ပရေၚ်ဗ္တောန်လိက်မန် ပ္ဍဲဘာအလဵုအသဳဂှ် ညးဂမၠိုၚ်သၟာန်တိုန်တုဲ ဖက်ဆောညးအုပ်ကာ စၠတ်ထဝ် နာဲသာန်တေန်သွဟ်ဏာရ။ ဒုၚ်သ္ဇိုၚ်ကဵု
ဝန်ဇၞော်ပရေၚ်ပညာကၟိန်ဍုၚ် ဟီုလဝ်ကၠာတေံဂှ်
ရဲပရိုၚ်တအ်ချုလဝ်ဂှ်ရ ပရိုၚ်မ္ၚးရတိတ်မံၚ် ဂွံအခေါၚ်ဗ္တောန်မ္ၚးအခိၚ်ရ အပ္ဍဲအခိၚ်ဘာဟီုမံၚ်ဂှ် မုဟွံဍာံပုဟ် ။ ဍာံဍာံဂှ်ဒဵုတ္ၚဲဏံ မုလေဝ်ပရေၚ် စၞောန်လဝ် ဟၟဲဏီပုဟ် သာ်ဝွံ ဖက်ဆောညးအုပ်ကာ စၠတ်ထဝ် နာဲသာန်တေန် သှ်ဟီုဏာ ပ္ဍဲကာလပေါဲသဳကၠဳ သောၚ်က္လးလ္တုဍုၚ်ဇြပ်ဗု တုဲကၠုၚ်ဂိတုဂျောန် (၆) ဂှ်ရ။
ပရေၚ်ဂွံအခေါၚ်ဗ္တောန်လိက်မန် ပ္ဍဲဘာတန်အလဵုအသဳဂှ် ပရိုၚ်တိတ်မံၚ် ဇၟာပ်ပွိုၚ်ဍုၚ်ရး ။ အဵု နူကၠၚ်ဏံဂှ်ရ ဖုၚ်စိုပ်ကၠုၚ်ပ္ဍဲအဲ ကျာ်ဇၞော်ဂွံအခေါန်ဗ္တောန်လိက်မန် ပ္ဍဲဘာဗၟာရ။ သီုဂွံအခေါၚ်ဗ္တောန်လိက် အပ္ဍဲအခိၚ်ဘာရောၚ် အ္စာၝောံ နူကွာန်တေံဆက်နၚ်ကဵုအဲ သာ်ဏံ ကျာ်ဇၞော်အ္စာ ကေတုမာလာ (ကော်) ဂုဏ်ဂျုက် ဘာကံပလိုၚ်ဂှ် ဟီုထ္ၜးရ။
ပရိုၚ်ဗ္တောန်လိက် ပ္ဍဲဘာတန်အလဵုအသဳဂှ ၜိုန်ရပရိုၚ်ပြးစိုပ်ဒၟံၚ် ဇၟာပ်ဍုၚ်ကွာန်ကီုလေဝ် ဒၞာဲလဵုလေဝ် ဟွံဂွံစဗ္တောန်ဏီပုဟ် ပိုဲအဃောချပ်ဇန်မံၚ်ဖိုဟ် ။ အကြာမွဲၜါတ္ၚဲဏံတှ်ေ ကောံဓရီုပိုဲနွံမံၚ် ပ္ဍဲပေါဲကောံဓရီုဂှ်တှ်ေ ပိုဲဗီုလဵုဂွံဆက်ပ္တိုန် ပိုဲချပ်စညးသ္ကအ်ပၠန်ရောၚ် နူကဆံၚ်လ္တုတေံ ၜိုန်ရဟွံဖျေံကီုလေဝ် နူသၟဝ်ဏံ ညးဍုၚ်ကွာန်ကဵု အမာတ်တအ် ဒှ်မွဲကသပ်တုဲ ပတိုန်တှ်ေဒးဂွံတွဵုရောၚ် ပိုဲစှ်ေစိုတ်ရဂှ် စၠတ်ထဝ် နာဲသာန်တေန် ဟီုရ။
