ဒၞါဲအရာပ်ပူတူပလာဇြာ ဒၞါဲရုၚ်သၟတ်မန်မဒှ်ရ။ ကောံဓရီုဝွံ စနူအခိၚ် ၁၂ နာဍဳကဵု ၃ မိနေတ် လ္ဒေါဝ်တ္ၚဲဂှ် ပံက်ဏါ အသေဟာန်တုဲ ရှ်ေသှ်ေအလာံ ကေုာံ က္ဍိုပ်သ္ကိုပ်သ္ဂံၚ်ဆာန်ဂကူပြဟ်လလုဲအာဂမၠိုၚ် ဗွဲမဍိုက်ပေၚ်တဴရ။
“နူကဵုဂကောံသၟတ်မန် ပ္ဍဲကဵုကဏ္ဍချဳဒရာၚ်မံၚ်ကမၠောန် ကေါန်ဂကူဟီုတှ်ေ ၜိုတ်ပိုဲသ္ပမာန် ၜိုတ်ပိုဲကၠောန်မာန် ပ္ဍဲကဵု သွာၚ်ပိုဲခံၚ် မပ္တံကဵု ဖျေံဘာပရေၚ်ဍုၚ်ကွာန် ဘာပရေၚ်အာက္ဍိုပ် သီုကဵုပ္တိတ်လိက်ဂှ် ဒဒှ်ရဒှ်မံၚ် အထံက်ဇၞော်ပ္ဍဲအရာ ဒတုဲဖဵုသၟတ်ညးမစိုပ်ဍုၚ်မလေဝ်ယှာကီု ပ္ဍဲအရာကေတ်ဗၠးၜးဂကူမွဲဏေါၚ် ညာတ်ကေတ်ရ။ ကောန်ဂကူပိုဲ မနွံမံၚ် လ္တူဍုၚ်မလေဝ်ယှာဏံဖအိုတ် လပါ်ပရေၚ်ကောန်ဂကူပိုဲဟီုတှ်ေ ညံၚ်ဟွံဂွံဝိုတ်ထောံ ညံၚ်ဟွံဂွံကရဴထောံစး ညးသ္ကအ်ဂှ် ညံၚ်ရဴရီုဗၚ်ထ္ၜလဘိုက် ညံၚ်ဂွံဘိုၚ်ချပ်မာန်ညိဂှ်” ဥက္ကဌဂကောံသၟတ်မန် တိဍာ်ဗၠးၜး-သ္ကုတ်မလေဝ်ယှာ နာဲဥက္ကာဟီုရ။
“သွက်ဂွံဒှ်အာသြန်ဂအုံ သၟတ်ဂှ် နကဵုကောန်ဂကောံသၟတ်ပိုဲတအ်လေဝ်ဒှ်မာန်တှ်ေ ညံၚ်ဂွံစုတ်အာကဵု အတိုၚ်လၟေၚ်ၚ် ဂိတုဂှ် “ ရဴဝွံ ဥက္ကဌ မန်မလေဝ်ယှာ နာဲအကးပေၚ် ဟီုရ။
“ပ္ဍဲကဵုကောန်ဂကူပိုဲဂှ် နကဵုလညာတ်ညးဒှ်ဒှ်ကီု ညးကၠောန်ကၠောန်ကီု တၚ်သ္ဂုတ်သွာတ်တအ်လေဝ် နွံဆၜိုတ်ပ္ဍဲ စရၚ်သၟး ကာလထၟံက်ရုပ်ရဴ ကွေံကွေံလေဝ် ရုပ်ရဴမံက်ကၠုၚ်ဟွံမာန် ဣဏံလေဝ် တၚ်ဍိုန်လျပ္ဍဲဂကူပိုဲ နွံကၠုၚ် ညံၚ်ဂွံနွံကၠုၚ်ကဵုတာလျိုၚ် ချိုတ်တ်ပၠိုတ်တ် ဂှ် ကေတ်တာလျိုၚ် ညိဂှ်” ညးအုပ်ကာ မန်မလေဝ်ယှာ နာဲဂံၚ်သ္ကာ ဟီုရ။
“စနူအခိၚ် အဒိုတ်ဂတဏံမ္ဂး ဘာပရေၚ်အာက္ဍိုပ်ဂှ် စပံက်ပၠန်ဏေါၚ်ဂှ် နူကဵုညးသၟတ်စိုတ်လုပ်စကဵု ဘာပရေၚ် အာက္ဍိုပ်တအ် အာတ်မိက်တုဲ စပံက်အာပၠန်ဏောၚ်။
အကာဲအရာကောန်ဂကူပိုဲလၟုဟ်ဂှ် ပရေၚ်ဗုၚ်ဂၞဴဂှ် သ္ပအဓိက နကဵု တာလျိုၚ်ပရေၚ်ကောန်ဂကူဂှ် စွံလဝ်လက္ကရဴ ဏေါၚ် အခိၚ်တ္ၚဲဏံဂှ် ပိုဲကေတ်မံၚ်စရာဲ ထ္ၜးမံၚ်သက်သဳဝၚ်အတိက်သၟးလေဝ် ဟွံတုဲပုဟ် နကဵုတာလျိုၚ်ပုဂ္ဂလိက ဂှ် နဇိုၚ်နတဲ ညံၚ်ဂွံပါလုပ်မာန် ဇၟာပ်ညးအဲ ဇြိုဟ်နက်လဝ် လ္တူပရေၚ်ကေါန်ဂကူ နကဵုအရီုစိုတ်နွံနွံ သွာၚ်ဇကုခံၚ် ဆက်ကွာ်အာညိဂှ်” ဥက္ကဌ ဂကောံသၟတ်မန် တိဍာ်ဗၠးၜး-သ္ကုတ်မလေဝ်သျှာ နာဲဥက္ကာဟီုဂလာန် အုပ်ကၠေံနိဂီုရ။
ပေါဲကောံဓရီု ကမ္မတဳကေၚ်ကာ( MYA) ဂမၠိုၚ် ညးဆာန်သၟတ် စိုတ်လုပ်စ သီုကဵုဂကောံကွာန်နာနာ ဗၞတ်(၅၀) တၠပြၚ်ၚ် တိုန်စိုပ်တုဲ ပ္ဍဲအခိၚ် ၁နာဍဳကဵု ၅၅မိနေတ်ဂှ် အုပ်ကၠေံနိဂီု နကဵုဒွက်ကောန်ဂကူရောၚ် သ္ဂောံတီကေတ်ရ။
0 comments :
Post a Comment