပၟိၚ်ဍုၚ်မန်ဗၠးၜးကီုဒှ် ပံၚ်တဲမံၚ်အာပ္ဍဲကၟိန်ဍုၚ်ဝှိဒ္ဒရာကီုဒှ် အလဵုအသဳဍုၚ်ဇၞော်ဇၞော် တံ တၞဟ်နဂွံထံက်ဂလာန်ကဵုဇကုလၟိုန်ဂှ် ဒးဂိုတ်ဂစာန်ရောၚ်။ မွဲအခိၚ်တေံ ခေတ်ကာလယျာဇြာအာရာဖါတ် ဒၟာနူဍုၚ်ဇၞော်ဇၞော်မွဲ ဟွံဒုၚ်တဲတုဲ ဍုၚ်ပါလိတ်သတာၚ်ဟွံကတဵုဒှ်ကၠုၚ်တုဲ ခက်ခုဲကၠုၚ်မံၚ်ဒဵုကဵုလၟုဟ်ရ။ ဂွံဍဟောဝ် ကဵုစၚ်ဂၠးတိမာန် ပ္ဍဲက္ဍိုပ်သကိုပ်ဗော်ဂှ် ညးမလေပ်ပညာတံ ဂပ်ဝ်ဒးနွံပၟိက်ဂၠိုၚ်ၚ်ရောၚ်။ နကဵုဗော်ဍုၚ်မန်တၟိ ဒက်ပ တန်အလဵုအသဳမန်ဟွံရုမ်ဂပ်က္ဍၚ် ယဝ်ဒှ်ဂှ် ဒးကေတ်အရီုအဗၚ်ကဵုဇြဟတ်ကောန်ဂကူမန်နူဂကောံနာနာတံတုဲ ဂပ်ဝ်ဒးပလေဝ်ပလေတ်လဝ်ရောၚ်။
0 comments :
Post a Comment