ပ္ဍဲစၟတ်တ္ၚဲ ၁၆၊ ၁၂၊ ၂၀၁၂ ဂှ် ကမ္မတဳတ္ၚဲသၟတ်မန် မဒက်ပ္တန်လဝ် ပ္ဍဲဍုၚ်မလေဝ်သျှာ သွက်ဂွံကၠောန်ဗဒှ် တ္ၚဲသၟတ်မန်အလန် ပဌမဂှ် ကောံဓရီုချပ်သဳကၠဳစ သွက်အစဳဇန် ဂွံကၠောန်ဗဒှ်တ္ၚဲသၟတ်မန် ပ္ဍဲစၟတ်တ္ၚဲ ၂၈၊ ၁၂၊ ၂၀၁၂ တေံရောၚ်ဂွံတီကေတ်ရ။
ဥက္ကဌ ကမ္မတဳကၠောန်ဗဒှ် တ္ၚဲသၟတ်မန် နာဲရတ်နန်၊ သီုကမ္မတဳတိုၚ် ကေုာံ ကောန်ဂကောံတံဖအိုတ် သဳကၠဳအာပရေၚ်က မၠောန်ဂမၠိုၚ်တုဲ ဥက္ကဌ ဂကောံသၟတ်မန်-တိဍာ်ဗၠးၜး-သ္ကုတ်မလေဝ်သျှာ နာဲဥက္ကာ၊ အ္စာဘာ MRCEC နာဲဗိုတ်တံလေဝ် သဳကၠဳ ကဵု ပရေၚ်ကမၠောန် သ္ဂောံကလိတ်ကလောတ်ဗွဲတရးကီုရ၊
သၟတ်စိုတ်မလုပ်စကဵု ပရေၚ်ကမၠောန်တ္ၚဲသၟတ်မန် ၜိုတ် ၂၅ တၠတံတိုန်စိုပ်တုဲ ဆေက်စပ်ကဵုသွာၚ်ကမၠောန်ဂမၠိုၚ် ပါ်ပရအ်ဏာ တာလျိုၚ်သွာၚ်ညးကဵုညးရ။
“ပိုဲဂှ်ဒုၚ်ဂိုၚ်ကေတ် အတိုၚ်တၚ်သ္ဂုတ်သွာတ် နူပေဲါသၠာဲဂတးလညာတ်သၟတ်မန် အလန်တတိယဖျေံလဝ် စၟတ်တ္ၚဲ ၂၈၊ ဂိတုဒဳ ဇြေန်ဗာ၊ ၁၉၄၆ တေံ အခိၚ်သၟတ်မန်တံ စချဳဓရာၚ်ကၠာအိုတ် ကၠောန်သ္ပကောံဓရီု ဒက်ဂကောံသၟတ်ဂှ် နူပေဲါသၠာဲလညာတ် သၟတ်မန်တံဖျေံလဝ် သ္ပဒတန်ဂှ် ပိုဲသၟတ်မန်မစိုပ်မလေဝ်သျှာလေဝ် ဒုၚ်ဂိုၚ်ကေတ် ဂွံဒှ်မွဲရမျာၚ်တုဲ ကၠောန်သ္ပအသေဟာန်ဏံ ရောၚ်” သာ်ဝွံ ဥက္ကဌ ဂကောံသၟတ်မန်-တိဍာ်ဗၠးၜး-သ္ကုတ်မလေဝ်သျှာ နာဲဥက္ကာဟီုရ၊ “တုဲပၠန်သၞာံဏံဂှ် အလန်ကၠာအိုတ်တှ်ေ ဍေံဟွံမြဟ်တမ္ညဝ်ကွေံပုဟ် ဣဏံဂှ်တၚ်ကော်ချဴကဵုတ္ၚဲသၟတ်မန်ရ” သာ်ဝွံညးဆက်ဟီုရ။
အပ္ဍဲဍုၚ်တေံ နူဌာန်ကောံသၟတ်မန် Mon Youth Forum က္ဍိုက်က္ဍိုပ်တုဲ နူကနေံတေံ ပံက်ဏာကမ္မတဳရောၚ် ညးဆက်စပ်ကဵု ဌာန်ကောံသၟတ်မန်မွဲတၠဟီုရ၊ အသေအဟာန်အပ္ဍဲဍုၚ်တေံဂှ် ကၠောန်သ္ပအာ ပ္ဍဲကဵုခရိုၚ်မတ်မလီု၊ ပွိုၚ်ဍုၚ်လှာဒကှ်၊ ကွာန်ဒဵု ထောၚ်တေံရောၚ် သာ်ဝွံထမံက်ထ္ၜးလဝ် ပ္ဍဲလိက်ဆဝ်မ္ၚုဟ်သွက်သ္ဂောံကၠောန်ဗဒှ် တ္ၚဲသၟတ်မန် မပတိတ်လဝ် နူဌာန်ကောံ သၟတ်မန်တေံကီုရ။
ပ္ဍဲဂကောံသၟတ်မန် မသ္ပလဝ်အ္စာံဂှ်ဝွံ ဥက္ကဌ မန်သာန်လှိုၚ်၊ ဒုဥက္ကဌ မန်ဘလံၚ်၊ ညးအုပ်ကာ မန်သိၚ်ထောန်အံၚ်၊ ကေုာံ ဂကောံကေၚ်ကာမန်သာန်လှ၊ နာဲသိုက်သြန် ကော်နာဲၚိုဲတိၚ် (ဥက္ကဌဗော်ဒဳမဝ်ကရေသဳမန် M.D.P လၟုဟ်)၊ မန်မျာတ်ထောန် သၟတ်တံဏံပါလုပ်တုဲ ဒက်ပတန်ကၠုၚ် နကဵုတၠပညာသၞာဲဒါဂကူမန် ကေုာံ ကွးဘာသၟတ်မန် ပ္ဍဲဍုၚ်လ္ဂုၚ်တေံရ၊
ပေဲါသၠာဲဂတးလညာတ်သၟတ် အလုံဒေသရးမန်ဝွံ စကၠောန်ကၠုၚ် ပ္ဍဲစၟတ်တ္ၚဲ ၁၀ စိုပ် ၁၂၊ ဂိတုဖေဖဝ်ဝါရဳ၊ ၂၀၀၇ (အလန်ပဌမ) ကၠောန်ဗဒှ် ပ္ဍဲခရိုၚ်ထဝဲါ ကွာန်ကာန္နဳ၊ စၟတ်တ္ၚဲ ၁၄ စိုပ် ၁၆၊ ဂိတုအံက်တဝ်ဗာ ၂၀၀၉ (အလန်ဒုတိ ယ) ပ္ဍဲခ ရိုၚ်မတ်မလီု၊ ပွိုၚ်ဍုၚ်လှာဒကှ် ပ္ဍဲကွိက်ခွိ၊ စၟတ်တ္ၚဲ ၂၄ စိုပ် ၂၆၊ ဂိတု ဨပရေဝ် ၂၀၁၂ (အလန်တတိယ) ကၠောန်ဗဒှ် ပ္ဍဲကွာန်ဝါဗိုၚ် ခရိုၚ်ထဝဲါတုဲမှ တ္ၚဲသၟတ်မန် က္တဵုဒှ်ကၠုၚ်ရောၚ် သ္ဂောံတီကေတ်ရ။
0 comments :
Post a Comment