ပတိုန်ဂုဏ်စရာဲကုညးတၠဒါန်(လာၚ်အေန်တာနိတ်)ပ္ဍဲဌာန်ကောံသၟတ်မန်

အသေအဟာန်ပ္တိုန်ဂုဏ်စရာဲ ကုညးတၠဒါန် (လာၚ်အေန်တာနိတ်) ပ္ဍဲဌာန်ကောံသၟတ်မန်ဝွံ ပ္ဍဲစၟတ်တ္ၚဲ ၂ ဂိတုဒဳဇြေန်ဗာ သၞာံ ၂၀၁၂ ဂှ် ကၠောန်ဗဒှ်ဏါပ္ဍဲဌာန်ကောံသၟတ်မန် ပူဒူပလာဇြာ လတူဍုၚ်ဇၞော် ကွာလာလာမ်ပူရ။ အသေအဟာန်ဝွံ ညးအုပ်ကာနာနာ ဂကောံသၟတ်မန်-တိဍာ်ဗၠးၜး သ္ကုတ်မလေဝ်သျှာ နာဲဝၚ်တၟး ရေၚ်တၠုၚ်ဏါ လျိုၚ်အသေအဟာန်ရ၊ ပ္ဍဲအသေအဟာန်ဂှ် ပထမကိုပ်ကၠာ ဥက္ကဌ ဂကောံသၟတ်မန်-တိဍာ်ဗၠးၜး နာဲဥက္ကာ ဟီု ဗ္ကန်ဂလာန်တုဲ ဥက္ကဌ ကမ္မတဳကၠောန်ဗဒှ်လိက်လၟေၚ် “ဗညာဓရာံ” ကေုာံ ဂျာနေဝ် “လၟေၚ်ၜိုပ်ၜါ” နာဲရာမညအီဆာဲ ဟီုဂလာန်စပ်ကဵုသွာၚ်ပရိုၚ်၊ သွာၚ်ကွတ် “IT” ဗီုဒှ်အထံက်အရီုကဵုသၟတ်မန်တုဲ နူကဵုညးစၞး ဂကောံတၠဒါန် နူဂကောံထံက်ပၚ် လိက်ပတ်ယေန်သၞာၚ်မန် စိုပ်မလေဝ်သျှာ ဒေသသၞေဟ်ဂၠုၚ် သူၚာဲဗုဿရ၊ တုဲမ္ဂးစၞး ကောန်ဂကောံသၟတ်မန်-တိဍာ်ဗၠးၜး နာဲဆာန်ဠာန် ဟီုဂလာန်မိပ်စိုတ်ရ။ ဆက်တုဲ ဥက္ကဌ ဂကောံသၟတ်မန် ဥက္ကဌ နာဲဥက္ကာ ပအပ်ဇိုန်ဏှၚ်ကဵု တဆိပ်ကြာပ္တိုန်ဂုဏ်စရာဲ ကုညးစၞးဂကောံထံက်ပၚ် လိက်ပန်ယေန်သၞာၚ်မန် ကွာန်ကံဍောတ် စိုပ်မလေဝ်သျှာ ဒေသသၞေဟ်ဂၠုၚ် သူၚာဲဗုဿ နာဲထာဝရဟံသာရ၊ စိုပ်အ္ခိၚ်နူဂယး ၁၀:၄၅ မိနေတ်ဂှ် ရုပ်ကၠေံအသေအဟာန် နကဵုဒွက်ကောန်ဂကူရ၊ ဂကောံထံက်ပၚ်လိက်ပတ်ယေန်သၞာၚ်မန် ကွာန်ကံဍောတ် စိုပ်ဌာန်မလေဝ်သျှာ ဒေသသၞေဟ်ဂၠုၚ် သူၚာဲဗုဿဝွံ သွက်ရုၚ်ဌာန်ကောံသၟတ်မန် သ္ကောံက္လိဂွံ လာၚ်အေန်တာနိတ်မာန် နကဵုဇြဟတ်သြန်ညးတံ ဘိုၚ်ထံက်ပၚ်ရေၚ်တၠုၚ်လဝ်ကဵုတုဲ နာဲအကးပေၚ်လေဝ် သွက်ဌာန်ကောံသၟတ်မန် ဂွံဂ္ဇံက်လာၚ်အေန်တာနိတ်မာန် ဒုၚ်လဝ်ကဵုလျိုၚ်နွံရောၚ်၊ ညးတၠကွတ် IT နာဲဉာဏလေဝ် သွက်ကောန်ဂကောံသၟတ်မန်တံ သ္ဂောံစိုန်သ္ကီု အရာကွတ် IT မာန် ဘိုၚ်ကဵုလဝ်အရီုဗၚ်နွံရ၊ ပ္ဍဲအသေအဟာန်ဝွံ ကွးဘာသၠုၚ်ပ္တိုန်လညာတ် ကေုာံ ပရေၚ်အာက္ဍိုပ်ဂမၠိုၚ် ကေုာံ ကမ္မတဳကေၚ်ကာ သၟတ်မန်ဂမၠိုၚ် ဗၞတ်လၟိဟ်မၞိဟ် (၁၅) တၠပြၚ်ၚ် တိုန်စိုပ်ရောၚ် ဂွံတီကေတ်ရ။