အဃောဇက်တိုန်ဒၟံၚ် ကံကုသဵုဇကု ဇကုသ္ဂောံဖန်ဖက်ကေတ်မာန်ပၠန် ပ္ဍဲကဵုဂၠံၚ်တရဴ ဂၠံၚ်ဍာံမွဲပ္ၚံက် ဒးဒုၚ်လေၚ်ဆောံဘဝ။ ဒးဒုၚ်စုတ်သ္ၚိစာတ် ဒးဒုၚ်အိုတ်ကၠေံလမျီု ကုပူဂဵုဆာန်ဂကူတအ်ဂှ် သ္ပသမ္တီရှ်ေသှ်ေရဴဂဴ ပ္တိုန်ဂုဏ်စရာဲတုဲ ခုတ်သ္ဂုတ်သွာတ်လဝ် တ္ၚဲဝွံဟေၚ်ရဂှ် ပ္ဍဲလိက်လလောၚ်တြး တ္ၚဲသၟာပရေၚ်ဍုၚ်ကွာန်မန် ဒးဒုၚ်စုတ်သ္ၚိစာတ် (အလန်ပထမ) ဂှ် ဓမံက်ထ္ၜးလဝ်နွံရ။
“တ္ၚဲဏံဂှ် တ္ၚဲကျပၞာန် သုဝဏ္ဏဘုံလီု သက္ကရာဇ် (၄၁၉) တေံ သၟိၚ်မနုဟဝ် ဒးဒုၚ်ရပ်အာဏောၚ် လအ်ကၠုၚ် (၉၅၆) သၞာံယျ။ ဒှ်တ္ၚဲသိၚ်သာဒးအောန်စိုတ်ဏောၚ် “ သာ်ဝွံ ကျာ်ဇၞော်အ္စာတၠ ပါလိတ ဘာဓါတ်ကျာ် ကွာန်ကၟာဝက် ဟီုပၟိၚ်ဏာဂလာန် ပ္ဍဲအခန်ကၞာဂှ်ရ။
ရန်တၟံကဵုညးဍုၚ်ကွာန်မန်ပိုဲ သၟတ်လက္ကရဴ စဴဗွဲဂတ ဂွံစၟတ်သမ္တီ ဂွံသ္ပရှ်ေသှ်ေရဴဂဴဒးတုဲ ကၠောန်ဗဒှ်ဏာ တ္ၚဲသၟာပရေၚ်ဍုၚ်ကွာန်မန် ဒးဒုၚ်စုတ်သ္ၚိစာတ်ဏံရောၚ်ဂှ်လေဝ် ဥက္ကဋ္ဌ ကၠောန်ဗဒှ် သၟာပရေၚ်ဍုၚ်ကွာန်မန် ဒးဒုၚ်စုတ်သ္ၚိစာတ် နာဲယက္ခ ဟီုရ။
“သၟိၚ်မနုဟဝ် ဒးဒုၚ်ရပ်ဏာကဵု သၟိၚ်ဗၟာအံၚ်ဇေယျ ကော်ဏာဍုၚ်ပ္ကာံတေံ ပ္ဍဲသက္ကရာဇ်သၞာံ (၄၁၉) ဂိတုဇှ်ေ (၁၁)မံက်ဂှ်တုဲ ညးဂမၠိုၚ်တုပ်စိုတ် ပ္ဍဲတ္ၚဲဏံ စၟတ်သမ္တီဏာ တ္ၚဲသၟာပရေၚ်ဍုၚ်ကွာန်မန် ဒးဒုၚ်စုတ်သ္ၚိစာတ်ကီုရ။ စပ်ကဵုဂွံပလေဝ် (ဝါ) ဂွံသ္ပဒတန်တ္ၚဲဝွံဂှ် ပ္ဍဲကဵုသဘၚ်သဳကၠဳ အလုံကောန်ဂကူမွဲမွဲ ဂွံသ္ပဒတန်မာန် နကဵုကမ္မတဳ ကၠောန်ၜိုတ်ရေၚ်တၠုၚ်ညးတံ ဆန္ဒနွံမံၚ်ဗွဲတၟေၚ်ရောၚ် “ဂှ်လေဝ် ညးဆက်ဟီုရ။
