ကောံဓရီုသွာၚ်ကမၠောန်”ဗညာဓရာံ” ပ္ဍဲဌာန်ကောံသၟတ် တုဲဒှ်အာဗွဲမအံၚ်ဇၞး

ကောံဓရီုသွာၚ်ကမၠောန် “ဗညာဓရာံ” ဂှ် ကၠောန်ဗဒှ်ဏာ ပ္ဍဲစၟတ်တ္ၚဲ (၁၇) ဂိတုအဝ်ဂါတ် သၞာံ ၂၀၁၃ ဒၞာဲဌာန်ကောံသၟတ်မန် အရာပ်ပူတူပလာဇြ ဍုၚ်မလေဝ်ယှာရ။
ကောံဓရီုဝွံ ဗ္တံ (၁၀:၃၀) နာဍဳ စပံက်အသေဟာန် ဥက္ကဋ္ဌဂကောံသၟတ်မန် (M.Y.A) နာဲဥက္ကာ ဟီုဂလာန် အခန်ကဏ္ဍယိုက်ဂၠေၚ်ရေၚ်တၠုၚ် ကၠောန်ကမၠောန်ပိုဲဏံဂှ် ဍေံလုပ်ဝၚ်မွဲကီုရောၚ် ပိုဲကဵုကၠုၚ်ဘာပရေၚ်အာက္ဍိုပ် ဘာပရေၚ်ဍုၚ်ကွာန်တအ်ဂှ် ဒှ်အထံက်အရီု သွက်ဂွံရေၚ်တၠုၚ်ကၠောန်ပရေၚ်ဂကူရောၚ်။

ကမၠောန်မပ္တံကဵုပတိတ်လိက်ကၞပ် “ဗညာဓရာံ” ဏံဂှ်လေဝ် ဒှ်ကမၠောန်သာမညမွဲဟွံသေၚ် ဗွဲတၟေၚ် ညးဆာန်ဂကူပ္ဍဲဍုၚ် ညာတ်ဒးကမၠောန်ပိုဲ ထိုၚ်သး ကေတ်မံၚ်စရာဲလ္တုပိုဲဂှ် ပိုဲဒးမိပ်စိုတ် လိက်ကၞပ် “ဗညာဓရာံ” ဝွံ တဲဍိုန်အိုတ်ပချဳဒၟံၚ် ကောန်ကၟအ်ရဲဟွံလေပ်လိက်မန် ပ္ဍဲရးမလေဝ်ယှာဏံရောၚ် ဟိုတ်ဂှ်ရ ညံၚ်ဂွံဆက်ယိုက်ဂၠေၚ် ကေတ်အာတာလျိုၚ်မာန်ဂှ် ဗီုဏံမိက်ဂွံပ္ကန်ရ ရဴဝွံဟီုတဴဂလာန်ဂှ် ဂွံဇြဟတ်စိုတ်ရ။
ဆက်တုဲ ဂအုပ်ရုၚ် နာဲမဟူမာန် သောၚ်ကလးစရၚ်သြန် လုပ်/တိတ် ဒုၚ်စဳရေၚ်ပရေၚ်ကမၠောန်နာနာရ။
လိက်လၟေၚ် ဗညာဓရာံ ပိုဲပ္တိတ်ပ္ဍဲမလေဝ်ယှာဏံ လၟုဟ်ပေၚ်ကၠုၚ်(၄) ကၞပ် ပ္ဍဲဏံလွဳၜံၚ်ပတိုန် အ္စာကၞေဟ်တၟိတၟိ အ္စာပရိုၚ်တၟိတၟိမာန်ဟီုတှ်ေ ဒှ်တိုၚ်ပ္ကဴ ညးဒါန်လိက်တအ်မွဲရ ဆက်လွဳၜံၚ်အ္စာပရိုၚ် အ္စာကၞေဟ်တၟိပၠန်ဏောၚ် ရဴဝွံ သ္ကိုပ်အေဝ်ဒဳတာ နာဲရာမညအီဆာဲဟီုရ။
တုဲမ္ဂး သဳကၠဳလၟေၚ်ကမၠောန်အဓာန်ဂတဂှ် ဖျေံသ္ဂုတ်သွာတ် နာဲလွဳမာန် သၠုၚ်ပတိုန်ကဆံၚ်ဂအုပ်ရုၚ် သွာၚ်ကမၠောန်ဗညာဓရာံ ဒၞာဲလျိုၚ်ဗွဝ်ဖျာခၠန်ဒၟံၚ်ဂှ် ရုဲစှ်ကဵုတာလျိုၚ်ကု နာဲဇာတာ ရ။ သွက်လၟေၚ်ကၞပ်ဂတတေံဂှ် ချိၚ်ဏာ ဂိတုအံက်တဝ်ဗာ (၁၅) ဂှ် ဂွံတိတ်မာန်ရ။
ပ္ဍဲအစဳဇန်ကာနာနာဂှ် ဂအုပ်ရုၚ် (တြေံ) နာဲမဟူမာန် ၜိုတ်နုက်တိတ်ဒှ်ကၠာရလေဝ် စပ်ပရေၚ်ကမၠောန် ဌာန်ပရိုၚ်ဗညာဓရာံ အဆက်ညံၚ်ဟွံဂွံပိုတ်အာဂှ် ညးဂမၠိုၚ်ကဵုကသပ်ရ။
ကမၠောန်ဒှ်အထံက်အရီုကဵုဗၠးၜးဂကူဂှ် ပိုဲဒးသၠုၚ်ပတိုန်အသိၚ်တုဲ ကမၠောန်ဏံလ္ပယှအ်ဇဲ ဒးဂိုတ်ဂ္စာန် အလုံသၟတ်တအ်ဏောၚ် ရဴဝွံ နာဲရတ်နန်ဟီုရ။
ပ္ဍဲကောံဓရီုဝွံ သၟတ်ဆာန်ဂကူ ကွးဘာသၠုၚ်ပတိုန်လညာတ် ကမ္မတဳကေၚ်ကာ M.Y.A ဗၞတ် (၁၃) တၠပြၚ်ၚ် တိုန်စိုပ်လဝ်ရ ကောံဓရီုဝွံ လဒေါဝ်ဗ္တံ ၁၂ နာဍဳဂှ် အုပ်ကၠေံဏာအသေဟာန် နကဵုဒွက်ကောန်ဂကူရောၚ် ဂွံတီကေတ်ရ။