ဒပ်အလဵုသဳ ဟွံကဵုပရိုၚ်မွဲသာ် ၜက်လုပ် ချဳဒရာၚ် ပ္ဍဲဗွိုၚ်တိဍာ် ဗော်ဍုၚ်မန်တၟိ

ကြဴနူဗော်ဍုၚ်မန်တၟိ ဒိုအ်ပန်ပှော်ကဵု အလဵုသဳတုဲ ဒပ်အလဵုသဳ သီုဟွံကဵုပရိုၚ် မွဲသာ် လုပ်ချဳဒရာၚ် ပ္ဍဲဗွိုၚ်တိဍာ် ဗော်ဍုၚ်မန်တၟိ ( NMSP)  ဒေသခရိုၚ်ထဝါဲ ဗၟံက်ဍုၚ်ရေဝ် တေံရ သာ်ဝွံ ညးလျိုၚ်မွဲတလ နူဗော်ဍုၚ်မန်တၟိ ဟီုရ။
“ တ္ၚဲဏံ ဒပ်အလဵုသဳ နူခမရ ၅၈၃
ဟွံကဵုသမ္တီမွဲသာ် လုပ်ကၠုၚ် ပ္ဍဲဗွိုၚ်ဒ္တန်ဒပ် ပိုဲရ။ လုပ်ကၠုၚ်ဗီုဏံတှ်ေ ဗၠေတ်မှာ ဒှ်ပန်ညးသ္ကအ် မာန်မံၚ်၊ ဒှ်သာ်ဂှ်ရ ဗီုဗီုဏံ သ္ပဟွံထေက်” ရဂှ် ညးလျိုၚ်ဂှ် ဟီုရ။
ဒပ်အလဵုသဳ ၜက်လုပ်ကၠုၚ် လၟုဟ်ဝွံ ဒှ်ဒပ် ဗိုလ်ဇၞော် ဖျဵုဝေတိတ်ဥူ က္ဍိုက်ပ် ဒြဟတ် ဗၞတ် (၁၀) တလ ကၠုၚ်နူ ခမရ ၅၈၃ ဖျေံသဇိုၚ် ကွာန်ဘာ ပွိုၚ်ဍုၚ်ရေဝ်ရ။ ဒှ်သာ်ဂှ်ရ နူခရိုၚ်ထဝါဲဂှ် လၟုဟ်မ္ဂး ညးတအ် ဒးမ္ၚုဟ်လဝ် ဒပ်ညးတအ်ရ။
ဒၞါဲဒပ်အလဵုသဳ လုပ်စိုပ် လၟုဟ်ဏံဂှ် ဒှ်ဒ္တန်တိဍာ် ဗော်ဍုၚ်မန်တၟိ မတုပ်လဝ်စိုတ် ပ္ဍဲကာလ ဒိုအ်ပန်ပှော် တေံရတုဲ နူဒပ်အလဵုသဳ မိက်ဂွံလုပ်ချဳ ဒၞါဲဗီုဗီုတအ်ဏံမ္ဂး ကဵုသမ္တီကၠာတုဲဟေၚ် လုပ်ချဳဂွံဏေါၚ်ဂှ် တုပ်လဝ်စိုတ်ရ။
စပ်ကဵုကိစ္စဏံတုဲ နူရုၚ်ဆက်ဆောံ ဗော်ဍုၚ်မန်တၟိ ဍုၚ်မတ်မလီု မွဲတဆံၚ် ပ္တိုန်ထ္ၜးလဝ် ကုဌာနဝန်ဇၞော် ပရေၚ်ဂီုကၠီုပယဵု တွဵုရးမန် တုဲကီုရ သာ်ဝွံ ညးလျိုၚ်ဗော်ဍုၚ်မန်တၟိဂှ် ဟီုရ။
“ ၜက်လုပ်ကၠုၚ် ဗီုဏံဂှ် သီုအလန်ဏံမ္ဂး ဒှ်ဂွံ (၄) ဝါရ။ ပ္ဍဲဂိတု အဝ်ဂါတ်ဏံရ နူကဵု ၁ မံက်တေံဂှ် မွဲဝါ၊ ပ္ဍဲ ၉ မံက်ဂှ်မွဲဝါ၊ ပ္ဍဲ ၁၂ မံက်ဂှ်မွဲဝါ၊ တ္ၚဲဏံ ထပ်လုပ် မွဲဝါပၠန်ရ။ တုဲကၠုၚ် ၃ ဝါတေံဂှ် နူရုၚ်ဆက်ဆောံ ရေဝ် မွဲတဆံၚ် တေၚ်ဗ္စိုပ်လဝ် ကု စကခ ၁၉ ကီု ဂးရ။
ၜိုန်တေၚ်ဗ္စိုပ်လဝ် သာ်ဂှ်ကီုလေဝ် နူ စကခ ၁၉ မုလေဝ် ဟွံက္လေၚ်ပရိုၚ်ဏီ ဂးရ။ စနူဂိတုဏံမံက်တုဲ ဒပ်အလဵုသဳ ၜက်လုပ်ဒၟံၚ် မွဲဏှေံ မွဲဏှေံရ။ ပ္ဍဲအဝ်ဂါတ် ၁ မံက်တေံဂှ်မ္ဂး ဒပ်အလဵုသဳ ဗိုလ်ဇၞော် ဖျဵုဝေတိတ်ဥူ က္ဍိုက်ပ် ဒြဟတ် ၜိုတ် (၂၀) ကၠုၚ်နူ ခမရ ၅၈၃ ဒပ်ကွာန်ဘာ ဂှ်တုဲ လုပ်တိက် ပ္ဍဲကွာန်ဝါဗိုၚ် မွဲဗ္တံရ။
ပ္ဍဲအဝ်ဂါတ် ၉ မံက်ဂှ်လေဝ် ဗိုလ်ဇၞော် ဖျဵုဝေတိတ်ဥူ ပၠန်ရ က္ဍိုက်ပ် ဒြဟတ် ၁၃ တလ လုပ်တိက်မွဲဗ္တံ ပ္ဍဲကွာန်ဝါဗိုၚ်ဂှ်ပၠန်ရ။
ပ္ဍဲအဝ်ဂါတ် ၁၂ ဂှ်မ္ဂး ဗိုလ်ဇၞော် မျဵုတိတ်နံၚ် က္ဍိုက်ပ် ဒြဟတ် ၁၂ တလ နူဒပ်ခလရ ၁၀၆ ကွာန်တၟံကၞေၚ် ပွိုၚ်ဍုၚ်ပါ်လၟိုၚ် ပွိုၚ်ဍုၚ်ရေဝ်ဂှ် ထ္ပက်လုပ် ချဳဒရာၚ် ပ္ဍဲဂတှ်ေဍုၚ်တြေံ (ဗၟံက်ကွာန်တၟံကၞေၚ်) ရ။
ပ္ဍဲဂိတု အဝ်ဂါတ် ၅ ဂှ် ညးစၞး နူဌာန်ဂအုပ် ပရေၚ်ၜိုဟ်လလံဗၟာ ကၠုၚ်စိုပ် သဳကၠဳလဝ် ပ္ဍဲရုၚ်ဆက်ဆောံ ဍုၚ်မတ်မလီုတုဲ ပရေၚ်ဒပ် အလဵုသဳ ၜက်လုပ် ချဳဒရာၚ်ဏံဂှ်လေဝ် ဍေံဒှ်ကၠုၚ် ကြဴနူဂှ်ရ။