လၟုဟ်ပြဟ်ဟ်ဏံ ကံက်ဂွံလဝ်စရၚ် ညးဒးဒုၚ်စုတ်သ္ၚိစာတ် နွံတဴဗၞတ် (၉၀) တၠတုဲ ဂတနူဏံလေဝ် သွက်ဂွံဆက်ကံက်အာတုဲ ပ္တိတ်လိက်အုပ် နွံမံၚ်ဏောၚ်ဂှ်လေဝ် ဥက္ကဋ္ဌ တ္ၚဲသၟာပရေၚ်ဍုၚ်ကွာန်မန် ဒးဒုၚ်စုတ်သ္ၚိစာတ် နာဲယက္ခ ဆက်လဴထ္ၜးရ။
ကောန်ဂကူမန်ပိုဲအဆက်က် က္ဍိုပ်သ္ကိုပ်မန်ပိုဲတအ် ဗွဲမဂၠိုၚ်တံဂှ် ဒးဒုၚ်လဝ်ထံၚ်ရ။ တ္ၚဲသၟာပရေၚ်ဍုၚ်ကွာန် မန် ဒးဒုၚ်စုတ်ထံၚ် စၟတ်သမ္တီမွဲမွဲသာ်နွံတှ်ေ ခိုဟ်ကွေံရ အဃောနွံမံၚ် ပ္ဍဲထံၚ်တေံ ကေၚ်ချပ်လဝ်နွံရ။ လၟုဟ်လဂုဏ် တံ အ္စာယက္ခတံ နာဲဆီဂကူတံ ဗၠးတိတ်နူထံၚ်တုဲ။ ဂွံညာတ်ကေတ် တ္ၚဲသၟာပရေၚ်ဍုၚ်ကွာန်မန် ဒးဒုၚ်စုတ်သ္ၚိစာတ် စၟတ်သမ္တီဗီုဗီုဏံဂှ် သွက်ကောန်ထံၚ် သၟာပရေၚ်ဍုၚ်ကွာန်တံတှ်ေ မိပ်စိုတ်ဟွံမွဲကဵုပတောံၜတ်ရ။ ဂွံဇြဟတ်စိုတ်ဗွဲမလောန်ရ သာ်ဝွံ တၠဂုဏ်ဥက္ကံသ (ကော်)ဇြဝ်ဠာတ် ညးဒးဒုၚ်စုတ်လဝ်သ္ၚိစာတ်မွဲတၠဟီုရ။
နကဵုပရေၚ်ကမၠောန် ကမ္မတဳ သၟာပရေၚ်ဍုၚ်ကွာန်မန် ဒးဒုၚ်စုတ်သ္ၚိစာတ်တအ်ဝွံ နွံၜါသွာၚ်ရ။
ပ္ဍဲသွာၚ်ကမ္မတဳ ဂၠာဲသြန်ဘဏ္ဍာဂှ် (၁) ကမ္မတဳထ္မံက်ရုပ်ရဴ ဒုၚ်ဒါန်သောၚ်ကလး ။(၂) ကမ္မတဳအနုသုခုမ (၃) ကမ္မတဳကၠောန်ပတိတ် ကပေါတ်စၟတ်သမ္တီတအ်တုဲ ပ္ဍဲသွာၚ်ကမ္မတဳလလောၚ်တြးဂှ် (၁) ကမ္မတဳကၠောန်ပတိတ်လိက်ကၞပ် ကမ္မတဳပကောံစရၚ် သၟာပရေၚ်ဍုၚ်ကွာန်မန် ဒးဒုၚ်စုတ်သ္ၚိစာတ် (၃) ကမ္မတဳဆက်စၠောံ မ္ၚးဍုၚ် ပ္ဍဲဍုၚ်တအ် ပါလုပ်ရောၚ် ဂွံတီကေတ်ရ။
0 comments :
Post a Comment