ပရေၚ်ဗ္တောန်လိက်မန်ဂှ် ဟိုတ်နူပရိုၚ်ဂွံအခေါန်ဗ္တောန် ပ္ဍဲဘာတန်အလဵုအသဳရောၚ်ဂှ်တုဲ ဘာကောန်ဂကူ ကွာန်လ္ၚဵု ဒဵုကဵုဘာကြပ်လီုအာ နွံမံၚ်ရောၚ် ညးတာလျိုၚ် ဂကောံရေၚ်တၠုၚ်ပရေၚ်ပညာမန်တအ် ဟီုထ္ၜးရ။ ဗီုကဵုဘာပရေၚ်ပညာဂကူမန် ဖက်ဆောတန်သၠုၚ် ကွာန်ကံဝါန် ပွိုၚ်ဍုၚ်ကျာ်မြဟ်ဂှ်တှ်ေ ကြပ်လီုအာမံၚ် ။အ္စာၝောံ တအ်ဂှ်လေဝ် ဒုၚ်ထောံတဲ သွက်ဂွံဗ္တောန်လိက်မန် ပ္ဍဲဘာဗၟာဂှ် အ္စာဂှ်လေဝ်ယအ် ကွးဘာတအ်ဂှ်လေဝ် ပြံၚ်စိုပ်အာ ဘာဗၟာဂၠိုၚ် ဘာဂှ် ပိုဲဒးထိၚ်လဝ် တၟာကလှ်ေ “ သာ်ဏံ ညးက္ဍိုပ်ဂကောံရေၚ်တၠုၚ် ပရေၚ်ပညာမန် နာဲသိုက်ဆီဟီု ထ္ၜးရ။
စပ်ကဵုပရေၚ်ဂွံအခေါၚ်ဗ္တောန်လိက်မန် ပ္ဍဲဘာတန်အလဵုအသဳဂှ် ပရိုၚ်ပြးစိုပ်မံၚ် ဒၞာဲကောန်ဂကူမၞုံဂှ်တုဲ ကွးဘာပ္ဍဲဘာကောန်ဂကူ ကွာန်ဗွဲမဂၠိုၚ် ကွးဘာတအ်ယအ်ဒၟံၚ် ဒၞာဲဗွဲမဂၠိုၚ်ရောၚ်။ ဆဂး ဘာလဵုယအ် ဘာဂှ်ယအ် ဂလိုၚ်လဵုဂှ် ဟွံဂွံလ္ၚတ်ချိုတ်တ်ပၠိုတ်တ်ဏီတုဲ ဟီုဟွံဒးဏီ သာ်ဝွံ ဥက္ကဌ ပရေၚ်ပညာ ပွိုၚ်ဍုၚ်ဇြပ်ဗု မိသိုက်ပိုန်ဟီုထ္ၜးရ။
ပရေၚ်ပညာကောန်ဂကူမန် အပ္ဍဲဍုၚ်ဂှ် ဟိုတ်နူရောအ်ရေၚ် ဒှ်အခက်ခုဲကဵု ပရေၚ်ဗ္တောန်လိက်မန် ပ္ဍဲဘာတန်အလဵုအသဳဂှ်တုဲ မွဲၜါတ္ၚဲဏံ ဂကောံရေၚ်တၠုၚ် ပရေၚ်ပညာကောန်ဂကူမန် ကဵု ဌာန ပရေၚ်ပညာဗဟဵု ဗော်ဍုၚ်မန်တၟိ ကေုာံ ခမဳသၚ်တအ် သွက်ဂွံဆဵုဂဗညးသ္ကအ် နွံရောၚ်ဂှ်လေဝ် နာယကဂကောံမရေၚ်တၠုၚ် ပရေၚ်ပညာကောန်ဂကူမန် လ္ပာ်ခမဳသၚ် ကျာ်ဇၞော်အ္စာ သဳလဝန္တ နူဘာဟံသာထဝ် ဍုၚ်ဇြပ်ဗုဟီုထ္ၜးရ။
0 comments :
Post a Comment