နူကနေံတေံ ဂိတုပသာ် (၉) စွေက် June 2 ဂှ် ဂကောံဗ္တောန်လိက်ပတ်မန် ဥတုက္ညၚ် ပွိုၚ်ဍုၚ်ဇြပ်ဗု ကၠောန်သ္ပသဘၚ်စှ်ေဘာ ပွိုၚ်ဍုၚ်ဇြပ်ဗု ဒၞာဲဘာဟံသာထဝ်တုဲ ညးမဒှ်ဥက္ကဋ္ဌ ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ ကျာ်ဇၞော်အ္စာသဳလဝန္တ ဟီုကဵုဏာ သတိကဵုသၟတ်ကွးဘာဂမၠိုၚ် သာ်ဂှ်ရ။
ပ္ဍဲသဘၚ်စှ်ေဘာ ဥတုကညၚ်ပွိုၚ်ဍုၚ်ဂှ် ဂကောံကမ္မတဳ လိက်ပတ်ယေန်သၞာၚ် ပွိုၚ်ဍုၚ်ကီု ဂကောံဗ္တောန်လိက်ပတ်မန် ကေုာံယေန်သၞာၚ်ဗုဒ္ဓဘာသာကီု ဂကောံဗော်ပရေၚ်ဍုၚ်ကွာန်မန်ဂမၠိုၚ်ကီု ဂကောံအစောန်စရာဲညးဗြဴမန် (မိစဴဗု) ကီု သီုသၟတ်ကွးဘာဖအိုတ် ဗၞတ်(၉၀၀) တိုန်စိုပ်ရ။
စပ်ကဵုပရေၚ်သၟတ်မန် သုၚ်စောဲမံၚ်ဂဥုဲၜူမာဲဂှ် ကတဵုဒှ်ဒၟံၚ်ဇၟာပ်ဍုၚ် ဇၟာပ်ကွာန် အလုံရးမန်မွဲတုဲ ဂကောံမဟာဇန်နာနာ။ ဗော်ပရေၚ်ဍုၚ်ကွာန်နာနာ ဂကောံခမဳသၚ်ကျာ်ဇၞော်အ္စာဂမၠိုၚ် ဒှ်ဓဝိၚ် သၟတ်တအ်ဒ္ဂေတ် ပဋိပတ်လီုလာ်တုဲ ဆဝ်မ္ၚုဟ်ကဵုမံၚ်သတိကဵုသၟတ်တံ ညံၚ်ဟွံဂွံသုၚ်စောဲဂဥုဲၜူမာဲရ။
“ပရေၚ်ဂဥုဲၜူမာဲဂှ် သုၚ်စောဲဍေံတုဲတှ်ေ ဂုဏ်ဖဵုသွက်သၟတ်ပိုဲ မုဟွံမွဲပုဟ် ညးမကၠောန်မံၚ် ပရေၚ်ပိုန်ဒြပ်တံ ညးမတက်ပလီုဒၟံၚ်က္ဍဟ် သၟတ်ကောန်ဂကူပိုဲတံရ ပတိတ်ဏာပရဲရောၚ် ဟိုတ်ဂှ်ရ ဂဥုဲၜူမာဲဂှ် သၟတ်တံလ္ပသုၚ်စောဲ ညိ အန္တရာဲသွက်ဂကူပိုဲကီု အန္တရာဲသွက်သၟတ်တံကီု အန္တရာဲဇၞော်ဇၞော်မွဲရောၚ်” သာ်ဝွံ ကျာ်ဇၞော်အ္စာသဳလဝန္တ ထပ်ကဵုသတိရ။
ညးမဒှ်ဥက္ကဋ္ဌ ဂကောံအစောန်စရာဲညးဗြဴမန် အ္စာၝောံ မိအုမ်ယျဳ ဂှ်လေဝ် “အဲဂွံဆဵုကေတ်လၟိဟ်ကွးဘာ ဂလိုၚ်ဏံဂှ် အဲမိပ်စိုတ်ကွေံကွေံရ ကွးဘာဂလိုၚ်ဏံ နကဵုအဲမွဲလှ်ေလေဝ် ဟွံကေၚ်ဆဵုဏီရ။ လၟိဟ်ဂၠိုၚ်တုဲတှ်ေ ဍာ်ဒကေဝ်လေဝ်ဒးနွံကီုမှ ကာလဂှ်မှ ပရေၚ်လိက်ပတ်မန်ပိုဲကီု ပရေၚ်ယေန်သၞာၚ်မန်ပိုဲကီု ပရေၚ်ကောန်ဂကူပိုဲကီု ဂွံအာစိုပ်တရဴမာန်ရောၚ် “ သာ်ဝွံ ဥက္ကဋ္ဌ ဂကောံအစောန်စရာဲညးဗြဴမန် အ္စာဗြဴ မိအုမ်ယျဳ ဟီုရ။
ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ ပွိုၚ်ဍုၚ်ဇြပ်ဗုဂှ် စပ္တံနူ တန်ယေန်သၞာၚ် တန်ဝၚ်ဟံသာဝတဳ တန်အဘိဓရ် တန်ဝၚ်လိက်ပတ်မန် တန်ဝၚ်မတ္တမ တန်သုဝဏ္ဏဘုံ တန်လောကနဳတိ ကဵု တန်အခိုက်ကၞာမန် ကွးဘာနူကဵုကွာန်ဂမၠိုၚ် လုပ်သွဟ် ပ္ဍဲကဆံၚ်ပွိုၚ်ဍုၚ်ရ။
ကွးဘာလုပ်သွဟ်လဝ် ပ္ဍဲကဆံၚ်ပွိုၚ်ဍုၚ်ဂမၠိုၚ်ဂှ် တန်ယေန်သၞာၚ်ဂှ် မိမြဟ်သန် နူကွာန်အနေၚ်ဂှ် ကလိဂွံလာပ်ပထမ။ တန်ဝၚ်ဟံသာဝတဳဂှ် မိကောန်ထဝ် ကွာန်ကျာ်ပန်ဂှ် ပထမ။ တန်အဘိဓရ် မိလျးဂကူ နူကွာန်အနေၚ် ပထမ။ တန်ဝၚ်လိက်ပတ်မန်ဂှ် မိအီကျေဝ် ကွာန်တံၚ်ဖလုတ်ဂှ် ပထမ။ တန်မတ္တမ မိမာဂျုရဳ ကွာန်တံၚ်ဖလုတ် ပထမ။ တန်သုဝဏ္ဏဘုံ မိပ္ကဴသစ္စ ကွာန်ကြုၚ်ကြုက် ပထမ။ တန်လောကနဳတိ မိအီထဝ် ကွာန်ကြုက်ပိ ပထမ။ တန်အခိုက်ကၞာမန်ဂှ် မိသိုက်နန် ကွာန်သၞေဟ်ကိုၚ် ကလိဂွံလာပ်ပထမအိုတ်ရ။
ကွးဘာဥတုကညၚ် သွက်ဂွံလုပ်သွဟ် ပ္ဍဲကဆံၚ်ပွိုၚ်ဍုၚ်ဖအိုတ် ပၠုပ်လဝ်စရၚ် နွံ(၈၀၈) တၠတုဲ လုပ်သွဟ်ဂှ် (၇၅၃)တၠရ ပ္ဍဲဂှ် ကွးဘာအံၚ် (၅၈၄)တၠတုဲ ကွးဘာကျဂှ် (၁၆၉)တၠရ။
0 comments :
Post a Comment