ပရိုၚ်ကဴဝဴ တ္ၚဲအၚာ၊ ဒဳဇြေမ်ဗာ ၁၄၊ ၂၀၁၂
ညးအုပ်ဓုပ်ဂကောံကွာန်ကောန်သၟိၚ် (မၚ်းသား) ကၠုၚ်ဖျေံ အာစာဘာဗၟာ ပ္ဍဲဘာကောန်ဂကူမန် ကွာန်ဂြၚ်စိၚ် ကေုာံ ကွာန်ဆတ်တဝ် မၞုံအပ္ဍဲခရိုၚ်ထဝဲါ၊ ပွိုၚ်ဍုၚ်ဍာ်ဗုတံဂှ်တုဲ ညးတာလျိုၚ်ဘာမန်တံ ဟွံဒုၚ်တဲဂှ်ရ ဒးဒုၚ်ဘပဠလဝ်ရောၚ်ဂှ် ဂွံတီကေတ် နူအာစာၝောံမန်တံရ။
“ဒဳဇြေမ်ဗာ ၇ ဂှ် ဍေံကၠုၚ်ဖျေံ အာစာၝောံဗၟာဍေံ။ ပိုဲဟွံဒုၚ်တဲတုဲ တ္ၚဲယးဂှ် ဍေံကၠုၚ်ညာန်လဝ် ဆဆဵု။ ဍေံကၠုၚ်ဟီု ယုတ်ယုတ်မာမာ ပပ်ပပ်ပဳပဳ” သာ်ဝွံ အာစာၝောံ နူကွာန်ဂြၚ်စိၚ် မွဲတၠ ဟီုရ။
သကိုပ်အုပ်ဓုပ်ကွာန် ကောန်သၟိၚ် ဥူတာန်နာၚ် ကေုာံ ပၞာန်မၚ်ကွာန် ၃ တၠတံ နကဵုလွဟ် ကၠုၚ်လက်ချဴ ဘပဠလဝ်ရောၚ် အာစာၝောံဂှ် ဟီုရ။
“ပိုဲတံ အာတ်မိက်လဝ်လေဝ် ဟွံမွဲပုဟ်။ ဍေံကၠုၚ်စွံကေတ် အတေၚ်၊ တုဲပၠန် သၞာံဗ္တောန်ပညာလေဝ် ကြပ်အိုတ်မံၚ်ရတှ်ေ ပိုဲဟွံဒုၚ်တဲ” သာ်ဝွံ ညးမပါလုပ် ပ္ဍဲဂကောံအုပ်ဓုပ်ကွာန်ဂြၚ်စိၚ် မွဲတၠ ဟီုရ။
ဘာမန်တံဂှ် လောန်ကၠုၚ် ၜိုတ် ၃၀ သၞာံ ကိုပ်ကၠာနူဗော်ဍုၚ်မန်တၟိ ဟွံဂွံဒေံါပန်ပှော် အလန်ပထမ ကုအလဵုအသဳပၞာန်ဂှ်ဟေၚ် ပ္တန်ကၠုၚ်လဝ်ရောၚ် ဂွံတီကေတ်ရ။
အခိၚ်ကာလ သကိုပ်ဗျူဟာ သကိုပ်ဗိုလ်ဇၞော် မျဵုဝေန် ဓဇန်ကြာန် ကတံၚ်ကတူဒၟံၚ် လပါ်သကုတ်ရေဝ်သၠုၚ်ကျာကီု လပါ်ဒေသဍာ်ဗုတံကီုဂှ် ဘာကောန်ဂကူမန် မၞုံမွဲဒမြိပ်ဂၠံၚ်ကွဳစက် ရေဝ် - ထဝဲါ မပ္တံကဵု ကွာန်ဒဵုသဇၚ်၊ ကၞအ်ဂြုန် (ချပုံ)၊ ကွာန်ကအ်တံ ဗွဲမဂၠိုၚ် ဒးဒုၚ်ကၟာတ်ထောံကီုလေဝ် ဘာကောန်ဂကူမန် မပ္တံကဵု ကွာန်ဂြၚ်စိၚ်၊ ဆတ်တဝ်တံဂှ် ညံၚ်ဟွံဂွံလီု ထိၚ်ဒဝ်ကၠုၚ်လဝ်မာန်ရ။
ပ္ဍဲဘာတန်မူလ ကွာန်ဂြၚ်စိၚ်ဂှ်မ္ဂး ကွးဘာ ၜိုတ် ရ၀ တၠ၊ ဘာဆတ်တဝ်ဂှ် ကွးဘာ ၜိုတ် ၅၀ တၠတံ ဗ္တောန်ဒၟံၚ်ပညာရောၚ် ဂွံတီကေတ်ရ။ ပ္ဍဲကွာန်တံဂှ်မ္ဂး ဘာကောန်ဂကူဟေၚ် မၞုံတဴတုဲ ဘာအလဵုအသဳ ဟွံမွဲဏီရ။
0 comments :
Post a Comment