ပ္ဍဲအသေဟာန်ဝွံ ရာမညနိကာယ ဘာမန်ကဠၚ် ကျာ်ဇၞော်ရာမညနိကာယ၊ ဒုဥက္ကဌ သြန်ဂအုံဂကူမန် နာဲဝိလာမန်၊ ညးတာလျိုၚ်ဂကောံဟံၚ်ပြာ်မန် နာဲကယျိုၚ်မန်၊ အ္စာဘာပရေၚ်ဍုၚ်ကွာန် ဂကောံသၟတ်မန်-တိဍာ်ဗၠးၜး-သ္ကုတ်မလေဝ်သျှာ နာဲရာမညအီဆာဲ၊ စၞးဂကောံညးဗြဴမန် မိသိုက်ရတ်တံ ပၠဏာတရဴ နဒဒှ်သဘာပတိတုဲ ညးအုပ်ကာကမ္မတဳ ကၠောန်ဗဒှ်တ္ၚဲသၟတ်မန် အလန်ပထမ နာဲဗညာရာဇာ ရေၚ်တၠုၚ်ဏာအသေအဟာန်ရ။
ပထမကိုပ်ကၠာ ကျာ်ဇၞော်ဝိရိယဟီုဂလာန်သြဝါဒ၊ နာဲဝိလာမန် ဟီုဂလာန်ဗ္ကန်၊ နာဲကယျိုၚ်မန် ဟီုဂလာန်မိပ်စိုတ်၊ မိသိုက်ရတ် ဟီုဂလာန်ပၟိၚ်ဂလာန်၊ နာဲရာမညအီဆာဲ သောၚ်ကလးဏာပရူပရာ တ္ၚဲသၟတ်မန်ရ။ တုဲမ္ဂး ကောန်ဂကောံ ဂကောံသၟတ်မန်-တိဍာ်ဗၠးၜး-သ္ကုတ်မလေဝ်သျှာ နာဲအံၚ်သိုက်နန် ဗှ်ထ္ၜးလိက်လလောၚ်တြး နူဌာန်ကောံသၟတ်မန် (M.Y.F)၊ နာဲရတ်နန် ဥက္ကဌ ကမ္မတဳကၠောန်ဗဒှ်တ္ၚဲသၟတ်မန် အလန်ပထမ ဗှ်ထ္ၜးလိက်လလောၚ်တြး ဂကောံသၟတ်မန်-တိဍာ်ဗၠးၜး-သ္ကုတ်မလေဝ်သျှာတုဲ ပ္ဍဲမၞိဟ်တိုန်စိုပ်ကၠုၚ်ပိတၠဂှ် နာဲဝၚ်တၟး ညးအုပ်ဂကောံသၟတ်တြေံ၊ နာဲအံၚ်ဇၞးဆာန် (နူဒေသပဳနာန်) ကေုာံ နာဲဥက္ကာ ဥက္ကဌ ဂကောံသၟတ်မန်တံ ဗွဲတၟေၚ်ကဵုဏာလညာတ် ပ္ဍဲကဵုတ္ၚဲသၟတ်မန်ဏံရ။
တုဲမ္ဂး ကေၚ်ကာကမ္မတဳတ္ၚဲသၟတ်မန် နာဲရတ်ပံၚ် သောၚ်ကလးပရူပရာစရၚ်သြန် လုပ်/တိတ် ဗွဲသရောပ်ရ၊ သွက်ပရိဿာတ်တံ စိုတ်ဓါတ်ဂွံမြဟ်မာန်ဂှ် နာဲမဟူမာန်၊ နာဲဆာန်ဠာန်၊ နာဲဟံၚ်မန် ကေုာံ သၟတ်မန်နူဒေသကဠၚ်၊ ကပေါန်တံက္ဍိုက်က္ဍိုပ်တုဲ ဒယှ်ေလဟိၚ်ထ္ၜးဏာကဵု ဒွက်ပရေၚ်ဂကူ မၞုံယၟု ဒွက် “မန်” “ဂွံတီဒဒှ်ဍိက်ဗှ်ရံၚ်လိက်ဝၚ်” ကေုာံ “ၜိုပ်ထဝ်အဲၜိုပ်ထဝ်နာဲ” တံ (၃) ပိုတ်ကီုရ။
အသေဟာန်ဝွံ စနူအခိၚ်လဒေါဝ်တ္ၚဲ ၁၂:၀၀ နာဍဳဂှ် စပံက်ဏာအသေဟာန်တုဲ စဵုကဵုစိုပ်သဝ်တ္ၚဲ ၂:၀၅ မိနေတ်ဂှ် တုဲဒှ်အာရ၊ သၟတ်ကေုာံ ညးမဆာန်ဂကူမန် ဗၞတ် ၈၀ တၠပြၚ်ၚ် တိုန်စိုပ်တုဲ တုပ်ဗီုတ္ၚဲသၟတ်မန် ကၠောန်ဗဒှ်ပ္ဍဲကၟိန်ဍုၚ်မလေဝ်သျှာကီု ပ္ဍဲရာမညဍုၚ်မန်တေံလေဝ် ဌာန်ကောံသၟတ်မန် (M.Y.F) က္ဍိုက်က္ဍိုပ်တုဲ ကၠောန်ဗဒှ်ဏာ ပ္ဍဲကွာန်ဒဵုထောၚ် (ဌာန်ဂအုပ်ခရိုၚ်မတ်မလီု) တိဍာ်ဗော်ဍုၚ်မန်တၟိရောၚ်။
ကၟိန်ဍုၚ်ပံၚ်ကောံ အမေရိကာန်တေံလေဝ် စၟတ်တ္ၚဲ ၂၉ ဂိတုဒဳဇြေမ်ဗာ ၂၀၁၂ ဂှ် ချိၚ်လဝ်ကၠောန်ဗဒှ်အခန်ကၞာကီုရောၚ် ဂွံလဝ်ပရိုၚ်ရ။
သ္ပလဝ်အစာံကဵု သၟတ်မန်ခေတ်တၟိတံ စချဳဒရာၚ်ဒက်ပ္တန်ကၠုၚ်ဂကောံသၟတ် ပ္ဍဲသက္ကရာဇ်ခရေတ် သၞာံ ၁၉၄၆၊ ဂိတုဒဳဇြေမ်ဗာ၊ စၟတ်တ္ၚဲ ၂၈၊ သက္ကရာဇ်ဍုၚ် ၁၃၀၈ ဂိတုပုဟ် ၆ မံက် တ္ၚဲသ္ၚိသဝ်ဂှ်တုဲ နူပေဲါသၠာဲဂတးလညာတ်သၟတ်မန် အလုံဒေသရးမန်တံ သ္ပဒ္တန်တုပ်ကၠုၚ်စိုတ် “တ္ၚဲသၟတ်မန်ရ”
ညးပါလုပ်လဝ် ပ္ဍဲဂကောံသၟတ်အခိၚ်တေံ ဥက္ကဌ ဗော်ဒဳမဝ်ကရေဇြဳမန် နာဲသိုက်သြန် ကော် နာဲၚိုဲတိၚ် သှ်ေတဴမံၚ်မွဲဏီရောၚ် သ္ဂောံတီကေတ်ရ။
0 comments :
Post a Comment